1Solomoni nakazenga ng'handa ya heye ya chiundewa kwa mhela wa miyaka kumi na jidatu.
2Hamba, nakazenga chihengo mgati mwa ng'handa ya mndewa, chilinguchemigwa Chihulo cha Lebanoni. Nachali na ulefu wa mita makumi gane na zine na nusu na ugazi wake mita makumi meli na mbili na lobo na wimo wake nawali mita kumi na zidatu na nusu. Chihengo acho nachali chizenjigwe mchanya mwa misitali jine ja mizengo ja mielezi, mizengo jiwele najali jibatilile boliti za mielezi kwa ubanzi wa kuchanya.
3Chila msitali nawali na mizengo kumi na jihano, ahyo jeng'ha hamwe najali mizengo makumi gane na jihano. Vihengo vizenjigwe mchanya mwa mizengo ajo, nakaviwichila vinduwiko vya mbawo za mielezi.
4Nakwali na misitali jidatu ja mitubuli jilingilola.
5Lwizi jeng'ha najali ja nzingo zine, najali ubanzi wa kumwando kuli misitali jidatu, jichilola.
6Nakazenga lugagala lwa mizengo, ulefu wake nawali mita makumi meli na lobo na ugazi wake nawali mita kumi na zidatu na nusu. Hali honhu ha kumwando ha lugagala alo nakwali na chituka na kumwando mwa chituka acho nakwali na mizengo na chinduwiko chidodo.
7Solomoni nakazenga chitala cha chigoda cha undewa, hawele amo nayali yotagusa wanhu. Chitala acho nachichemigwa Chitala cha Utaguso. Nachali chinoligwe kwa mbawo za mielezi kulawa hanyi mbaka kuli chinduwiko.
8Ng'handa ya kikala heye, iwele nayali kumbele kwa Chitala cha Utaguso nayali izenjigwe kota ziyage. Solomoni kahi nakazenga ng'handa kota ayo kwa chiwalo cha mhinza wa Falao, yawele nayali yamhesile.
9Ng'handa azo zeng'ha nazizenjigwa kwa maganga ga sendi nyinji kulawa kuli msisi mbaka kuchanya, maganga gahongoligwe kwa vipimilo vyowaganile na kudumuligwa kwa msumeno banzi zeng'ha.
10Msisi nawali wa maganga ga sendi nyinji na makulu gawele na ulefu wa mita zidatu na nusu na ugazi mita zine na nusu.
11Honhu ha kuchanya nahazenjigwa kwa maganga ganji gahongoligwe kwa vipimilo vivila vyowaganile na kwa mbawo za mielezi.
12Lugagala lwa ng'handa ya mndewa nalwali na lukanzi luwele na msitali umwe wa mbawo za mielezi jipanjigwe mchanya mwa misitali jidatu ja maganga ga kuhongola, kota vyoluwele lugagala lwa mgati mwa ng'handa ya Mkulu Nguluwi na chituka chake.
13Mndewa Solomoni nakawalajiza wanhu kumigala Hilamu kulawa Tilo.
14Hilamu, nayali mwana wa mdala yafililwe na mlume wa heye, kulawa nhanzi ya Nafutali na mhaza wa heye nayali mwenyeng'haye wa Tilo, mponda shaba. Hilamu nayali na kuvizela na muwanzi ng'hatu wa mijito joneche ja shaba, lelo nakaluta kwa mndewa Solomoni, nakamkolela mijito ja heye jeng'ha.
15Hilamu nakagongomanya mizengo mili ja shaba, chila limwe nalyali na ulefu wa mita nane na mzunguluto wake mita zihano na nusu.
16Nakagongomanya mitaji mili ja shaba, chila limwe nalyali na ulefu wa mita mbili na nusu kuluta kuchanya, nakajiwika mchanya mwa mizengo ajo.
17Hamba, nakagongomanya migasi jibotigwe kuli jila mitaji mchanya mwa jila mizengo. Nakwali na migasi saba kuli chila itaji.
18Nakagongomanya mafuza ga makomamanga, nakagawika kuli misitali mili kujizunguluta jila mitaji mchanya mwa chila izengo.
