1Samweli nakahola ibuli lido lya mafuta, nakajida kumutwi kwa Sauli, nakamnonela na kulonga, “Mkulu Nguluwi kakubakaliza mafuta uwe chilongozi wa wanhu wa heye Isilaeli.
2Loukuka kwa heni lehano, koting'hana na wanhu weli habehi na chilaga cha Laheli ako Selisa kuli mbaka wa Benjamini. Wokulonjela, ‘Jila midogowi jouwele ulingujipala, joneka. Lelo mhaza wa hegwe nakaleka kijesa kuwala midogowi na sambi kana lunhwinhwi kukuwala hegwe. Kanguuza, “Ndodita ndaze kuwala mwana wa heni?” ’
3Hamba koluta kumwando kulawa hano mbaka ufiche kuli igodi ikulu lya mwaloni ako Taboli. Wanhu wadatu walinguluta kwa Nguluwi ako Beteli woting'hana na hegwe aho. Yumwe kowa yaholile vinyehe vidatu na yunji mibumunda jidatu na yunji kahi kowa yaholile chihako cha igozi cha kuwichila divai.
4Wokulamsa na wokupa mibumunda mili, nagwe kobochela kulawa kwa hewo.
5Hamba koluta Gibeya ya Nguluwi, hawele aho kuwele hana kambi ya Wafilisti. Louwa habehi ha muji, koting'hana na chilundo cha waloli wodulika kulawa honhu ha kufugamila wawele na igombogombo na ngoma ndodo na mluli na ching'hweleng'hwele vyowa vitowigwa na kupembigwa kumwando kwa hewo, nawo wowa wolavya uloli.
6Muhe wa Mkulu Nguluwi wokuya mchanya mwa hegwe kwa mong'ho, nagwe kolavya uloli hamwe na hewo na kogaluswa kowa munhu yunji.
7Ulajilo awu houkwenela, udite choneche kota vyoulingulongozwa na Nguluwi, kwa vila Nguluwi ka hamwe na hegwe.
8Hamba ulongole kudulika kumwando kwa heni mbaka Giligali. Nani ndodulika kuko leka kulavya nhambiko za kulakazwa na nhambiko za kikala goya, ila kobeteza mazuwa saba mbaka hondikuya kukulonjela chinhu cha kudita.”
9Sauli loyagaluche na kumleka Samweli, Nguluwi nakaigalusa nhumbula ya Sauli kuwa inojile kusinda hamwande, ulajilo awu weng'ha nawenela zuwa lila.
10Lowafichile Gibeya, nakating'hana na chilundo cha waloli. Muhe wa Nguluwi naumuyila kwa mong'ho, naye nakelumba hali hewo na kulavya uloli.
11Wala wanhu weng'ha wamzelele hamwande lowamuwene yolavya uloli hamwe na waloli, naweuza, “Choni achi chimlawile mwana wa Kishi? Ndaze, Sauli naye kamumo hali waloli?”
12Munhu yumwe yawele yochikala ako nakedichila, “Ndaze, mhaza wa hewo ndo whaani?” Lelo nayali nhelo, kulonga, “Ndaze, Sauli naye kamumo hali waloli?”
13Sauli loyasindile kulavya uloli, nakaluta honhu ha kufugamila.
14Lelo mhaza mdodo wa Sauli, nakamuuza Sauli na chitumagwa wa heye, “Ndaze, namwali kohi?” Naye nakedichila, “Natwali tujipala ajo midogowi. Ila vyotuwene hajoneche, natuluta kwa Samweli.”
15Mhaza mdodo wa Sauli nakalonga, “Ndonjele Samweli nakakulonjela choni?”
16Sauli nakedichila, “Nakatulonjela hazelu kota ajo midogowi najoneka.” Ila nahamlonjele mhaza wa heye mdodo chila chinhu chiwele Samweli choyamlonje kuwala undewa.
17Samweli nakawachema wanhu wa Isilaeli leka walute hali Mkulu Nguluwi ako Misipa,
18nakawalonjela. “Mkulu Nguluwi wa Isilaeli kangulonga hino, ‘Nandiwalavya Isilaeli kulawa Misili, nani nandiwalohola kulawa kuli mong'ho wa Misili na isi zeng'ha zila ziwagazile.’
19Ila lelo namumlema Nguluwi wa hemwe, yawele kanguwalohola kulawa kuli kubagama kwa hemwe kweng'ha na magazo ga hemwe geng'ha. Namlonga, ‘Tuwichile mndewa hali hetwe.’ Lelo miwiche mwemwe baho hali Mkulu Nguluwi kwa nhanzi zeng'ha na ng'holo za hemwe leka yahagule mndewa hali hemwe.”
20Samweli nakawalonjela Waisilaeli wekungajize kwa kiwhana na nhanzi na ng'holo za hewo. Hamba nhanzi ya Benjamini naihaguligwa kwa kutowa simbi.
21Hamba nakaiwika habehi nhanzi ya Benjamini, lukolo kwa lukolo, lukolo lwa Matili naluhaguligwa kwa kutowa simbi. Kuli kuduma Sauli, mwana wa Kishi, nakahaguligwa kwa kutowa simbi. Ila vyowampalile nayali hambe yoneche.
22Nawalutilila kumuuza Mkulu Nguluwi, “Ndaze, hana munhu yunji kahi yalinguya?” Mkulu Nguluwi nakalonga, “Lole, nakevisa hagati ha mhomolo.”
23Nawabilima kumhola Sauli na kumhilika kwa wanhu, loyemile hagati ha wanhu, nayali ng'wemang'wema hali wanhu weng'ha.
24Samweli nakawalonjela wanhu weng'ha, “Ndaze, mwangumona munhu yawele Mkulu Nguluwi nakamhagula? Ka haduhuli munhu kota ayu hali wanhu weng'ha.” Aho ndo wanhu weng'ha nawatowa iyowe, nawalonga, “Mndewa yawe na kikala kwinji.”
25Samweli nakawalonjela wala wanhu hachi na mijito ja mndewa. Nakagandika mli chitabu na kachiwika hali Mkulu Nguluwi. Hamba Samweli nakawakundiza wanhu, chila munhu yalute kaye kwa heye.
26Sauli kahi nakaluta kaye kwa heye ako Gibeya, nayali hamwe na wanhu wazidahe wawele Nguluwi nakazikangaza nhumbula za hewo kuluta na heye.
27Ila wanhu wanji wajuvi nawalonga, “Munhu ayo koweza kutulohola?” Nawambeza, hambe wamigalile ndolendole. Ila Sauli nayali na kikala goya.