1Pɛlɛyeɠe ɠundiɠiiti daaseigiti kaa, niiti gi lɛɛni ʋɔɔma ga tiye, gi zeɠe Ɓaɓilɔne, gi li Zeluzalɛme, masagi Aaletazɛɛlesɛse ná-siɛgi zu.
2Fineyase mavofodaiti: Gɛɛlɛsome.
3Sekania ta Paleyɔse ti-mavofodaiti: Zakali, nii é ɠɛni nu ungila nu ʋuulɔɔlu (150) unda.
4Paɠate-Moaɓe mavofodaiti: Eliyɔyenayi, Zelayia ná-doun zunui, nii é ɠɛni nu unfelegɔ (200) unda.
5Zatu mavofodaiti: Sekania, Yaɠaziyɛle ná-doun zunui, nii é ɠɛni nu unsaʋagɔ (300) unda.
6Adin mavofodaiti: Eɓɛde, Zonatan ná-doun zunui, nii é ɠɛni nu ʋuulɔɔlugɔ (50) unda.
7Elame mavofodaiti: Ezayi, Atalia ná-doun zunui, nii é ɠɛni nu ʋuulɔfela (70) unda.
8Sefatia mavofodaiti: Zeɓadia, Mikayɛle ná-doun zunui, nii é ɠɛni nu ʋuulɔsaʋa (80) unda.
9Zoaɓe mavofodaiti: Aɓediyase, Yeɠiyɛle ná-doun zunui, nii é ɠɛni nu unfelegɔ nu puugɔ maazu lɔsaʋa (218) unda.
10Selomite mavofodaiti: Yosifiya ná-doun zunui, nii é ɠɛni nu ungila nu ʋuulɔzita (160) unda.
11Ɓeɓayi mavofodaiti: Zakali, Ɓeɓayi ná-doun zunui, nii é ɠɛni nu ʋuufelegɔ maazu lɔsaʋa (28) unda.
12Azagade mavofodaiti: Yoɠanan, Ɠakatan ná-doun zunui, nii é ɠɛni nu ungila nu puugɔ (110) unda.
13Adonikame mavofodaiti: gaaɓelagiti niiti ti-laaseigiti ti ɠɛni ga Elifelɛte, Yeiyɛle, ta Semaya, naati ti ɠɛni nu ʋuulɔzita (60) unda.
14Ɓigivayi mavofodaiti: Utayi ta Zakuul, niiti ti ɠɛni nu ʋuulɔfela (70) unda.
15Gè niima nuiti kpein gaalɛɛni ba ziɛ wolai ɠobaʋɛ, nii é yeizu ga Aɠava ʋele, gi yɛni miná folo saʋagɔ laawu. Gè wɛlɛni nuɓusɛiti saama ta zalaɠa ɠula nuiti, gè la Levi nu nɔpɛ kaani ti zu.
16Názu ɠa gè kundiɠii niiti tolini la: Eliyezɛɛl, Aliyɛle, Semaya, Ɛlɛnatan, Yaliɓe, Natan, Zakali, ta Mesulame, naa ʋɛɛ tɔ kalamɔn felegɔiti ba Yoyaliɓe ta Ɛlɛnatan.
17Gè valini ti ma ga ti li Kasifia ɠundiɠii Ido ʋɔ bɛ, gè wooi ʋu ti-la, nii ta bo Ido ma, ta kɛɛɠɛlointi pɛ, GALA sei ʋɛlɛi wu wotiɠɛ nuiti niiti ti Kasifia, ga ti kpɔba nuiti teʋe gi ma, gá-ƓALAGI zei ʋɛlɛi vai zu.
18Tɛi gá-ƓALAGI ma ge ɠɛni gi ʋa, é ɗa gi ɠaazumaawɔinɠa, ti Seleɓia leʋeni gi ma, nu ɠɛni de ɠigi ma, Maali ná-bolodai zu, Levi mavofodai zu, Izilayɛle ná-doun zunui, ti nu puugɔ maazu lɔsaʋa (18) ʋɛɛni ba kɛɛɠɛlointi saama, ta ná-doun zunuiti,
19é ʋɛɛ Ɠasaɓiya ta Ezayi ʋa, ti ɠɛ Melali mavofodaiti, ta kɛɛɠɛlointi, é ʋɛɛ ti-loun zunuiti ba, ti pɛ kpɔga ɠɛni ga nu ʋuufelegɔ (20).
20Ti ʋaani ɓalaa ga nu unfelegɔ nu ʋuufelegɔ (220), niiti Davide ta pɛlɛyeɠe ɠundiɠiiti ti yeeloni ti pɛ ba ga ti-laaseigiti, ti ti ve Levi nuiti zea, ga ti ɗa botii ɠɛ GALA sei ʋɛlɛi wu.
21Gi yɛni miná ziɛ wolai ɠobaʋɛ, nii é yeizu ga Aɠava ʋele, gè deve ga gi zugi zo, naa ɠɛ ga gá-ɓɔɠɔmaayeii ma ʋoogi gá-ƓALAGI ʋɛ, nii a kɛ gi siɛ ʋagɔ wo ziilɛigi zu, gá gá-ʋɛlɛyeɠeiti, ta gi-ɠɔligiti.