19Mitaji jiwele mchanya mwa mizengo ja chituka, najali jikoneka kota uluwa wa yunjiyunji na wimo wake nawali mita imwe na lobo zidatu.
20Mitaji ajo najali mchanya mwa ajo mizengo mili na najali kahi mchanya mwa honhu halingiwhana na chisaye. Habehi na wula utandawala nakwali na gala makomamanga miya mbili kuli misitali kuzunguluta chila itaji.
21Hilamu nakajiwika mizengo ajo kuli chituka cha ng'handa ya Nguluwi, izengo lyoyalimize ubanzi wa kusini nalichemigwa Yakini7:21 Yakini Ulonzi awu kwa Chiebulaniya una mana Nguluwi kodita nzinzili. na lila lyoyalimize ubanzi wa kasikazini nalichemigwa Boasi7:21 Boasi Ulonzi awu kwa Chiebulaniya una mana kwa mong'ho wa Nguluwi..
22Mitaji jiwele kuchanya najali jikoneka kota uluwa wa yunjiyunji. Ahyo mijito ja mizengo ajo najali jisindile.
23Hamba Hilamu nakagongomanya ibiga lya shaba lilinguchemigwa Bahali. Nalyali lya uvilingo liwele na ugazi wa mita zine na nusu kulawa nzingo imwe mbaka nzingo iyage na wimo wa mita mbili na lobo na mzunguluto wa mita kumi na zidatu na nusu.
24Hasi ha nzingo yake nakuzungulutwa na misitali mili ja mayungu, mayungu kumi kuli chila sentimita makumi gane na zihano. Mayungu ago nagagongomanyigwa mhela wuwula wa kuligongomanya ibiga.
25Ibiga alyo nalyali liwichigwe mchanya mwa jimalukolo ja mibuguma kumi na mili, jidatu najilola kasikazini na jidatu jinji najilola kolizinjilaga isanya na jidatu kahi najilola kusini na jidatu jiyage najilola kolilawilaga isanya. Ibiga alyo naliwichigwa mchanya mwa mibuguma ajo honhu hawo ha kumbele.
26Nzingo zake nazali na ugazi wa sentimita saba na nusu na nazali ziwhana na nzingo za chizombe na kota wula uluwa wa yunjiyunji. Ibiga alyo nalyali liweza kuwichigwa mazi lita elufu makumi gane (40,000).
27Hilamu kahi nakagongomanya mituka kumi ja shaba, chila mutuka nawali na ulefu wa mita imwe na lobo zidatu na ugazi wa mita imwe na lobo zidatu na wimo wa mita imwe na lobo.
28Mituka ajo najigongomanyigwa hino. Nakwali na mabamba ga hafungo gawele nagali gabatililwe na fulemu.
29Mchanya mwa mabamba na hagati ha azo fulemu, nakwali na jimalukolo ja misimba na mibuguma na vilumbigwe viwele na mabawa. Mchanya na hasi ha misimba na mibuguma nakwali kuwichigwe vinoligo vya kupondigwa.
30Chila mutuka nawali na maguludumu gane ga shaba na vinhu vya hagati vya kugazungulusila maguludumu ago navyali vya shaba. Kuli nzingo zine za mutuka nakwali na vibatililo vya shaba kwa chiwalo cha ibiga. Habehi na chila chibatililo nakwali na vinoligo vya kupondigwa.
31Honhu ha kuchanya ha mutuka nahali mwanzi na ha mvilingo, nahaluta kuchanya kwa nusu mita na sentimita kumi na nane mgati mwake. Kwa kunze, honhu hala nahanoligwa, mabamba gake nagali ga mlaba hagawele ga mvilingo.
32Maguludumu ago gane nagali hasi ha mabamba na vinhu vya hagati vya kuzungulusila maguludumu, navyali vilumbile na fulemu na wimo wa maguludumu ago nawali sentimita makumi sita na sita.
33Maguludumu ago nagagongomanyigwa kota maguludumu ga mituka ja ngondo ja kukwejigwa, mvilingo wake na chila chinhu cha maguludumu ago nachali cha kupondigwa.
34Chila fulemu nayali na moko gane. Moko umwe kuli chila nzingo.
