1Nà gaazaɠa bosu: GALA kɛlɛʋɛ nɛi ná-nuɓusɛiti ba ɓaa? Ɓa-o, naa li poun! Mazɔlɔɔ nà ɓɔɠɔi nà ga Izilayɛle nui, Abalaame mavofodai, gè ɠɛ ga Ɓɛnzamɛn ná-bolodai zu nui ta.
2GALA ge la ɠɛlɛni ná-nuɓusɛiti ba, é yiimazeɠeni ga tiye ná luɠɔ. Wo naa ɠwɛɛ kɛlɛ, nii GALA Sɛʋɛi bogai, ʋɛ Eli ɠɛni ɓalasu ná GALA goi zu ga Izilayɛle ná-faa ga:
3«Màliɠii, ti è-laawoo wo nuiti paa, ti ɗa-zalaɠa ɠulazuʋɛti koloɠolo, nà ɠila ka niina zɛ̀gai ʋoluzu, nà ɓalaagi ta pɔ ga ti pàa.»11:3 1Ma 19:10.
4Kɛlɛ GALA ge gooɠaaʋoteni ɠale? É ɠɛni ma: «Gè nu waadɔfela (7.000) makɛgɛ ʋɛ, niiti ti la ʋilɛni ɲiibiɠa Ɓaale ʋɛ.»11:4 1Ma 19:18.
5Zekana é la niima yeeɠɛɠalai zu, nui mɔta goiti ta ná, GALA ge yiimazeɠeai ga tiye ga ná-zaalai maaʋele.
6É yiimazeɠeni ga tiye ga ná-zaalai maaʋele, ta-ɠɛɛwotiiti maaʋele laade, ni naa laade, GALA ná-zaalai la levea ga zaala ɠiteɠite.
7Leeni ɠa a wo naazu? Izilayɛle nuɓusɛiti ti la naa zɔlɔɔni, nii ti ɠɛni gaiziɛzu. Kɛlɛ zɔiti GALA ge yiimazeɠeni ga tiye, naati ti sɔlɔɔni. Mɔtaiti kigi ɓaani ti ɠoozu,
8eɠɛʋelei GALA Sɛʋɛi bosu la, é ɠɛ ma:
9Davide ɓalaagi ɠɛni ma:
10Ti-ɠaazuʋɛ ɓidi, ti mina wozaɠa,
11Nà gaazaɠa bosu: Siɛgi zu Izilayɛle nuiti ti ɓunɛga la, ti loa ɠana ná bu mɛtu ɓaa? Ɓa-o, naa li poun! Kɛlɛ ta-vaaɠaazagi maaʋele ma, zii ɠiligi zɔiti ti kizogi zɔlɔɔga, naa toloi wuzeɠea Zuifuiti ziimaʋɛ ti laalɔɠɔma.
12Ni ta-vaaɠaazagi ɠɛa ga kpɛtɛ zaɓui eteai pɛ bɛ, ta ta-loobui ɠɛ ga kpɛtɛ vaa zii ɠiligiti bɛ, kulanuma wola lielegɔ ɠa a zɔlɔɔ, siɛgi zu ti pɛ ti ɠaavɔnisu la?
13Zii ɠiligiti, wa ɠa gè ɓɔɛzu wo ʋɔ, nɛ̀i gè ga zii ɠiligiti wa-ɠeelai, nà nà-botii maamusɛzu.
14Ni ma zobo ka ná, nà pɔ gè kɛ ʋele-o-ʋele, gè toloi lɔ naati kigi zu, gá niiti gi ga zii ɠilagi, nii a kɛ tanigaani ti kizogi zɔlɔɔ ti zaama.
15Tama siɛgi zu ti likpini da, naa ɠɛa ga zɔɠɔzuɓɛtɛi eteai ta GALA ti yɔɠɔzu, siɛgi zu zeezeibui wosu la ga tiye, leeni ɠa a ɠɛ naazu? Toɠa ɠɛ ga zɛnvui naati bɛ, niiti ti zaani!
16Ni ɓului ma mɔungiti kulaʋɛ GALA bɛ, mɔtai pɛ ka ga nɔnɔ ɓalaa, ni ma zapei ɠa ga GALA nɔnɔ, ma ɓekegiti pɛ ta ɠɛ ɠana nɔ ɓalaa.
17Kɛlɛ ni ma ɓekegi tanigaani ti vologa ba, ni ɗɛi è ga dɔɓɔzu wolive wului ma ʋɔnɔgi, è loga ma lɔkulugi ʋa ti-ʋotogi zu, wo ɓɔga ma zapei ma ta su ɗɛi,
18mina waso ma ɓekegi zɔiti ma, ti vologai ba. Ni ɗa wasona, kwɛɛ è ɠɛ ma, ma zapei lɛi é ʋa ɠɛ loni è ʋa, kɛlɛ ɗɔun ka è loni ma zapei ʋa, é ɗa è zeɠe.