22Nà la ɠɛɛna masagi ma, é salaʋusuiti ta soo ɓizɛ zalaʋusuiti fe, ti gi makɛ gi zili nuiti daalɔɠɔma, naa ɠɛni ɠɛɛzu ga unfe faa zèa, tɔɔzei gi dɛɛni la ga, gá-ƓALAGI ɠa ɗa naati makɛ, niiti ti bɛ ga wooɠɛɠila nuiti, kɛlɛ toɠa ɗa yiiɠaawana gola naati ma, ti ɠɛlɛzu tɔun ba.
23Naa maaʋele ma, gi zugi zoni, gi gá-ƓALAGI maanɛɛnɛni ga é ɓaa gi maazu, tama é gi wooɠaaʋoteni.
24Naa ʋoluma gè zalaɠa ɠula ɠundiɠi puugɔ maazu felegɔ (12) lolini, ta Seleɓia, naa ʋɛɛ Ɠasaɓiya ʋa, ta ti-ɠɛɛloun puugɔ.
25Gè walii ta zanugi ɠɔɠɔni, gè pɛɛ sɔɔla ɓiigiti kpein ba niiti masagi ta ná-tɛnɛbo nuiti, naa ʋɛɛ ná-botiɠɛ nu wolaiti ba, ta Izilayɛle nuiti ti ná-zooi zu, ti kpɔni ba gá-ƓALAGI zei ʋɛlɛi vai zu, gè fe ti ya.
26Gè kilo waaʋuufelegɔ (20.000) veeni ti ya ga walii, gè kilo waasaʋagɔ (3.000) ve ti ya ga ani ɓiigiti ti ɓɛtɛai ga walii, gè kilo waasaʋagɔ (3.000) ve ti ya ga zanugi,
27gè zanu ɗaawɔ ʋuufelegɔ (20) ve ti ya, nii a la zeeli zanu kae waagila (1.000) su, ta kɔlu ɓɔi aniɲaka ʋapa felegɔ, ti ʋagai ga zanugi ɠɛʋele.
28Gè ɠɛni ti ma: «Ʋelei wo veai la Ɠɔoɠɔ GALAGI ʋɛ, ʋele ɠana niima zɔɔlaiti feai la. Walii ta zanugi ta ga vebɛaniiti, niiti ti ve Ɠɔoɠɔ GALAGI ʋɛ, wo-mɛmɛwolani ta-ƓALAGI.
29À ɓaa ti maazu ga pagɔ, eyɛsu wo zeeli Zeluzalɛme, názu wa ti pɛ gaalu niina, wo ti ve zalaɠa ɠula ɠundiɠi wolaiti zea, ta Levi nuiti, é ʋɛɛ pɛlɛyeɠe ɠundiɠiiti ba, wo ti ʋu Ɠɔoɠɔ GALAGI zei ʋɛlɛi ma ʋɛɛbagoiti bu.»
30Zalaɠa ɠula nuiti ta Levi nuiti ti walii ta zanugiti seɠeni, é ʋɛɛ sɔɔlai zɔiti ba, ti li ga tiye Zeluzalɛme, gá-ƓALAGI zei ʋɛlɛi wu.
31Alu mɔungi ma volo puugɔ maazu felegɔi (12) ma, gi zeɠeni ziɛ wolai ɠobaʋɛ, nii é yeizu ga Aɠava ʋele, gi li Zeluzalɛme. Eyɛsu gi zeeli, gá-ƓALAGI yeeyɛni gi ʋa, é ɗa ɓaa gi maazu gi zili nuiti ta toosu nuiti daalɔɠɔma, niiti ti ɠɛni gi maaluazu.
32Gi zeeliai ma Zeluzalɛme, gi looɠoni folo saʋagɔ laawu.
33Foloi naanisiɛi, gi walii, ta zanugi, ta sɔɔla ɓiigiti gaaluni gá-ƓALAGI zei ʋɛlɛi wu, gi ti ve zalaɠa ɠula nui Melemɔte ya, Ilii ná-doun zunui, ta Fineyase ná-doun zunui Eleazaal. Levi nui niiti ti ɠɛni ti ɠoba, ti-laaseigiti kaa: Zozuwe ná-doun zunui Yozaɓade, ta Ɓinuwi ná-doun zunui Noadia.
34Ti gaaluni, é ɠɔɠɔ, buɲɛgi ɓɔgai pɛ ge zɛʋɛni sɛʋɛi zu.
35Niiti kpein ti duɔlai ɠɛɛni, ti ɠale ma, naati ti zalaɠaiti kulani Izilayɛle ná-GALAGI ʋɛ ga: nikɛ zinɛ puugɔ maazu felegɔ (12), Izilayɛle nuiti kpein bɛ. Ti baala sinɛ ʋuutaaʋuugɔ maazu lɔzita (96), ta baala ziʋo ʋuulɔfela maazu lɔfela (77) ɠulani gala zalaɠaiti faa zu, ta boli zinɛ puugɔ maazu felegɔ (12) ga koto gba zalaɠai. Togani naati kpein ti ɠalani Ɠɔoɠɔ GALAGI ʋɛ.
36Naa ʋoluma ti masagi ná-sɛʋɛi zu wooi laazeelini ná-nu wolaiti ma, ta zou zɛʋɛ ɠundiɠiiti ma, ti zeini ziɛ wolai Efelate folo liizu ʋelei. Naati ti tɔnɔ ma ɓɔbai ɠɛɛni Izilayɛle nuiti bɛ, GALA sei ʋɛlɛi lo fai zu.