Tɔ Sɛʋɛi Velesiɛi 23

¹Nu nɔpɛ ge la kɛɛɠɛ anzai tanɔpɛ seiɗa ga anza, é mina ɓaaɠula kɛɛɠɛ ma ɠana.

²Zunu nɔpɛ nii pɔlɔɠɛzɛɠain woloai, ɓaa sɛɛɠagai, naa la lɔa Ɠɔoɠɔ GALAGI ná-maaɓɔgi zu.

³Wɛɛn loun la lɔa Ɠɔoɠɔ GALAGI ná-maaɓɔgi zu, anɛɛ ti-mavofodai ʋuusiɛi ʋe, é la lɔa Ɠɔoɠɔ GALAGI ná-maaɓɔgi zu.

⁴Amɔn nuiti ta Moaɓe nuiti ti la lɔa Ɠɔoɠɔ GALAGI ná-maaɓɔgi zu, anɛɛ ti-mavofodai ʋuusiɛi ʋe, é la lɔa Ɠɔoɠɔ GALAGI ná-maaɓɔgi zu.

⁵É ɠɛ ɠana eyɛsu ɠɔ, tɔɔzei wo ɠulazuʋɛ Ezipete yooi ʋa, ti la ɠɛni ʋaani wo ʋɔ pelei zu ga ɓulu ɓaa ziɛ, kɛlɛ ti Ɓeyɔɔl ná-doun zunui Ɓalaame lɛɛni ga wo laalɔɠɔma, nii é ɠɛni Petɔɔl, Mezopotami yooi zu, ga é wo voovo.

⁶Kɛlɛ Ɠɔoɠɔ GALAGI wa-ƓALAGI la ɠɛni kɛɛni, é ʋa woilo Ɓalaame wooi ma, é foovooi latini wo ʋɛ ga tuyai, mazɔlɔɔ Ɠɔoɠɔ GALAGI wa-ƓALAGI wo nɛɛʋɛ ʋɛ.

⁷Wa-eteai pɛ su, à mina yiizoolɛ ga ta-yiilɛi faa, ɓaa ta-undaanɛ vaa.

⁸À mina Edɔme nuiti wɔinzeɠe, mazɔlɔɔ wo-ɠɛɛlointi be, à mina Ezipete nuiti wɔinzeɠe, mazɔlɔɔ wo ɠɛni ga seikɔɠɔma nuiti ta-yooi zu,

⁹doun zunuiti ti ti zɔlɔɔsu ti-mavofodai zaʋasiɛi zu, naati ta zoo ti lɔ Ɠɔoɠɔ GALAGI ná-maaɓɔgi zu.

¹⁰Siɛgi zu wo liizu la kɔɔmaʋɛ wo zili nuiti daalɔɠɔma, wa wa-ɠɔɔlaaɠai ʋuuna, à dama, wo mina faa nɔpɛ kɛ, a wo ɠɔzɔ.

¹¹Ni zunui ta a ɠɛna ná, é ɠɔzɔ tɔgi letemazu, maaɠoloɠolo kpidii, toɠa ɠula wo-ʋuuzuʋɛ ʋa, é mina lɛ ná ga foloi.

¹²Kpɔkɔ voloi, toɠa maagba, foloi a daana, toɠa zoo niina é lɔ ʋolu wo-ʋuuzuʋɛ.

¹³Wa adaʋɛ ta leʋe ba wo-ʋuuzuʋɛ ʋoluʋɛ, eteaʋɛ, miná ɠa wa ɠɛ liizu ná dɔɓɔ zu.

¹⁴Kɔɔɠɔ nui ɠilagilagi ɠa sɔɔlai ta makɛ ná-kasɔi zu, siɛgi zu maaɠalasu da, toɠa zeɠei wɔ, naa ʋolu a ɓena, é ná-kpooi maaɠulu.

¹⁵Mazɔlɔɔ Ɠɔoɠɔ GALAGI wa-ƓALAGI ɠa ziɛzu wo-ʋuuzuʋɛ, é ɗa wo makɛ, é zobogi ve wo ʋɛ, wo pilɛ sɔlɔɔ wo zili nuiti ma. Wo-ʋuuzuʋɛ kpein maanɛɛʋɛ, é ɲade, GALA ge mina faa zolootala nɔpɛ ka wo zaama, nii a ɠɛ ga zaɓu, é ʋoluave wo ʋa.

¹⁶Duɔi a ʋelana, é zeɠe maliɠii ʋɔ bɛ, é ʋa, é lɔɔɠu wo ʋɔ bɛ, à mina gaaɠale ma ʋolu maliɠii ʋɔ bɛ.

¹⁷Toɠa yɛ wo zaama wa-yooi zu, ʋɛ ná a nɛ bɛ, wa-laai ta zu, ʋɛ a ɠɛ ná gaanɛ zu. À mina suziɠa.

¹⁸Koloɠolo anzanu nɔpɛ ɓaa koloɠolo zunu nɔpɛ ge mina ɠɛ Izilayɛle nuiti saama, galagi tanɔpɛ dɛbi vaa ma.

¹⁹Anzanui ɓaa zunui a koloɠologi ɠɛɛna, ti sala, à mina ʋa ga ma walii tanɔpɛ Ɠɔoɠɔ GALAGI wa-ƓALAGI zei ʋɛlɛi wu, minazeɠe daazeeli vaa zu. Mazɔlɔɔ ti felegɔ pɛ ta ga kɔzɔba ani Ɠɔoɠɔ GALAGI wa-ƓALAGI ɠaazu.

²⁰À mina wo-ɠɛɛloin ɠata ga é maalamai la walii ma, ɓaa daamianigi ma, ɓaa ani nɔpɛ ma, nii nu a seɠe ga é ta la ma.

²¹Wa zoo wo wɛɛn ɠata ga é maalamai la ma, kɛlɛ à mina maalama ɠula wo-ɠɛɛloin ya, naa ɠa a kɛ Ɠɔoɠɔ GALAGI wa-ƓALAGI tuya loo wo ʋɛ, wo-yeavaiti kpein su, zooi naa zu, nii wo liizu wo seɠe ga wɔnɔ.

²²Wa minazeɠe bona Ɠɔoɠɔ GALAGI wa-ƓALAGI ʋɛ, à mina suɠooza, wo daazeeli. Mazɔlɔɔ Ɠɔoɠɔ GALAGI wa-ƓALAGI ɠa ma ɠuyei ɓɛ wo ma, wa koto zeɠe ga naa.

²³Ni wa ɓɔɠɔ zona, wo la minazeɠe boni, wo la koto ɠɛɛni.

²⁴Kɛlɛ minazeɠe goo a ɠulana wo-laaʋɛ, wo bo, kɛni wo so, wo daazeeli Ɠɔoɠɔ GALAGI wa-ƓALAGI ʋɛ, eɠɛʋelei wo kulaa la yiima, wo boga wo-laaʋɛ.

²⁵Ni wa lɔɔna wo-zeiɲɔɠɔi ná-leezɛn ɓelei zu, wa zoo wo ma waai ta mi, wo yiɠo, kɛlɛ à mina ta ʋu wa-aniɲaka zu, wo ʋa lii la.

²⁶Ni wa lɔɔna wo-zeiɲɔɠɔi ná-kpalagi zu, moloi é ga ɓeleegi, wa zoo wo ma ɠɔpɔgi ta ɠaaʋolososo ga yeei, kɛlɛ à mina molo leʋe woɠai lɔ wo-zeiɲɔɠɔi ná-moloi zu, wo ʋa ta leʋe.