1Samesɔn liini Gaza taazuʋɛ, é koloɠolo anzanui ta ɠaani ná, é lɛɛni naa ná-pɛlɛi wu.
2Ti ɠɛni Gaza nuiti ma: «Samesɔn zeeliʋɛ taazuʋɛ.» Ti nu ɠulazuʋɛ kpein makɛni kpidii, ti ɗa maaɓɔun taa ziɠidaʋɛ. Anɛɛ naa ʋe, ti ɠaalɛini kpidii ɲɛgɛlɛin, ti deve ga ti paa sobui.
3Samesɔn yɛni laani dɔin eyɛsu kua zaamai. Kua zaamai, é wuzeɠeni, é taai ma ziɠigi ma ɓo sɛʋɛiti soni ta daamasa felegɔiti, é kpo sɔɠɔgi ʋa, é ti pɛ pu ɠɔma, é li ga tiye gize unmaʋɛ Eɓelɔn letemaʋɛ.
4Tago zuɠoozaai ma, Samesɔn anzanui ta nɛɛni ʋɛ, nii daa ɠɛni ga Dalila, é ɠɛni zeini Solɛke nɛmɛi zu.
5Filisiti nuiti ta-ɠundiɠiiti ti liini naa ʋɔ bɛ, ti ɠɛ ma: «Nɛɛnɛso dɛɛ, è kwɛɛ ʋɛ ná-zɛbɛ wolai zeɠezu ná, ta ʋelei ga zobo sɔlɔɔ da ma, gá gilizu, gi vɔni ma, gi ɠilagilagi ɠa wali ɠae waagila ungila (1.100) fe è ya.»
6Dalila ɠɛni Samesɔn ma: «Nà è maanɛɛnɛzu, ʋɛ ɗa-zɛbɛ wolai zeɠezu ná, soma è ná lɛ ga ze, ta leeni ɠa nu a è ɠili la, nu vɔni è ma.»
7Samesɔn gooɠaaʋoteni, é ɠɛ ma: «Ni nu a gìlina ga mɛɛn galu niinɛ lɔfela, niiti ti la dɛ vɔɔni, zɛbɛi ɠa ɠula zèa, nà ɠɛ nɔ eɠɛ nui mɔtaiti kɛʋele.»
8Filisiti nuiti ta-ɠundiɠiiti ti ʋaani ga mɛɛn galu niinɛ lɔfelaiti Dalila ʋɔ, niiti ti la ɠɛni dɛ vɔɔni. É gilini ga naati.
9Kɛlɛ ti nuiti dɔɔɠuni koba pɛlɛi wu. Anzanui ɠɛni ma: «Filisiti nuiti ta ga è zo, Samesɔn!» É mɛɛn galui naati suleʋeleʋeni eɠɛ nɔ geze vuɓe ga ɠala abu ɠa. Ná-zɛbɛi zeɠezuʋɛ la ɠɛni ɠwɛɛni.
10Dalila ɠɛni Samesɔn ma: «Wɛlɛ, è gàaɓoloɠazu, zɛɛiti ka è ti woga mà. Niizu nà è maanɛɛnɛzu, soma è naa lɛ ga ze, nii nu ɠa è ɠili la.»
11É ɠɛni ma: «Ni ta gìlina ga galu wɔɛn niinɛiti, ti la dɛ botii ɠɛɛni ga tiye, zɛbɛi ɠa ɠula zèa, nà ɠɛ nɔ eɠɛ nui mɔtaiti kɛʋele.»
12Dalila galu wɔɛn niinɛiti seɠeni, é gili ga tiye. Naa ʋoluma, é ɠɛ ma: «Filisiti nuiti ta ga è zo, Samesɔn!» Nuiti ma ti ɠɛni loni koba pɛlɛwuʋɛ. Kɛlɛ galuiti ti ɠɛni zeei ʋa, é ti leʋeni ga eɠɛ geze ɠaali ɠila nɔ.
13Dalila ɠɛni Samesɔn ma: «Zaaɠaza ɗa gàaɓoloɠazu, zɛɛiti nɔ ɠa è ti wosu mà. Dɛɛ ga ze, nii nu ɠa è ɠili la.»
14Kɛai ma ɲiizu, Dalila nɔun kpaɠa lɔfelaiti fɛlɛni geze vɛlɛ ɓakogi zu, è ti zei da ga pagɔ ga gului. É ɠɛni ma: «Filisiti nuiti ta ga è zo, Samesɔn!»
15Dalila ɠɛni ma: «Ɗa zoo ɠale è ɠɛ mà: ‹Gè è nɛɛʋɛ ʋɛ.› È la laani dà! Wɛlɛ, ná zeizu ɠɛa saʋa, è ɗa gàaɓoloɠa, è la kɛɛni, è ʋa ɗa-zɛbɛ wolai zeɠezuʋɛ lɛ ga ze.»
16Tɛi folo-o-folo é ɠɛni kpɔlɔzu, é ɗa zelii lo ma ga daawooiti, saa wɔin soni.
