1Naa ɠa é ba, nɛ̀ɛɲɔɠɔiti, à lo kpaan wa-ɠilibalai zu wa Maliɠii. Kɛ̀ɛleaiti, wɔiti gè wo nɛai ʋɛ, wɔin ɠa mà gola ga gè ɠaazula wo ma, wɔi wa ɗa gòla ɠoozunɛ, nà ɗa ɓakimaalɛ ga woye.
2Nà Evodi ta Sɛntike maanɛɛnɛzu ga ti zoloo su ta-ɠilibalai zu ta Maliɠii.
3Ɗa ɓalaa, bɔ̀ɔlai, è ga wooɠɛɠila nui, nà bosu è ma ga è ɓɔ ti ʋa, mazɔlɔɔ gá anzanui naati ka, gi ɲɛpii ɠɔɔni ʋɔɔma, Woo Niinɛ Ʋagɔi ma vaa zu, gá Kilemanni, ta gá-wotiɠɛɲɔɠɔi zɔiti, naati daaseigi ɠa zɛnvu zɛʋɛi zu.
4À ɠoozunɛ yeenɔpɛ wo ɠili vai zu Maliɠii ʋa. Nà bosu ʋolu, à ɠoozunɛ!
5À wo luʋa ʋele ʋagɔi lɛ ga ɛsɛ pɛ. Maliɠii maaɓuɠaa.
6À mina yiizoolɛ ga faa nɔpɛ, kɛlɛ fai pɛ su, à wo-maavaiti dɛɛ ga GALA, falii ta maanɛɛnɛiti su, naa ʋɛɛ mamagiti ba.
7GALA ná-ziilɛigi, kpudɛai nuɓusɛi ná-faaɠaaɠai pɛ maazu, naa ɠa wo-yiiti ta wa-ɠisiɛiti makɛ, wa-ɠilibalai zu wa Yesu Kilista.
8Kɛ̀ɛleaiti, gaaɓelagi ɠa ga: Fai pɛ é ga gaama, fai pɛ ɓaalamai su, fai pɛ sɔlegai, fai pɛ ɲadegai, fai pɛ a nu ɛnɛkɛ, fai pɛ lɔɠɔ ʋagɔi ba, fai pɛ nii gola ʋagai, ta fai pɛ soloogai maamusɛi ma, à ɗa ɠisiɛ naati su.
9Nii wo kalaga zèa, wo mɛni, wo gòomɛni, gè ɗa bo, wo ka gè ɗa kɛ, à ziɛ ga naa. Ziilɛi fee ƓALAGI ɠa ɠɛ wo ʋa.
10Nà wola ɠoozunɛɛzu gá-ɠilibalai maaʋele ma gá Maliɠii, mazɔlɔɔ wo ɠizɛga sù ga niinɛ mɔnɔ. Gè la bosu ga wo ɠɛa na yeemani mà, ma zobogi ɠa é la ɠɛa dɛ wo ya.
11Màavaiti kɛɛ vai laade, gè ʋa ɠɛ nii wosu da, mazɔlɔɔ gè naa maaɠɔliʋɛ ga ʋelei nɔpɛ gè ɓɔɠɔ ɠaazu la, naa ɛ̀nɛkɛ.
12Sòogɛ zeizu zeaɲakalai zu, anii pɛ gaa ɠa vɔnina zèa, sòogɛ naama zei wosu. Sòogɛ ti pɛ da, mini-o-mini, daamianigi a mɔinna zèa, ɓaa pului a ɠɛna mà, anii a ʋooʋana zèa, ɓaa anii maa ɠa lɔina zèa.
13Nà zoo fai pɛ da, ga Kilista maaʋele, nii é sɛ̀bɛlɔɔzu.
14Anɛɛ naa ʋe, wo kɛɛʋɛ ga pagɔ, wo ɓɔ bà nà-kpɔlɔiti su.
15Wɔiti wo ga Filipe nuiti, wo naa zuɠwɛɛ ga pagɔ, Woo Niinɛ Ʋagɔi laazeeli ziɛgi zu, siɛgi zu gè zeɠeni la Masedoane, é ɠula wa ɠila kpe wo ʋolu, Egilisi nɔpɛ ge la ɓɔni bà, fee vai ɓaa sɔlɔɔ fai zu.
16Mazɔlɔɔ wo ani leʋeni mà Tesalonike, ná zeizu mɔin, nii ga kpɛ̀dɛma vaiti kɛɛ la.
17Aniiti wo ti veezu bɛ̀, naati gaiziɛ vaa laade, kɛlɛ nii gè pɔ, naa ɠa ga tɔnɔgi ta ɓɛtɛ wo ʋɛ.
18Nà bosu wo ma niima zɛʋɛi zu, ga gè wa-vebɛaniiti pɛ sɔlɔɔni, é ʋooʋa ma. Epafolodite ʋaani pɔ̀ ga wa-vebɛaniiti, nii kpein kpɛ̀dɛi ɠɛni ba, naa pɛ ka niina zèa. Wa-vebɛaniiti kɛɛʋɛ eɠɛ zalaɠai nii makugi nɛai, zalaɠai GALA ge yeezeizu bu, nii nɛai bɛ.
19Nà-GALAGI ɠa wo-maavaiti pɛ kɛ, eɠɛʋelei ná-kpɛtɛi wola maanɛai la, ga Yesu Kilista maaʋele.
20Lɛbiyai ɠɛ ade-Ɠɛɛ GALA bɛ, eyɛsu ɠɔ. Amina!
21À GALA ná-nuiti pɛ tuʋɔ, ti ɠiliai Yesu Kilista ʋa. Ade-ɠɛɛleaiti ti bà ʋɛ, ti pɛ ta wo luʋɔsu.
22GALA ná-nuiti ti ʋɛ, ta wo luʋɔsu, ma un ge daa ma mɛɛ ga masa golai Sezaal ná-pɛlɛ wu geleiti.
23Ade-Maliɠii Yesu Kilista ná-zaalai yɛ wo ʋa.