1Naa ʋolu gè Baala Ziʋoi ɠaani, é poo dɔfelai ma mɔungi laalao. Gè zɛnvu su ani naanigɔi gila goomɛnini, é ɗa ɓɔɛ eɠɛ tona kpunɛ tugi, é ɠɛ ma: «Ʋa!»
2Gè wɛlɛni, gè soo ɠolegi ɠa. Zɔi é ɠɛni kɔma, mɛɛin ɠɛni zea. Ti masa bɔɔlɔgi veeni zea. É liini pilɛ sɔlɔɔdai zu, ga é pilɛ sɔlɔɔ mɔnɔ.
3Siɛgi zu Baala Ziʋoi poogi velesiɛi laalaoni da, gè zɛnvu su anii velesiɛi woomɛnini, é ɠɛ ma: «Ʋa!»
4Sooi taɠili ge ɠulani, é ɠɛni ga ma ɓɔigi. Zɔi é ɠɛni kɔma, ma zobogi veeni bɛ ga é ziilɛigi ɠula eteai zu, nii a kɛ nuɓusɛiti ti ɗa ɓɔɠɔ ʋaa. Boɠa zɔkpɔ wolai veeni zea.
5Siɛgi zu Baala Ziʋoi poogi zaʋasiɛi laalaoni da, gè zɛnvu su anii zaʋasiɛi woomɛnini, é ɠɛ ma: «Ʋa!» Gè wɛlɛni, gè soo lɛigi ɠa. Zɔi é ɠɛni kɔma, kɔɠɔ ganii ɠɛni zoni zea.
6Gè wooi mɛnini, eɠɛ a ɠula zɛnvu su ani naanigɔiti saama, é ɗa ɠɛ ma: «Moloi ma ɠilo ɠilagi ɠa ɠeya ga folo ɠila wotiɠɛ zalai. Moloi nii daa ga wɔɔlezegi, naama ɠilo saʋagɔi ɠa ɠeya ga folo ɠila wotiɠɛ zalai. Kɛlɛ nii é ga gulɔi ta dɔɔi, mina faa ɲɔu ɠɛ ga tiye.»
7Siɛgi zu Baala Ziʋoi poogi naanisiɛi laalaoni da, gè zɛnvu su anii naanisiɛi woomɛnini, é ɠɛ ma: «Ʋa!»
8Gè wɛlɛni, gè soo maaɠolekolegi ɠaani. Zɔi é ɠɛni kɔma, naa laaseigi ɠɛni ga «Saai», gɔvɛalaazu ɠɛni ga siɛɲɔɠɔi. Zobogi veeni ti ya eteai zeizu naanisiɛi unda, ti nuɓusɛiti undaaʋili ga boɠa zɔkpɔi, ta pului, ta ɗɔfɔ zeeɓɛi, ta dɔɓɔ zua ɲɔiti.
9Siɛgi zu Baala Ziʋoi poogi lɔɔlusiɛi laalaoni da, gè naati zɛnvuiti kaani zalaɠa ɠulazuʋɛ wuʋɛ, niiti ti ti ʋaani ti ziɛ vai zu ga GALA daawooi, ta ta-zeele wooi ti ɠɛni bosu.
10Ti wooɠulani gola, ti ɠɛ ma: «Siɛgi ɓɛgele ɠa è maaɓɔunsu, Maliɠii, ɗɛi è ɲadegai, gaama nui, è ʋa eteai zu nuɓusɛiti tukpɔɠaaleʋe, è ʋa gi-ma ɲamai ʋotokula ti ma, nii ti puai?»
11Seɠe ɠolegi veeni ti ɠilagilagi pɛ zea, é woni ti ma ga ti lago looɠo yeeɠɛɠala go laawu, eyɛsu ta-wotiɠɛɲɔɠɔiti ta ti-ɠɛɛlointi tiegɔi laazeeli, niiti ti ʋaazu zaazu ga ti ɠɛʋele.
12Siɛgi zu Baala Ziʋoi poogi lɔzitasiɛi laalaoni da, gè wɛlɛni. Zou ɓali wolai ɠɛɛni, foloi lɛini eɠɛ seɠe lɛi tiintiingi, alugi pɛ ge ɓɔi eɠɛ ɲamai.
13Somideɠaiti ti ɠulani geezuʋɛ, ti ʋu ya zooi ma, eɠɛ siɛgi zu fiilɛ wolai kooleɠoole gului ɲiikpisu da, é ma ɓoeiti pu ya.
14Geeɠɔlɔgi zeɠeni ná, eɠɛ nu a sɛʋɛ ɓili. Gizeiti pɛ ta ziɛ zaama yooiti pɛ ti zeɠeni ti-losuʋɛti.
15Eteai zu masagiti, nu wolaiti, salaʋusu ