1Ɠɔoɠɔ GALAGI ɓɔɛni pɔ̀, é ɠɛ mà:
2«Ɗa ʋe, zunui, leezɛn ansaɠɔgi losuʋɛ wɔɔlɔʋɛ zɔɔma wulu ɠiligiti ba ɓaa? Ma ɓekegiti fizɔgɛ dɔɓɔzu wului zɔiti tɔnɔiti ba ɓaa?
3Nu ɠa zoo nɛi è ma wului ta zeɠe, è kpɛtɛ ga ani? Nu ɠa zoo nɛi è ta ɓɛtɛ ga kalagi, ani a zoo zɛlɛsu ga?
4Pagɛ nɔ ga é ɠɛ ga abui ɠɔnɔgi. Siɛgi zu abui ɓesu la ga gaaɓelazuʋɛ felegɔiti gala, zaamazuʋɛ ɓɔɠɔi mu abui zogi miná ʋa, toɠa zoo ɠɛɛzu ga ani mɔnɔ ɓaa?
5Pɛtɛ, siɛgi zu faa la ɠɛa ba la dɛ, nu la ɠɛa ɓɛdɛzu ma, tɔun abui a galana, é koloɠolo, nu ɓɛdɛ ɠa ɠɛ ba nɛi ga è faa ɠɛ la?
6«Deɠɛmu, Maliɠii Ɠɔoɠɔ GALAGI wooi ɠaa: ‹Gè leezɛn ansaɠɔgi ʋili abui zu, naa vizɔgɛ dɔɓɔzu wulu ɠiligiti pili fai ʋa abui zu, zekana nà Zeluzalɛme nuiti pili da abui zu.
7Nà wuzeɠezu ti laalɔɠɔma, ta kaazu ga ti ʋela abui ʋa, kɛlɛ abui taɠili ka ti ɠoloɠolo. Wa suɠwɛɛ naazu ga nà ɠa gè ga Ɠɔoɠɔ GALAGI, siɛgi zu gè wuzeɠezu la ti laalɔɠɔma.
8Nà ta-yooi zu ɠɛɛzu ga teʋebai zu, tɔɔzei ti lɔɔni wooveledai zu,› » Maliɠii Ɠɔoɠɔ GALAGI wooi ɠana.