1Siɛgi zu Baala Ziʋoi poogi lɔfelasiɛi laalaoni da, woza ɠɛɛni malomalo geeɠɔlɔgi zu, eyɛsu lɛlɛ ʋalisaama ɠila.
2Naa ʋoluma gè geezuɠeela lɔfelaiti kaani, niiti ta ɗa lo GALA kakala. Ti puʋu dɔfela veeni ti ya.
3Geezuɠeelai taɠili ge ʋaani, é lo zalaɠa ɠulazuʋɛ ɠobaʋɛ, ansanse gala liɠii é ga zanugi, naa zoni zea. Ti ansanse mɔinmɔin feeni zea, ga é kpɔ GALA ná-nuiti ta-ƓALA faliiti ba, é kula ga zalaɠai, zalaɠa ɠulazuʋɛ nii zanugi ziɛni maaʋɛ, nii é masa kpɔkpɔgi ɠakalaʋɛ.
4Ansansegi ɠala luului ta GALA ná-nuiti ta-ƓALA fali wooiti ti lɛɛni ʋɔɔma GALA kakalaʋɛ, é ɠula geezuɠeelai ya.
5Geezuɠeelai ansanse gala liɠii zeɠeni, é daave ga zalaɠa ɠulazuʋɛ ma abulekaiti, é pili eteai zu. Tona kpunɛ tugiti ti ɠulani ta wooiti, mainmain ɗa saɠa, zou ɓalii ɠɛ.
6Geezuɠeela lɔfelaiti puʋugi ɠɛni zoni ti ya, ti ɠɛni ɠɛʋele ɓɛtɛzu ga ti ʋa ti vɛ.
7Geezuɠeela mɔungi puʋugi vɛɛni. Sakɔtui ta abui, supuai ga ɲamai, naa ʋuuni eteai zu. Zooi zeizu saʋagɔi ɠilazuʋɛ ɠalani, guluiti seizu saʋagɔi ɠilazuʋɛ ɠala, tufa wunduiti pɛ ti ɠala.
8Geezuɠeelai velesiɛi puʋugi vɛɛni. Anii ta ɠɛni eɠɛ gize wolai, abui ba, naa ʋilini kpoloɗɛi wu. Kpoloɗɛi zeizu saʋagɔi ɠilazuʋɛ ɠɛni ga ɲamai.
9Kpɛtɛaniiti ti yɛnvuzu kpoloɗɛi wu, naati seizu saʋagɔi ɠilazuʋɛ zaani, ɓatoiti seizu saʋagɔi ɠilazuʋɛ ɠoloɠolo.
10Geezuɠeelai zaʋasiɛi puʋugi vɛɛni. Somideɠa wolai, abui ba é ɗa zo eɠɛ sɔmɔgi, naa zeɠeni geezuʋɛ, é loo. É looni ziɛ wolaiti ta ziɛungiti seizu saʋagɔiti gilazuʋɛ ma.
11Somideɠai naa laaseigi ɠa ga: «Ani wanai». Ziɛiti seizu saʋagɔiti gilazuʋɛ wanani, nuɓusɛ mɔinmɔin ge zaani, tɔɔzei ti ziɛ wanai naa ɓɔle vai zu.
12Geezuɠeelai naanisiɛi puʋugi vɛɛni. Foloi zeizu saʋagɔi ɠilazuʋɛ loɠani, ta alugi zeizu saʋagɔi ɠilazuʋɛ, ta somideɠaiti seizu saʋagɔiti gilazuʋɛti. Ti-zeizu saʋagɔi ɠilazuʋɛti ti ɓidini, foloi ʋalani ma voloi zeizu saʋagɔi ɠilazuʋɛ ma. Zekana nɔ é ɠɛɛni la ga kpidi ɓalaagi.
13Gè koɠɛi ɠaani, é ɗa ɠoʋe, tɛai geezuʋɛ gola, é ɠɛni ɓɔɛzu, é ɗa wooɠula, é ɗa ɠɛ ma: «Nimizai! Nimizai! Niima nimiza ɠa lee, nuɓusɛiti bɛ ti zeini eteai zu, siɛgi zu zɔɔma ʋuʋu gooiti ti ʋaazu ɠulazu la, niiti geezuɠeela saʋagɔiti ti ʋaazu ti vɛɛzu!»