1Siɛgi zu Yesu ɓeni la ga naama wooiti bo, é ɠaazulɛɛni geeɠɔlɔgi zu ʋele, é ɠɛ ma: «Kɛ̀ɛ, yeeɠɛɠalai zeelia. È-Loun Zunui ná-lɛbiyai ɠulana kɛlɛma, nii a kɛ è-Loun Zunui ɓalaa ɗa-lɛbiyai ɠula kɛlɛma.
2Tɔɔzei è zobogi veeʋɛ zea nuɓusɛi pɛ ma, nii a kɛ é ɠɔoɠɔ zɛnvui ve naati bɛ, niiti è ti vea zea.
3Tama ɠɔoɠɔ zɛnvui naa ɠa, ga ti è ɠwɛɛ, ɗɛi ɗa ɠila kpe è ga GALA kiteɠitegi, ta ti naama nui ɓalaa kwɛɛ, nii è teʋegai, Yesu Kilista ya.
4Gè ɗa-lɛbiyai lɛa zooi ma, botii nii è feai zèa ga gè kɛ, gè naa ɠaaɓelaga.
5Ɗa ɓalaagi Kɛ̀ɛ, lɛbiyai nii é ɠɛni zèa è ɠobaʋɛ, aisa eteai ʋa ɠula, nà-lɛbiyai naa ɠulana kɛlɛma niina è ɠobaʋɛ.»
6«Gè è lɛa ga naama nuiti, niiti è ti veai zèa, è ti ɠula eteai zu nuiti saama. Ti ɠɛa ga ɗɔnɔiti, ɗa ma, è ti ve zèa. Ti makɛgɛ è-laawooi ma.
7Ti kwɛni niina ga nii pɛ è fea zèa, ti pɛ seɠeʋɛ ɗa nɔ è ʋɔ bɛ.
8Keela wooi nii è feai zèa, gè naa laazeelia ti ma, tama ti yeezei bu. Gaamazu, ti kwɛɛgɛ ga sèɠeʋɛ è ʋɔ bɛ, gè ʋa, ti la da ɓalaa ga ɗa ɠa è tèʋegai.
9Tiya ɠa gè è maanɛɛnɛzu ti ʋɛ. Gè la è maanɛɛnɛzu eteai ʋɛ, kɛlɛ naati bɛ è ti veai zèa, tɔɔzei ta ga ɗɔnɔiti.
10Mazɔlɔɔ nii nɔpɛ é ga nɔ̀nɔ, naa ɠa ga ɗɔnɔ, nii ma é ga ɗɔnɔi, naa ɠa ga nɔ̀nɔi. Nà-lɛbiyai ɠa ɠulazu kɛlɛma ga ti maaʋele.
11Ná tago nɔ ʋe niina, gè la mɔ ɠɛɛzu eteai zu, tɔɔzei nà ga ʋa è ʋɔ bɛ, kɛlɛ tiya ma, ta yɛsu eteai zu. Kɛ̀ɛ, ɗɛigi è ɲadegai, ti makɛ ga è-laaseigi ná-zobogi, daaseigi nii è feai zèa, nii a kɛ ti ɠili ʋa, ti ɠɛ ga ani ɠila, eɠɛʋelei de la.
12Yeeɠɛɠalai pɛ gè kɛai ti ʋa, gè ɠɛa ti makɛsu è-laaseigi ná-zobogi zu, daaseigi nii è feai zèa. Kpàaʋɛ ti maazu, ti tanɔpɛ ge la looni ya, kɛni zunui nii undaaʋiligi leveai ma, nii a kɛ GALA Sɛʋɛi zu wooi ʋilɛ su.
13«Niima ziɛgi zu, nà ga ɠale ma è ʋɔ bɛ, kɛlɛ nà niima wooiti pɛ bosu siɛgi zu gè la dɛ eteai zu, nii a kɛ nà-koozunɛɛi ɠɛ ti-yiimaʋɛti, koozunɛɛi nii gaavɔnigai.
14Gè è-laawooi vea ti ya, naa ɠɛa ga zaɓu eteai ti wɔinzeɠe, tɔɔzei ti la ga eteai nɔnɔ, eɠɛʋelei nɔ nà ɓalaa gè la ga eteai nɔnɔ la.
15Gè la è maanɛɛnɛzu ga è ti ɠula eteai zu, kɛlɛ è ɓaa ti maazu Inɛgi laalɔɠɔma.
16Ti la ga eteai nɔnɔ, eɠɛʋelei nɔ nà ɓalaa gè la ga eteai nɔnɔ la.
17Ti zeɠe ga ɗɔnɔ ɲɛgɛlɛin ga gaamai maaʋele, è-laawooi ma ka é ga gaamai.
18Eɠɛʋelei è tèʋegai la eteai zu, ʋele nɔ ɠana nà ɓalaa gè ti leʋegai la eteai zu.
19Tama nɔ̀un gè ɓɔɠɔ vea è ya ta-vaa zu, nii a kɛ tiya ɓalaagi ti ɓɔɠɔ ve è ya ga gaamai.»
20«Tiya ɠila nɔ lɛi gè ʋa ɠɛ è maanɛɛnɛzu ti ʋɛ, kɛlɛ nà è maanɛɛnɛzu naati pɛ bɛ, ti ʋaazu ɠidaaleʋezu mà ta-zeele wooi maaʋele ma.
21Nà è maanɛɛnɛzu, Kɛ̀ɛ, va bu ti ɠɛ ga ani ɠila. Kɛ̀ɛ, ʋelei è ɠiliai la bà, ta ʋelei nà ɓalaa gìliai la è ʋa, va bu ti ɠɛ ga ani ɠila ɠana, ti ɠili de ʋa, nii a kɛ eteai la da ga ɗa ɠa è tèʋegai.
22Lɛbiyai nii è feai zèa, gè naa vea ti ya, naa ɠa a kɛ ti ɠɛ ga ani ɠila, eɠɛʋelei de la ga ani ɠila, de felegɔ.
23Nɔ̀un gè ɠili ti ʋa, ɗa ɓalaagi è ɠili bà, naa ɠa a kɛ ti ɓɔsu, ti ɠɛ ga ani ɠila kpe nii gaavɔnigai, eteai zoo é kwɛɛ naa maaʋele ma ga ɗa ɠa è tèʋegai, naa ʋoluma è niiti nɛɛʋɛ ʋɛ, eɠɛʋelei è nɛ̀ai la ʋɛ.
24«Kɛ̀ɛ, nà pɔ ʋɛ gè ná, niiti è ti vea zèa, naati ɓalaa ti ɠɛ bà ná, naa ɠa a kɛ ti naama lɛbiyai ɠaa, lɛbiyai nii è feai zèa, mazɔlɔɔ è nɛ̀ɛni ʋɛ, aisa eteai ʋa ɓɛtɛ.
25Kɛ̀ɛ, ɗɛigi è lelebogai, eteai la è ɠwɛɛni pɛ, kɛlɛ nɔ̀un gè è ɠwɛɛ. Tama nii tɛiti ti gaaɠaa niina ga ɗa ɠa è tèʋegai.
26Gè è lɛa ga tiye, nà ma, nà yɛsu è lɛɛzu ga tiye, nii a kɛ nɛɛbɛi nii è dɛa ga ze, naama nɛɛbɛi ɠɛ ti-yiimaʋɛti, nà ɓɔɠɔi ɓalaa gè ɠili ti ʋa.»