19Ɗa ɠɛ ma naazu: «Ma ɓekegiti ti voloni ba, nii a kɛ gè lo ba ti-ʋotogi zu.»
20Naa ɠa ga gaama. Ti voloni ba ta-ɠidaaleʋelalai maaʋele ma, ɗɔun è tosuʋɛ tɔna sɔlɔɔga kidaaleʋei maaʋele ma. Dama, è mina waso, kɛni è lua.
21Mazɔlɔɔ ni GALA ge la ma ɓeke kiteiti gaazumaawɔinɠaani, é ʋa ti yɛ ná, é la è ɠaazumaawɔinɠaa, é ʋa è yɛ ná.
22GALA ná-nuɓɔɠɔlai ta ná-gaazumaavɔi ʋɛtɛ, gaazumaavɔi naati tetema, niiti ti looni, ná-nuɓɔɠɔlai è letema, ni ɗa yɛna nuɓɔɠɔlai naa zu. Ni naa laade, ɗa ɓalaagi ɗa leʋezu ga.
23Tiya ɓalaagi, ni ti la yɛni ta-ɠidaaleʋelalai zu, ʋɛ ti ɠɛni loni ná, ta lo miná ʋolu, mazɔlɔɔ zobogi ɠa GALA bɛ, é ti lo ná ʋolu.
24Ni è leʋeʋɛ ga, è ɠula dɔɓɔzu wolive wului ʋa, è lo wolive wulu ɠitei ʋa, nii siingai, kula kazemazui ɠana. Tiya ma, tago pa ge la ɓaani ga ti ʋa nɔ, ti lo ti ɓɔɠɔ wolive wului ʋa, é ga ti-ma lɔkulu pɔlɔmai.
25Kɛ̀ɛleaiti, gè pɔ ga gè GALA ná-faazeikpasui ma lɔɔɠuzu vai lɛ ga woye, nii a kɛ wo mina ɓɔɠɔ leve ga ɠima nu wolaiti. Izilayɛle ɠilazuʋɛ ɠa yɛsu kikpaai zu, eyɛsu zii ɠiligiti tiegɔi ɠaavɔni GALA ná-nuɓusɛiti saama.
26Naa ɠa é ba, Izilayɛle pɛ ka ɠizo, eɠɛʋelei sɛʋɛai la GALA Sɛʋɛi zu, é ɠɛ ma:
27Minai ɠa nà seɠe ti ʋɛ,11:26-27 Eza 59:20-21 bogɛ é zoloo Gɛlɛke woo zɛʋɛ wɔlɔmai ma.
28Woo Niinɛ Ʋagɔi letemazu, ta ga GALA sili nuiti wa-vaa zu, kɛlɛ GALA ná-ziimazeɠegi letemazu, ta ga naati GALA ge ti nɛai ʋɛ, ti-mɛmɛwolani maaʋele ma.
29Mazɔlɔɔ GALA ná-vebɛaniiti ta ná-toligiti maa la valiboga.
30Mɔungi zu, wa ɓalaagi wo kololalai ɠɛɛni GALA daawooi ʋɛ, kɛlɛ niizu wo GALA ná-maawɔinɠai zɔlɔɔga, tɔɔzei Zuifuiti ta-ɠololalai ʋa.
31Zekana nɔ, ti kololalai ɠɛa niizuʋɛ, nii a kɛ wo GALA ná-gaazumaawɔinɠai zɔlɔɔ, kɛlɛ naa ɠa a kɛ, tiya ɓalaagi ti zoo ti gaazumaawɔinɠaa ɠilagi naa ɓɔɠɔi zɔlɔɔ.
32Mazɔlɔɔ GALA ge ɛsɛ pɛ devea ga woozotala nuiti, naa ɠa a kɛ, ɛsɛ pɛ ge ná-gaazumaawɔinɠai zɔlɔɔ.
33Ee, GALA ná-kpɛtɛi zuwɔɔlɔʋɛ, ta ná-ɠimalai, ta ná-faaɠwɛgi! Nu la zooga a ʋa ná-tukpɔɠaaleʋe vaiti gaaɠa, nu la ná-faazeikpasuiti gaaɠaa!
34Sɛʋɛʋɛ ɠani GALA Sɛʋɛi zu:
35«Ɓɛ ɠa é ani vea tɔun bɛ,
36Anii pɛ ka zeɠezu pɔ bɛ, ti pɛ ta tɔun saalai nɔ zu, ti pɛ ta ná tɔnɔ ʋɛ. Lɛbiyai ɠɛ tɔun bɛ, eyɛsu ɠɔ. Amina!