1Sauli nakekala kwa mwaka umwe hamba nakawa mndewa. Loyalongoze isi ya Isilaeli kwa miyaka mili,
2Sauli nakahagula wanhu walume elufu zidatu kulawa Isilaeli. Wanhu elufu mbili nawali hamwe na heye ako Mikimashi na kuli isi ya vidunda vya Beteli na wanhu elufu imwe nawali hamwe na Yonatani ako Gibeya ya isi ya nhanzi ya Benjamini. Wanhu wanji waponile, nakawalajiza wahiluche chila munhu haluga hake.
3Yonatani nakaitowa ngome ya Wafilisti wa ako Geba na Wafilisti nawahulika mbuli ayo. Hamba Sauli nakalajiza mhalamhanda ipembigwe kuli isi yeng'ha na kulonga, “Waisilaeli wahuliche!”
4Ahyo Waisilaeli weng'ha nawahulika kota Sauli nakaitowa kambi ya Wafilisti na kahi Waisilaeli nawawa chinhu cha kuzudiza kwa Wafilisti. Lelo wanhu nawachemigwa kilumba na Sauli ako Giligali.
5Wafilisti naweting'hana kwa chiwalo cha kitowa na Waisilaeli, wawele na mituka ja ngondo elufu makumi gadatu na wakwina falasi elufu sita na wamizi wa kujenda kwa magulu wenji kota sangalaza za mhwani. Nawakwina kuchanya na kuwika kambi ako Mikimashi, ubanzi wa kolilawilaga isanya mwa Beti-aveni.
6Waisilaeli lowawene kota wa kuli magazo ng'hatu, nawevisa kuli mhalika na kuli misimo na kuli mitalawe na kuli visosolo na kuli mideho.
7Waisilaeli nawaloka lwanda lwa Yolodani mbaka kuli isi za Gadi na Gileadi. Sauli nayali ako Giligali, vilundo vyeng'ha vya wanhu viwele hamwe na heye navyali vikakama kwa lunhwinhwi.
8Sauli nakabeteza kwa mazuwa saba, mhela uwichigwe na Samweli, ila Samweli halutile Giligali na awo wanhu nawaluka kusambaluka.
9Sauli nakalonga, “Mngalile hano nhambiko ya kulakazwa na nhambiko za kikala goya.” Sauli nakalavya nhambiko ya kulakazwa.
10Loyasindile kulavya ayo nhambiko, Samweli nakalawila na Sauli nakaluta kumlamsa.
11Samweli nakauza, “Nakudita choni?” Sauli nakedichila, “Lombonile kota wanhu wangusambaluka nagwe huyile kwa mhela uwichigwe, kahi kota Wafilisti nawating'hana hamwe ako Mikimashi,
12nandijesa kota Wafilisti wodulika kunhowa ako Giligali. Nani simlandile Mkulu Nguluwi yang'hundize. Ahyo naindapa kulavya nhambiko ya kulakazwa.”
13Samweli nakamlonjela Sauli, “Nakudita upoka. Nakulema kuwinza malajizo goyakupele Mkulu Nguluwi, Nguluwi wa hemwe. Wone wahawinzile, Nguluwi yahauwichile undewa wa hegwe kwa Waisilaeli kwa mhela weng'ha.
14Ila undewa wa hegwe hauchikala mhela winji, Mkulu Nguluwi nakapala munhu yawele na nhumbula ya kumuwinza heye, nakamhagula yawe chilongozi wa wanhu wa heye, kwa vila hegwe nakulema kuwinza malajizo ga Mkulu Nguluwi.”
15Hamba Samweli nakaluta Giligali, nakaluta mbaka Gibeya ya isi ya nhanzi ya Benjamini. Sauli nakawawaza wanhu wawele hamwe na heye, nawali miya sita.
16Sauli na mwanage Yonatani na wanhu wawele hamwe na hewo nawali wochikala ako Geba ya isi ya nhanzi ya Benjamini, mhela Wafilisti vyowawele wawichile kambi ako Mikimashi.
17Vilundo vya wanhu walinguvaba navyuya kulawa kuli kambi ya Wafilisti, kuli vilundo vidatu. Chilundo chimwe nachikola nzila ilinguluta Ofila habehi na Shuali
18na chilundo cha keli nachiluta nzila ya Beti-holoni na chilundo cha kuduma nachikola nzila ya kuli isi ya mbaka jilinguluta kuli ibindi lya Seboimu lilingilola na kuchiwala.
19Nahakuwele na muwanzi wa kugongomanya vinhu vya chuma, yawele yoweza koneka kuli isi yeng'ha ya Isilaeli, kwa vila Wafilisti nawalonga, “Waisilaeli waleche kugongomanya mipanga ama migoha.”
20Ahyo Waisilaeli weng'ha nawalutaga kwa Wafilisti leka kunola mihuka ja kulimila na misenga na mihuka ja kulimila kwa moko na miwago ja hewo na sengo za hewo.
21Bei nayali ng'hulu kwa kunolela mihuka ja kulimila na misenga na mihuka ja kulimila kwa moko na sengo na uma na miwago.
22Ahyo zuwa lya ngondo, haduhu mwamizi yoneche yawele kuli kambi na Sauli na Yonatani, yawele nayali na ipanga ne igoha mmoko mwa heye, ila Sauli na mwanage Yonatani hela ndo nawali navyo.
23Lelo chilundo chimwe cha Wafilisti nachali chilawile kuli nzila ilingukola kuli vidunda kuluta Mikimashi.