1Zuda masagi Sedesiyase ná-kona taaʋuugɔi alugi ʋuusiɛi ma volo ʋuusiɛi ma masa fai zu, Ɓaɓilɔne masagi Neɓukadenɛzaal ʋaani ga ná-kɔɔʋɛbɛi pɛ Zeluzalɛme laalɔɠɔma, é ná zei kɛlɛ su.
2Sedesiyase ná-kona puugɔ maazu ɠilasiɛi (11), alugi naanisiɛi, folo taaʋuugɔi, Ɓaɓilɔne nuiti ti zeɠei wɔɔni taai ma ziɠigi ʋa.
3Naazu, Ɓaɓilɔne masagi ná-kundiɠi wolaiti kpein ti lɛɛni, ti zei zaamazuʋɛ siɠidaʋɛ: Nɛɛlegale-Salɛsɛɛl, ta Samegaal-Neɓo, naa ʋɛɛ salaʋusu ɠundiɠi wolai Sal-Sekime ta ɠima nuiti ta-ɠundiɠii Nɛɛlegale-Salɛsɛɛl ʋa, é ʋɛɛ masagi ná-salaʋusu ɠundiɠii zɔiti kpein ba.
4Gaamago nɔ, masagi Sedesiyase ta ná-salaʋusuiti ti suɠwɛɛgai ma, ti ʋelani, ti ɠula taai ʋa kpidii, ga masagi ná-kpelei zu ʋelei, siɠi felegɔi yɔɠɔzuʋɛ ma ziɠidaʋɛ, ti li ga pelei nii é liizu ga Zuludɛn ma ʋɛtu nɛmɛi zu ʋele.
5Kɛlɛ Ɓaɓilɔne zalaʋusuiti ti ʋilɛni ti ʋolu, ti Sedesiyase zoni Zeliko nɛmɛi zu. Ti soni, ti lii la Ɓaɓilɔne masagi ʋɔ, Liɓila, Ɠamate yooi zu. Miná ɠa Neɓukadenɛzaal ná-tukpɔi ɠaaleʋeni ná.
6Ɓaɓilɔne masagi Sedesiyase ná-doun zunuiti paani ti-ɠɛɛ ɠaazu Liɓila, ta Zuda zeizumaanɛgiti pɛ ɓalaa.
7Naa ʋolu é Sedesiyase ɠaazuɠɛzɛiti goloni su, é gili ga kɔlu ɓɔi yɔlɔɠɔ felegɔ, ti lii la Ɓaɓilɔne.
8Naa ʋoluma, Ɓaɓilɔne nuiti ti masagi ná-pɛlɛi ɠalani Zeluzalɛme, ta nuɓusɛiti ta-ʋɛlɛiti, ti siɠigi wolo.
9Nuɓusɛi mɔtai ma é yɛni taazuʋɛ, niiti ti ɓɔɠɔ veeni, ta nuɓusɛi mɔtai é ɠɛni ná, masagi makɛ nuiti ta-ɠundiɠii Neɓuzaladan naati seɠeni, é li ga tiye Ɓaɓilɔne.
10Kɛlɛ niiti ti ɠɛni ga bala nuiti nuɓusɛiti saama, ani la ɠɛni ti ya, Neɓuzaladan vaani bu ga naati ti yɛ Zuda yooi zu. Naama volo ná, é leezɛn ɓeleiti ta kpalagiti feeni ti ya.
11Niima levei ɠa Ɓaɓilɔne masagi Neɓukadenɛzaal feeni masagi makɛ nuiti ta-ɠundiɠii Neɓuzaladan ya, Zelemi ná-faa zu ga:
12«Seɠe, è ɠaazuyɛ ba, mina faa ɲɔu nɔpɛ kɛ la, kɛlɛ nii a bo è ma, naa ɠɛ bɛ.»
13Masagi makɛ nuiti ta-ɠundiɠii Neɓuzaladan, ta salaʋusu ɠundiɠi wolai Neɓusazeɓan, ta ɠima nuiti ta-ɠundiɠii Nɛɛlegale-Salɛsɛɛl, ta Ɓaɓilɔne masagi ná-kundiɠiiti kpein,
14ti nu leʋeni Zelemi laaɠomisu kaso ziɠigi zu, ti kula, ti fe Gedalia ya, Ayikame ná-doun zunui, Safan ná-dounloin. Gedalia ɠɛni vaazu bu é ɗa li ná-koizu. Zelemi ɠɛni nɔ nuɓusɛiti saama.
15Siɛgi zu Zelemi ɠɛni la dɛ kaso ziɠigi zu, Ɠɔoɠɔ GALAGI ɓɔɛni pɔ, é ɠɛ ma:
16«Li, è ɓɔɛ Eɓɛde-Melɛke ʋɔ, Etiyopi nui, è ɠɛ ma: ‹Ɠɔoɠɔ GALAGI, Fai-Pɛ-Maliɠii, Izilayɛle ná-GALAGI wooi ɠaa: Gè la ɠɛni undaanɛ vaa laazeelini taai tɛi su nuiti ma, kɛni maanɔɠɔi ma vai. Tama, nà ga naa laazeeli nii gè boni, su la ɠoozazu naa ɠɛ è ɠaazu.
17Kɛlɛ voloi naama maanɔɠɔ vai ʋaazu la, nà è ɠizo, Ɠɔoɠɔ GALAGI wooi ɠana. È la lɔa zunui naati zeezu, niiti è luazu ti ʋa.
18Nà è ɠizo saai ma, è-yɛnvui ɠa yɛ è ya, ɗa naa mu sɔlɔɔ ɓalaa, mazɔlɔɔ è laani nɔ̀un da, Ɠɔoɠɔ GALAGI wooi ɠana.› »