Filemɔn 1 — GALA Daawoo Zɛʋɛi | Bíblia online

¹Nɛ̀i gè ga Pɔle, nà ga kasoɠa nu, botii maaʋele ma gè kɛa Yesu Kilista ʋɛ, gá ade-ɠɛɛloin Timɔte, gá è luʋɔsu, Filemɔn, gi-nɛɛɲɔɠɔi, adɛi de botii ɠɛɛzu ʋɔɔma,

²wa Apia ade-ʋaazeelai, ta Aalisipe, ada nii de kɔɔi ɠɔɔzu ʋɔɔma, ta Egilisii é gaalɛbai wosu ɗa-ʋɛlɛi wu.

³Ade-Ɠɛɛ GALA ta de-Maliɠii Yesu Kilista ti zaalai la wo ma, ti ziilɛigi ve wo ʋɛ.

⁴Nà nà-GALAGI mamasu ɠɔ, gè ɗa ɠizɛ è zu nà-GALA falii zu,

⁵mazɔlɔɔ nà ɗa-ɠidaaleʋe vai mɛnisu é lo Maliɠii Yesu ʋa, ta ɗa-nɛɛbɛi é lo GALA ná-nuiti pɛ ba.

⁶Nà GALA falizu ga kpɔfaamai é ade ɠiliai ʋa ɗa-ɠidaaleʋei maaʋele ma, naa ɠula kɛlɛma ga kɛɛwotii. Nii a kɛ faa ʋagɔi kpein gá ɠɛ è liini kɛɛ vai ma Kilista ná-faa ma, naa ɠula kɛlɛma.

⁷Kɛ̀ɛloun, ɗa-nɛɛbɛi gòla ɠoozunɛa, é ìɲɔdɔ, mazɔlɔɔ è GALA ná-nuiti ziilaaʋɛ.

⁸Naa ɠa é ba, anɛɛ ni Kilista maaʋele ma, zobogi pɛ ka zèa, nii maanɛai è kɛ, gè è leve ma,

⁹fizɔgɛ gè è maanɛɛnɛ nɛɛbɛi maaʋele ma, ʋelei gè la, nà Pɔle, kɛwola wɔlɔi, é ɓudɛ naa maazu, niizu nɛ̀i gè kasoi ɠa, Yesu Kilista ná-faa zu.

¹⁰Nà è maanɛɛnɛzu dòin Wonezime ná-faa zu, nii zɛ̀gai kasoi ɠa ʋɛ, gè ɠɛ ga kɛɛɠɛ zɛnvui zu.

¹¹Mɔungi zu, tosu la ɠɛni ba è ʋɛ, kɛlɛ niizu toɠa è maavaa ɠɛ1:11 maavaa ɠɛ: Wonezime laaseigi ʋoluʋɛ ɠa ga maavaa ɠɛ nui. niina, é nà ɓalaagi màavaa ɠɛ.

¹²Nà teʋesu è ma ʋolu, tɔun, toɠa niina eɠɛ zìi ɓɔɔɓɔgi.

¹³A la nɛɛ bɛ̀ ga gè makɛ ɠobaʋɛ, siɛgi zu gè kasoi ɠa la Woo Niinɛ Ʋagɔi ma vaa zu, é ɗa botii ɠɛ bɛ̀ è-ʋotogi zu.

¹⁴Kɛlɛ gè la kɛɛni gè ʋa naa ɠɛ, ni è la vaani bu, naa ɠa a kɛ ɗa-vaaɓɔɠɔi mina ɠɛ ga maaɓaa vaa, kɛlɛ kɛni é ɠɛ ga è-yiimai.

¹⁵Tanisu Wonezime ɓe ge leʋeni è ʋa, é ɠɛ ga yeeɠɛɠala go, nii a kɛ è sɔlɔɔ ya, é yɛ è ya eyɛsu ɠɔ.

¹⁶Mazɔlɔɔ é la mɔ ga duɔ ɲaka nɔ, kɛlɛ toɠa niina ga nui fizɔgai duɔi ʋa, é ɠɛ è ʋɛ, eɠɛ ɠɛɛɠɛloin nii gola nɛai è ʋɛ. Nɛɛʋɛ bɛ̀ gola, kɛlɛ maanɛɛʋɛ é nɛɛ è ʋɛ mɔnɔ gola, é leʋe duɔi ʋa, é ɠɛ ga è-ɠɛɛloin Maliɠii maaʋele ma.

¹⁷Naa ɠa é ba, ni deɠɛmu ɗa sèɠezu ga è-wɔɔlai, yeezei bu, eɠɛʋelei ɗa yeezei la bù.

¹⁸Ni a ɠɛna faa ɠɛɛni ga ɗe, ɓaa ni ɗa-ɠuye ɠa ma, naa leve nɔ̀un unma.

¹⁹Nà Pɔle, nà ɓɔɠɔi zèeʋogi ɠa gè nii zɛʋɛzu la: Nà sala è ma. Gè la naa wosu è ma ga tɛi nà-kuyei ɠa é è ma, ɗa ɓɔɠɔi ɗa ga nɔ̀nɔ.

²⁰Ungo, kɛ̀ɛloun, niima vaaɓɔɠɔi ɠɛ bɛ̀ da-ɠilibalai maaʋele ma da Maliɠii, è zìila da-ɠilibalai maaʋele ma da Kilista.

²¹Nà niima zɛʋɛi ɠɛɛzu è ma ladalai zu, ga nii gè bosu è ma, ɗa ʋaazu kɛɛzu é ɓudɛ naa maazu.

²²Naa pɛ poluma, pɛlɛ ɠɛʋele ɓɛtɛ bɛ̀, ʋɛ nà ɠɛ ɲiizu ná, mazɔlɔɔ dàaʋɛ da ga, wa-ƓALA faliiti maaʋele ma, nà ma zobo sɔlɔɔsu, gè ʋaa wo ʋɔ bɛ.

²³Epafelase, gi kasoi ɠa ʋɛ, Yesu Kilista ná-faa zu, toɠa è luʋɔsu,

²⁴ta Maleke ɓalaagi, ta Alisitaake, ta Demase, ta Luke, gɛiti gi botii ɠɛɛzu ʋɔɔma.

²⁵Maliɠii Yesu Kilista ná-zaalai yɛ wo ʋa.