17É ɠoozu vai pɛ boni ma, é ɠɛ ma: «Kpeka la dɛ vɔɔɠuni nɔ̀ungi ʋa, tɔɔzei gè yɛni dèe ɠoozu, gè ɠaliva GALA ma. Ni nɔ̀ungi a wona, nà ʋala sɛ̀bɛi ma, nà ɠɛ eɠɛʋelei nuɓusɛi mɔtaiti ti la.»
18Dalila kaai ma ga é ɠoozu vai pɛ boga ma, é wooleʋeni, ti Filisiti nuiti ta-ɠundiɠiiti toli, é ɠɛ ti ma: «À ʋaana niizu, mazɔlɔɔ é ɠoozu vai pɛ boga mà.» Filisiti nuiti ta-ɠundiɠiiti ti liini pɔ bɛ, ga waliiti ya.
19É Samesɔn laani ɠɔɠɔi ma, naa ɲi, naa ʋolu é zunui ta lolini, naa nɔundeɠa vɛlɛa lɔfelaiti teʋe ga. Pele ɠana é tɔɔzeini la ga vɔniga ma, tɔɔzei ná-zɛbɛi ɠulani zea.
20É ɠɛni ma: «Filisiti nuiti ta ga è zo, Samesɔn!»
21Filisiti nuiti ti soni, ti gaazuɠɛzɛ felegɔiti kulani su. Ti yeini la Gaza, ti gili ga kɔlu ɓɔi yɔlɔɠɔi, ti pili kasoi ɠa, é ɗa molo ziɠa ɠɔtui lati.
22Anɛɛ naa ʋe, nɔungi ɓuyega ʋoluma, nɔundeɠai tɔɔzeini ga lɛa nɔungi ma.
23Tama, Filisiti nuiti ta-ɠundiɠiiti ti ɠaalɛɛni ba, ga ti zalaɠa wola ɠula ta-ɠalagi Dagon ʋɛ, ti ɠoozunɛ. Ti ɠɛni ɠɛɛzu: «Gá-ɠalagi gi zili nui Samesɔn lɔa gi yeezu.»
24Siɛgi zu nuɓusɛiti ti kaani la, ti ɠoozunɛɛni, ti ta-ɠalagi maamusɛ, ti ɠɛ ma:
25Tɛi ti wola ɠoozunɛɛni, ti ɠɛni ma: «À Samesɔn loli, é ʋa é ɠaogi wo gi ʋɛ!» Ti Samesɔn lolini, é ɠula kasoi ɠa, é ɗa ɠaogi wo ti ɠaazu. Ti toni pɛlɛi ma ɓɛdɛgiti zɔɠɔzuʋɛ.
26Samesɔn ɠɛni zunu loungoi ma, nii é ɠɛni sosu zee ʋa: «Lo tùɠɔ, è zèe ʋɛɛ kpɛdɛgiti ba, niiti pɛlɛi zeini ti ɠa, gè yeeve ti ʋɛ.»
27Pɛlɛ wolai naa laaveni ga nuɓusɛi, zunuiti ta anzanuiti, Filisiti nuiti ta-ɠundiɠiiti kpein ti ɠɛni ná. Seizei bosuʋɛ pɛlɛ ɠɔmaʋɛ, miná pɛ ka naa laaveni, nu waasaʋagɔ (3.000) ɠa é ɠɛni ná, zunuiti ta anzanuiti, ti ɠɛni wɛlɛzu Samesɔn ʋa, é ɗa ɠaogi wo.
28Samesɔn wooɠulani Ɠɔoɠɔ GALAGI ma, é ɠɛ ma: «Màliɠii, Ɠɔoɠɔ GALAGI! Nà è maanɛɛnɛzu, ɠizɛ sù, ee, GALA, zɛbɛi ve bɛ̀, niizu, ná ɠɛ ɠila kpe nɔ, gè gàazuɠɛzɛ felegɔi vaa ʋotokula Filisiti nuiti ma!»
29Samesɔn yeeveeni zaamazu ɓɛdɛ felegɔiti bɛ, pɛlɛi ɠɛni zeini ga, é vɔɔɠu ti ʋa, zɔi ɠɛni zeezazuʋɛ, zɔi ɠɛ kɔʋɛzuʋɛ.
30Naa ʋolu é ɠɛni ma: «Gi za ʋɔɔma gá Filisiti nuiti!» É ti laaʋilini ga zɛbɛi pɛ, pɛlɛi woloni Filisiti nuiti ta-ɠundiɠiiti ma, ta bɛbɛi, nii é ɠɛni ná. Nii é paani saazuʋɛ, naa mɔinni é leʋe kɛai ma vulua gele ʋa.
31Kɛɛɠɛleaiti ta ná-nuiti kpein, ti yeini, ti ma ʋoomai zeɠe, ti lii la, ga ti maaɠulu Soleya ta Esetawɔle ti yɔɠɔzuʋɛ, kɛɛɠɛ Manoa ná-kabayeɠei zu. É ɠɛni ga tukpɔɠaaleʋe nui Izilayɛle yooi zu kona ʋuufelegɔ (20) laawu.