1Zuda masagi Yeɠoyakime, Zoziase ná-doun zunui ná-masadai lɔɔzei ziɛgi zu, Ɠɔoɠɔ GALAGI ɓɔɛni Zelemi ʋɔ, é ɠɛ ma:
2«Ɠɔoɠɔ GALAGI wooi ɠaa: ‹Li, è lo Ɠɔoɠɔ GALAGI zei ʋɛlɛi ma ɠoizuʋɛ, è ɓɔɛ naati kpein pɔ, niiti ti ʋaazu GALA fali vai ma, ti zeɠe Zuda laa wolaiti su. Ti pɛ bo ti ma, nii gè è levezu ga è bo ti ma, mina woo ɠila kpalaa zɛ ʋoluzu.
3Tanisu ta woilo, ti ɠale ma, ti zeɠe ti-ziɛ ʋele ɲɔiti polu ti ɠilagilagi. Wɔin ɠɛa mà ga gè ti maanɔɠɔ, tɔɔzei faa ɲɔi ʋa ti kɛɛzu, kɛlɛ ni ta woilona, nà naa yɛ ná.
4Ɗa ɠɛ ti ma deɠɛmu: Ɠɔoɠɔ GALAGI wooi ɠaa: Ni wo la woiloni gòo ma, wo ʋa ziɛ ga tɔ gooi gè feeni wo ya,
5ni wo la woiloni nà-botiɠɛ nuiti, GALA goo wo nuiti goo ma, gè ti leʋesu wo ma ɠɔ, tama wo la woiloni ma,
6naazu nà GALA sei ʋɛlɛi nii zo eɠɛʋelei gè Silo ada ɲadegai zoni da, nà Zeluzalɛme ɠɛ zii ɠiligiti pɛ bɛ eteai zu ga poogi ti ɗa bo, ta ɠɛna foovooi loa.› »
7Zalaɠa ɠula nuiti ta GALA goo wo nuiti, ta niiti pɛ ti ɠɛni ná, ti Zelemi wooi mɛnini, é ɗa niima wooiti bo Ɠɔoɠɔ GALAGI zei ʋɛlɛi ma ɠoizuʋɛ.
8Siɛgi zu Zelemi ɓeni da feya ga naa pɛ bo, nii Ɠɔoɠɔ GALAGI boni ma ga é bo nuɓusɛiti pɛ ma, zalaɠa ɠula nuiti ta GALA goo wo nuiti ta nuɓusɛiti pɛ, ti soni, ti ɗa ɠɛ ma: «È maanɛɛʋɛ è za!»
9Ɗa zoosu ɠale GALA goo wosu Ɠɔoɠɔ GALAGI laaseigi zu, è ɗa ɠɛ ma: «GALA sei ʋɛlɛi nii ɠa wolozu, eɠɛʋelei Silo gelei ɠɛni la, ta taai nii ɠa wolozu, nu la mɔ ɠɛa ná?»
10Siɛgi zu Zuda ɠundiɠiiti ti naa mɛnini da, nii é ɠɛni ɠɛɛzu, ti ɠulani masa pɛlɛi wu, ti li Ɠɔoɠɔ GALAGI zei ʋɛlɛi ma ɠoizuʋɛ. Ti zeini Ɠɔoɠɔ GALAGI zei ʋɛlɛi laaʋɛ, nii daa ga: «Ma niinɛi».
11Naazu zalaɠa ɠula nuiti ta GALA goo wo nuiti ti ɠɛni ti ma ta bɛbɛi: «Saai zoloogɛ zunui tɛi ma! Mazɔlɔɔ kpɔɛʋɛ Zeluzalɛme laalɔɠɔma, wa ɓɔɠɔi wo goomɛnigɛ ga wo-woiyeɠeiti.»
12Zelemi ɠɛni kundiɠiiti ma ta bɛbɛi: «Ɠɔoɠɔ GALAGI ɠa é tèʋegai ga gè naa wo, nii é ʋaazu ɠɛɛzu ga GALA sei ʋɛlɛi tɛi, ta taai tɛi, ti pɛ ka wo ti mɛnigai.