35Mchanya mwa chila mutuka nakwali na fito ilingudita uvilingo wa wimo wa sentimita makumi meli na mbili. Vibatililo vyake na mabamba gake gawele ubanzi wa kuchanya, navilumba na mutuka.
36Moko na mabamba navinoligwa kwa jimalukolo ja vilumbigwe viwele na mabawa na misimba na migodi ja michikichi mchanya mwa fito, hamwe na mitaji jibotigwe kuzunguluta honhu heng'ha.
37Ahi ndo Hilamu vyoyagongomanye jila mituka kumi. Jeng'ha najali ja kugongomanyigwa kwa kupondigwa, jiwele na vipimilo na ukulu vilingiwhana.
38Hamba nakagongomanya mibiga jinji kumi ja shaba, ibiga limwe kuli chila mutuka. Chila ibiga nalyali na ugazi wa mita imwe na lobo zidatu na naliweza kuwika mazi lita miya nane.
39Nakawika mituka jihano kuli ubanzi wa kusini wa ng'handa na mituka jihano kuli ubanzi wa kasikazini na lila ibiga likulu nakaliwika kuli ubanzi wa kusini kolilawilaga isanya mwa yila ng'handa.
40Hilamu nakagongomanya kahi mibiga na makoleo na visaye vya kumizila. Lelo, Hilamu nakasinda mijito jeng'ha joyawele yomkolela mndewa Solomoni kuli ng'handa ya Mkulu Nguluwi,
41mizengo mili na mitaji mili jilingiwhana na visaye navyali mchanya mwa mizengo na utandawala wili kwa chiwalo cha kunoliga ajo mitaji mili jilingiwhana na visaye, jiwele mchanya mwa mizengo
42na makomamanga miya zine kwa chiwalo cha utandawala awo wili na misitali mili ja makomamanga kwa chila utandawala leka kunoliga jila mitaji mili jilingiwhana na visaye, jiwele mchanya mwa mizengo.
43Nakagongomanya kahi vikalilo kumi hamwe na nyhelo kumi kuli mituka ajo
44na lila ibiga likulu na jila mibuguma kumi na mili hasi ha ibiga
45na mibiga na makoleo na visaye vya kumizila. Vinhu avi vyeng'ha viwele Hilamu nakamgongomanyila mndewa Solomoni kwa chiwalo cha ng'handa ya Mkulu Nguluwi, navyali vya shaba ilingupulika.
46Vinhu avyo vyeng'ha mndewa nakavigongomanya kuli ibindi lya Yolodani, honhu hawele na misanga ja ilongo lya kulumbila vinhu, hawele hagati ha Sukoti na Saletani.
47Solomoni nakavileka vinhu avyo ne kuvipima kwa vila navyali vinji lukami, itunyo lya shaba haliwezile kuzeleka.
48Solomoni nakagongomanya kahi vinhu vyeng'ha viwele kuli ng'handa ya Mkulu Nguluwi, viwele ndo honhu ha kulavila nhambiko ha zahabu na chisaga cha zahabu kwa chiwalo cha mibumunda ja kuwika hali Nguluwi
49na vinhu vya kuwichila chenje vya zahabu inojile viwichigwe kumwando ha honhu helile ng'hatu, vihano kuli ubanzi wa kusini na vihano kuli ubanzi wa kasikazini, kumwando ha honhu helile ng'hatu. Nakagongomanya kahi uluwa na vyenje na makoleo
50na vizombe na mikasi ja kudumulila tambi za mishumaa na visaye vya kumizila na vifunyizi vya ubani na bawaba kwa chiwalo cha lwizi lwa honhu helile ng'hatu na kwa chiwalo cha lwizi lwa chituka chikulu cha ng'handa ya Nguluwi.
51Lelo mndewa Solomoni loyasindile mijito jeng'ha kuli ng'handa ya Mkulu Nguluwi, nakaviwika mng'handa vila vinhu viwele Daudi, mhaza wa heye nayali yaviditile viwe vya chiuyeng'ha, viwele ndo sendi na zahabu na vinhu viyage, hamba nakaviwika vinhu avyo kuli ng'hano za ng'handa ya Mkulu Nguluwi.