1Yeeta mɔnɔ, GALA ná-geezuɠeelaiti ti ʋaani, ti lo Ɠɔoɠɔ GALAGI ɠaazu maaɓɔgi zu. Setana ʋaani tɔ ɓalaa ti zaama, é lo Ɠɔoɠɔ GALAGI ɠaazu maaɓɔgi zu.
2Ɠɔoɠɔ GALAGI ɠɛni Setana ma: «Ɗa zeɠezu mini?» Naa gooɠaaʋoteni, é ɠɛ ma: «Gè ɠɛa eteai zuɓizɛzu, gè ɗa ziɛziɛ.»
3Ɠɔoɠɔ GALAGI ɠɛni ma: «È nà-botiɠɛ nui Zɔɓe zumɔni nɛi? Nu nɔpɛ ge la ga tɔun kɛʋele eteai zu, zunu ʋe peelalazu la ba, é zɔle, zunu ʋe é luazu GALA ba, é ɗa maaɠooza faa ɲɔi ɠɛɛ vai ʋa. Toɠa loni kpaan ná-telebodai zu. È dìiʋɛ koloɠolo fai ma nɔ wafuun.»
4Setana gooɠaaʋoteni, é ɠɛ ma: «Falibo ka fai kpein ba, nui ɠa ɠɛlɛ zeaɠɔligi kpein ba, zɛnvui ɠizo fai zu.
5Kɛlɛ yeevɔɔɠu lɛɛ kpusɛi ʋa, ma zuai ta ma ɠaeiti, ɗa pɛtɛ ni é la è ɠotoni gaamanɔ.»
6Ɠɔoɠɔ GALAGI ɠɛni Setana ma: «Toɠa ɗa-zobogi wu, kɛlɛ makɛ zɛnvui ma.»
7Názu ɠa Setana zeɠeni la Ɠɔoɠɔ GALAGI ʋɔ bɛ. É divolo seeɓɛ ɲɔi ʋɛɛ Zɔɓe ʋa, é zo kɔɠɔaʋɛ, é lɛ nɔungi zu.
8Zɔɓe zeini zuʋu ziɠigi zaama, é diɠi zaɠai ta zeɠeni, é ɗa ɓɔɠɔ maawɔin da.
9Anzai ɠɛni ma: «Ɗa loni nɔ kpaan ɗa-lelebodai zu! GALA koto mu, è za!»
10Kɛlɛ é ɠɛni naa ma: «Ɗa ɓɔɛzu eɠɛ anzanui nii ɠi ge la ma. Da yeezeizu undaanɛɛi wu ga GALA ná-vebɛanii, lee vaa zu da ɠɛlɛ maanɔɠɔi ʋa?»
11Zɔɓe bɔɔla saʋagɔiti ti naama maanɔɠɔ vai kpein mɛnini, nii é zeelini ma. Ti zeɠeni ta-yooiti su ti ɠilagilagi, tiya ɠa ti ga: Elifaze nii é ga Teman nui, ta Ɓilidade nii é ga Suɠa nui, ta Sofaal Naama nui. Ti deveni ga ti li ti laali ma, ti ziilaa.
12Siɛgi zu ti ɠɛni la ɠoozama, ti ka, ti la ɠɛni ɠwɛɛsu ɠaani ba. Ti wɔlɔni, ti ɗa wola zɔngɔ, ti ta-zeɠe wolaiti baliʋali ga kidaaʋiligi maaʋele ma, ti fufiligi lɛ geezu, é vaza ti unma.
13Ti zeini koba zooi ma, eyɛsu folo lɔfela, kpidi lɔfela. Nu nɔpɛ ge la woo ɲɛ gila kpalaa boni ma, mazɔlɔɔ ti kwɛɛni kpezekele ʋelei ná-kpɔlɔi wɔɔlɔni la.