13Niizu, à wo-ziɛ ʋeleiti maavalibo, wo ziɛ é zoloo faa ʋagɔi ma, wo woilo naa ma, nii Ɠɔoɠɔ GALAGI wa-ƓALAGI bosu. Naazu é la maanɔɠɔi leʋega wo ma, nii é boni.
14Nɔ̀un tetegi, nà wa-zobogi wu, wa naa ɠɛ ga ze, nii pagai ta sɔlegai wo ɠaazu.
15Kɛlɛ kɛni wo ɠɛ suɠwɛɛ ga wa pàana, ma ɠasɔi ɠa la wo unma, wa-o, taai tɛi-yo, nii é ga sɔbalala nui ʋaa vai, mazɔlɔɔ gaamai zu, Ɠɔoɠɔ GALAGI ɠa é tèʋegai wo ma, ga gè niima vaiti pɛ bo wo ma.»
16Naazu kundiɠiiti ta bɛbɛi ti ɠɛni zalaɠa ɠula nuiti ta GALA goo wo nuiti ma: «Zunui tɛi maa la nɛɛni é ʋa za, mazɔlɔɔ Ɠɔoɠɔ GALAGI ada-ƓALAGI laaseigi zu ɠa kpɔɛai na ade ʋɔ.»
17Zou ɠɛwolai tanigaani ti wuzeɠeni, ti ɓɔɛ bɛbɛi ʋɔ gaalɛɛni ba, ti ɠɛ ma:
18«Zuda masagi Ezekiase ná-siɛgi zu, Molesɛte nui Misé ɠɛni GALA gooi wosu, é nii woni Zuda nuɓusɛiti pɛ ma ga: ‹Ɠɔoɠɔ GALAGI, Fai-Pɛ-Maliɠii wooi ɠaa:
19Zuda masagi Ezekiase ta Zuda nuiti pɛ ti GALA goo wo nui Misé ʋaani nɛi ɓaa? Ti la ɠɛni luani Ɠɔoɠɔ GALAGI ʋa ɓaa? Ti wooɠulani ma, tama Ɠɔoɠɔ GALAGI zeɠeni devei ʋolu, é boni ga é ʋa ga maanɔɠɔi ti ʋɔ. Adea ma, da zunui nii ʋaana, da ɲamaba vaa ma ɠasɔ la ɓɔɠɔ unma!»
20Naama ziɛgi zu, GALA goo wo nui taɠili ge ɠɛni ɓɔɛzu Ɠɔoɠɔ GALAGI laaseigi zu. Daa ɠɛni ga Uli, Semaya ná-doun zunui. É ɠɛni ga Kiliyate-Yeyalime nu. É ɠɛni kɛɛzu ga Zelemi ɠɛʋele, é ɗa GALA gooi wo Zeluzalɛme taai laalɔɠɔma, ta Zuda yooi.
21Masagi Yeɠoyakime ta ná-kɔɔɠuluɓaiti, ta ná-kundiɠiiti ti naama wooiti mɛnini nii Uli boni. Naazu masagi ɠɛni pɔ é paa. Kɛlɛ Uli loai ma ga naa, é luani, é ʋela, é li Ezipete yooi zu.
22Masagi Yeɠoyakime Akaɓɔɔl ná-doun zunui Ɛlɛnatan leʋeni Ezipete yooi zu, ta zunui tanigaani.
23Ti Uli ɠulani Ezipete yooi ʋa, ti ʋaa la masagi Yeɠoyakime ʋɔ. Naa ma ge Uli ʋaa ga boɠa zɔkpɔi, é ma ʋoomai ʋili ya kiti ɠabayeɠei zu.
24Kɛlɛ Zelemi makɛga ɠɛni de, Safan ná-doun zunui Ayikame ʋɛ, é la ɠɛni kɛɛni é ʋa fe nuɓusɛiti zea, ti ʋa paa.