1Wɛlɛ keela wooi ʋa Zelemi sɔlɔɔni Ɠɔoɠɔ GALAGI ya:
2«Woilo minazeɠegi tɛi su wooiti ma, bo Zuda nuiti ma, ta Zeluzalɛme laaʋeaiti.
3Ɗa ɠɛ ti ma: ‹Ɠɔoɠɔ GALAGI, Izilayɛle ná-GALAGI wooi ɠaa: Naama nui ɠa ɠɛ ga foovoo nu nii é la woilosu minazeɠegi tɛi ma wooiti ma,
4nii gè feeni wo-mɛmɛwolani zea, voloi ná gè ti ɠulani la Ezipete yooi ʋa, abu ɓɔi zu, gè ɠɛ ti ma: À woilo naa ma, nii gè bosu wo ma, wo ziɛ ga ti pɛ, deve ʋe gè feai. Naazu wa ɠɛ ga nà-nuɓusɛiti, ta nɔ̀un, nà ɠɛ ga wa-ƓALAGI.
5Naazu nà nà-minazeɠegi zo kpe, nii gè kɛɛni wo-mɛmɛwolani bɛ, ga gè zou ve ti ya, ʋɛ nɔnɔi ta kɔin gulɔi ʋooʋaai ná, ná ɠa wo ná za.› »
6Ɠɔoɠɔ GALAGI ɠɛni mà mɔnɔ: «Zeze ga niima wooiti Zuda laa wolaiti su, ta Zeluzalɛme ga: ‹À yeezei minazeɠe gooi tɛi bu é ɠɛɛni, wo ziɛ la.
7Mazɔlɔɔ gè wo-mɛmɛwolani tɛnɛni, é zo naama voloi ma yeei gè ti ɠulani la Ezipete ʋa eyɛsu za zeeli. Ungo, gè la ɓɔlɔni ga ti lɛnɛga ga: À woilo gòo ma!
8Kɛlɛ ti la ɠɛni woiloni, ti la kidafaawu ɠɛɛni. Ti fɔɔnɛi ɠɛɛni, ɛsɛ ge ziɛ ga ɠisu vaa ɲɔi nɔ. Naa ɠa é kɛa, gè minazeɠe gooiti daazeeli, ti ʋilɛ su, nii gè ma levei veeni ti ya ga ti ziɛ la. Tama ti la soni, ti ʋa kɛ ga kɛɛwotii.› »
9Ɠɔoɠɔ GALAGI ɠɛni mà: «Yaavai ɠa Zuda nuiti ta Zeluzalɛme taaʋeaiti zɔɠɔzu.
10Ti ɠalega ma, ti ʋilɛ ti-mɛmɛwolani ta-vaaɠaazagiti polu, niiti ti ɠɛlɛni ga ti mina woilo gòo ma. Ti ɠilini gala kiligiti ba, ti ɗa ti lɛbi. Izilayɛle nuiti ta Zuda nuiti ti nà-minazeɠegi ɠoloɠoloni gè boni ti-mɛmɛwolani bɛ.»
11Naa ɠa é ba, Ɠɔoɠɔ GALAGI wooi ɠaa: «Wɛlɛ, nà ʋaazu ga maanɔɠɔi ti ʋɔ, ti la zooga ti ʋa ɠula su. Ta ɓain gòizu, gè la woiloga ti-woo ma.
12Zuda laai zu nuiti ta Zeluzalɛme taaʋeaiti ta ɠaaʋote gala kiligiti ma, ti ɠɛni zalaɠaiti kulazu ti ʋɛ, kɛlɛ kito nɔpɛ ge la ná, ga naati ti ʋa ti ɠizo, siɛgi zu maanɔɠɔi ʋaazu la.
13Zuda nuiti, ʋelei wa-laa wolaiti mɔinɗai la, ʋele ɠana wa-ɠɔɔɠɔ ganigiti mɔinɗai la! Unfe zalaɠa ɠulazuʋɛ mɔinʋɛ wo yeema, eɠɛʋelei pelei mɔinɗai la Zeluzalɛme taazuʋɛ, ungo, zalaɠa ɠulazuʋɛti kɔɔɠɔ ganigi ʋɛ é ga Ɓaale.
14«Ɗa ʋe, Zelemi, mina niima nuɓusɛiti maavaa laazeeli mà, mina fali wo, è mina maanɛɛnɛ woo laazeeli mà ta-vaa zu, mazɔlɔɔ gè la woiloga ti-woo ma pɛ, siɛgi zu ti wooɠulazu la mà, maanɔɠɔi a ʋaana.»
15«Leeni vaa zu nɛ̀ɛbɛ nui ʋaazu nà-pɛlɛi wu ga yaavai?
16Gè daasei pɛɛni ga:
17Ɠɔoɠɔ GALAGI, Fai-Pɛ-Maliɠii ɠa é è ziinni. É è maanɔɠɔ vai levea, Izilayɛle nuiti ta Zuda nuiti ta-vaa ɲɔi maaʋele ma ti kɛɛni. Mazɔlɔɔ ti ziiɠaawana vaa ɠɛɛʋɛ, ga zalaɠa ɠula vai kɔɔɠɔ ganigi ʋɛ é ga Ɓaale.
18Ɠɔoɠɔ GALAGI boni mà, gè suɠwɛɛ. Niizu nà ɠidaazu ti-ziɛ ʋeleiti bu.
19Nɔ̀un nà, gè ɠɛni eɠɛ baala ziʋoi ti liizu la paazuʋɛ, maaɠili la ɠɛni mà ga ta ɠigaiziɛzu faa zu é ʋilɛ bà. Ti ɠɛni ɠɛɛzu ma: «Ade gulu wolai tɛi pɔ, de ná-fai ɠaaɓela, é ɠula fulu nuiti ta-eteai zu, nu nɔpɛ ki ge mina ɠɛ su ga é ɠɛni etea.»
20Kɛlɛ ɗɔun ɗa, Ɠɔoɠɔ GALAGI, Fai-Pɛ-Maliɠii,
21Naa ɠa é ba, Ɠɔoɠɔ GALAGI wooi ɠaa Anatɔte nuiti daalɔɠɔma, ti pɔ ga ti è ʋaa, ti ɠɛɛzu ma: «Mina GALA goo wo Ɠɔoɠɔ GALAGI laaseigi zu, ni naa laade, ɗa za gi ya!»
22Naa ɠa é ba, Ɠɔoɠɔ GALAGI, Fai-Pɛ-Maliɠii wooi ɠaa: «Wɛlɛ! Nà wuzeɠezu ti laalɔɠɔma, nu niinɛiti ta za kɔɔi zu, pului ɗa ti-loun zunuiti ta ti-loun anzanuiti paa.
23Anatɔte nu ɠila kpalaa ge la yɛga vulua, konagi gè wuzeɠezu la ti laalɔɠɔma, gè kpɔlɔi ɠaaleʋe ti laalɔɠɔma.»