1À woilo gòoi ma, wa ʋe, wo ga naavolo nuiti! À wɔlɔ, wo ɓalakpala, tɔɔzei maanɔɠɔi maaʋele ma, é ʋaazu wo ʋɔ!
2Wa-naavoloiti ti luulaa, ɓaɠaɓaɠaiti ti wa-zeɠeiti kpotaɓotaga.
3Koikoigi wa-zanugiti ta wa-wali ɠaeiti koloɠologa, koikoigi naa ɠa é ga zeele wooi wo laalɔɠɔma, toɠa wo-ɓusɛi ɠoloɠolo eɠɛ abui. Wo naavoloi ɠaalɛa ba niima voloiti su, ti ga folo ɠaaɓelagiti.
4Pɛtɛ, wo la botiɠɛ nuiti salai veeni ti ya, niiti ti wa-ɓalagiti teʋeai. À woilo dɛɛ ti-zalai ɓain gooi ma! Molo leʋe nuiti kpain gooi zeelia Fai-Pɛ-Maliɠii GALA ma.
5Wo wa-eteai ziɛʋɛ gaanɛɛi zu ta ɓɔɠɔyiimai zu. Wo ɓɔɠɔ maalɔtɔʋɛ eɠɛ toganiiti wo ɠɔdaaleʋe voloi vaa zu.
6Wo telebo nui ʋeelalani, wo paa, é la wo zakpeni.
7Deɠɛmu, kɛ̀ɛleaiti, à yiilɔɔ eyɛsu Maliɠii ʋa. À wɛlɛ ʋelei tii ɠɛɛ nui a ɗa zooi ʋaalɔnɔ pagɔiti maaɓɔun da gola. Toɠa ɗa yiilɔɔ, eyɛsu é tona mɔungi zɔlɔɔ, ta ma ɠaaɓelagi é ʋuuzu.
8Wa ɓalaagi, à yiilɔɔ, wo zɛbɛzeɠe, mazɔlɔɔ Maliɠii ʋaa vai maaɓuɠaa.
9Kɛ̀ɛleaiti, à mina ɓaazaɠa ga ɓɔɠɔ lɔɠɔ wo ɠilagilagiti, naa ɠa a kɛ GALA ge mina wo lukpɔɠaaleʋe. Tukpɔɠaaleʋe Nui maaɓuɠaa, toɠa niina loni pɛlɛlaʋɛ.
10Kɛ̀ɛleaiti, GALA goo wo nuiti ti ɓɔɛni Maliɠii laaseigi zu, naati ta-ɓɔlɔi ta ta-yiilɔɔi ɠɛ wo ʋɛ ga poo pagɔi, wo ɠizɛ su.
11Pɛtɛ, niiti ti loni kpaan, da ɠɛɛzu naati ma, undaanɛɛ ɠa ti ʋɛ. Wo Zɔɓe ná-ziilɔɔ vai mɛnini, wo suɠwɛɛ nii Maliɠii kɛɛni bɛ gaaɓelagi zu. Mazɔlɔɔ Maliɠii laavegɛ ga nuɓɔɠɔlai ta maawɔinɠai.
12Kɛ̀ɛleaiti, faa nɔpɛ su, à mina ɠona, geeɠɔlɔgi ma, ɓaa zooi ma, ɓaa ga konai ma zii nɔpɛ. Kɛlɛ wa ɠɛna: «Ungo,» é ɠɛ ga: «Ungoi», wa ɠɛna: «Ɓa,» é ɠɛ ga: «Ɓagi», naa ɠa a kɛ wo mina loo GALA ná-tukpɔɠaaleʋei zu.
13Ta ɠa wo zaama, é kpɔlɔi zu ɓaa? Kɛni é GALA fali. Ta ɠa ná koozunɛai ɓaa? Naa maamusɛ wuyeiti too.
14Ta ɠa wo zaama, é zeeɓɛzu ɓaa? Naa Egilisi lotuɠɔiti toli, ti GALA fali ma, ti gulɔi ziɛ ma Maliɠii laaseigi zu.
15GALA falii é ɠɛɛzu ga kidaaleʋei, toɠa seeɓɛ nui ɠizo, Maliɠii ɠa kɛdɛyai ve bɛ. Ni é kotoa ɠɛɛʋɛ, naati suvaa ɠa yɛ bɛ.
16Deɠɛmu, à laa zɔ ga ɓɔɠɔ ɠaazu ga wa-ɠotoiti, wo GALA fali ɓɔɠɔ ʋɛ wo ɠilagilagi pɛ, naa ɠa a kɛ wo ɠɛdɛ. Zɛbɛi ɠa telebo nui ná-GALA falii ʋa, toɠa ɗa faa wola ʋaa.
17Eli ɠɛni ga nuɓusɛi ga de ɠɛʋele, é ɠilini GALA falii ʋa ga tona mina ʋu, tona la ɠɛni ʋuuni zooi ma, eyɛsu kona saʋagɔ alu dɔzita.
18Naa ʋolu, é GALA falini mɔnɔ, geeɠɔlɔgi yeeɓe tonai ʋa, zooi ná-kulanumaiti fe.
19Kɛ̀ɛleaiti, ni wo ta a ɠakana, é maaɠooza gaamai ʋa, taɠili ge gaaɠale ma ʋolu, é ʋaa la,
20à suɠwɛɛ ga zɔi é ʋaazu ga kotoba nui, é seɠe kaka pelei ma, naa ɠa ma nui yɛnvui ɠizosu saai ma, toɠa ɠɛ ga zaɓu kotoi ma mɔinmɔin suvaayɛ.