1Daudi nakoka Gati nakabilimila kuli mhalika ya kuli muji wa Adulamu. Wang'holoze lowahuliche mbuli ayo nawaluta kwa heye.
2Chila munhu yawele kuli magazo na munhu yoneche yalingudaigwa na wanhu weng'ha wawele na usungu kuli nhumbula za hewo na weting'hana kwa Daudi. Daudi nayali chilongozi wa hewo, nawo weng'ha nawali kota wanhu miya zine.
3Kulawa kula Daudi nakaluta mbaka Misipa ako Moabu na kumlonjela mndewa wa Moabu, “Ndangulanda uwakundize mhaza na mayangu wekale na hegwe mbaka heni ndivizele Nguluwi konditila choni.”
4Lelo nakawaleka mhaza wa heye na mayake wekale kwa mndewa wa Moabu, hewo nawekala hamwe na hewo mhela weng'ha Daudi loyawele kuli ngome.
5Mloli Gadi nakamlonjela Daudi, “Uleche kikala hano kuli ngome. Ulute kuli isi ya Yuda.” Daudi nakoka kuli chihulo cha ako Heleti.
6Sauli nakahulika kota Daudi na wanhu wawele hamwe na heye nawoneka. Sauli yawele na igoha lya heye mmoko, nayali yekalise hasi ha igodi lya ukwaju kuli chidunda ako Gibeya, yawele na vilongozi wa heye weng'ha wawele wemile kumzunguluta.
7Sauli nakawalonjela vilongozi wa heye, “Hemwe wanhu wa nhanzi ya isi ya Benjamini mhulichize. Ndaze, ayu Daudi mwana wa Yese kowapa hemwe chila yumwe migunda na migunda ja mizabibu? Ndaze, kowadita hemwe kuwa wakulu wa wamizi mamiya na wakulu wa wamizi maelufu?
8Lekachoni hemwe namkunda kunditila vibi heni? Haduhu ne munhu yandonjele mbuli ayi hanili mwana wa heni nakalagana na mwana wa Yese. Haduhu munhu ne yumwe wa hemwe yalingumbonela isungu ama kundonjela kota mwana wa heni nakamlavya chitumagwa wa heni Daudi kwa kubeteza chinyele leka yanhowe, kota vyoyalingudita lehano?”
9Ila Doegi munhu wa Edomu, yawele yemile habehi na vitumagwa wa Sauli, nakalonga, “Heni ndimona mwana wa Yese yoluta ako Nobu kwa Ahimeleki mwana wa Ahitubu.
10Ahimeleki nakamlandila Daudi kwa Mkulu Nguluwi, Ahimeleki nakamha Daudi chilyo na lila ipanga lya yula Mfilisti Goliati.”
11Hamba Sauli nakalajiza wanhu walute kumchema mtambika Ahimeleki mwana wa Ahitubu na ivyazi lyeng'ha lya mhaza wa heye, liwele nalyali watambika ako Nobu, weng'ha nawaluta kwa mndewa Sauli.
12Sauli nakalonga, “Lelo uhulichize hegwe mwana wa Ahitubu.” Ahimeleki nakamwidichila, “Ena, mkulu wa heni.”
13Sauli nakamuuza Ahimeleki, “Lekachoni hegwe na Daudi mwana wa Yese namkunda kunditila heni wihe, nakumha mibumunda na ipanga na kumlandila kwa Nguluwi kwa chiwalo cha heye? Kwa chiwalo acho nakambelenhuka na kumbeteza heni chinyele leka yanhowe kota vyoyalingudita lehano.”
14Ahimeleki nakamwidichila mndewa, “Kuli vitumagwa wa hegwe weng'ha, whaani yawele wa kukundigwa kota Daudi, mgosi wa hegwe mndewa na chilongozi wa chilundo cha wamizi wa hegwe yalingutogoligwa na weng'ha haluga ha hegwe?
15Ndaze, zuwa alyo nalyali lya mwaluko kumlanda Nguluwi kwa chiwalo cha heye? Hebu. Mndewa uleche kuwa na majesa gehile kwa heni ne yoneche wa ivyazi lya mhaza wa heni, kwa vila heni sivizelele choneche kuwala mbuli ayi yeng'ha.”
16Ila mndewa Sauli nakamlonjela, “Kobagama hegwe Ahimeleki na ivyazi lyeng'ha lya mhaza wa hegwe.”
17Hamba Sauli nakawalonjela wamizi wemile habehi na heye, “Muwakopole wala watambika wa Mkulu Nguluwi, kwa vila weng'ha wa hamwe na Daudi. Nawavizela kota nakabilima ila hawandonjele.” Ila wala wamizi hawakundile kwinula moko ga hewo kuwakopola watambika wa Mkulu Nguluwi.
18Mndewa nakamlonjela Doegi, “Ulute hegwe ukawakopole wala watambika.” Ahyo Doegi, Mwedomu, nakawakopola weng'ha. Zuwa lila nakawakopola watambika makumi nane na wahano wavalile vizibao vya kitani.
19Nakawakopola wanhu weng'ha wa muji wa Nobu kwa ipanga, muji wa watambika, walume na wadala na wana na wana walingong'ha na misenga na midogowi na ming'holo.
20Ila Abiatali, mwana mlume wa Ahimeleki, mwana wa Ahitubu nakabilimila kwa Daudi.
21Abiatali nakamlonjela Daudi kota Sauli nakawakopola watambika wa Mkulu Nguluwi.
22Daudi nakamlonjela Abiatali, “Zuwa lila, mhela Doegi, Mwedomu loyawele hala, nandivizela kota komlonjela Sauli. Lelo heni ndo chiwalo cha kubagama kwa ivyazi lya mhaza wa hegwe.
23Hegwe wikale na heni, uleche kudumba. Mina yawele youpala ukomu wa hegwe kanguupala ukomu wa heni kahi. Louwa hamwe na heni kochikala goya hela.”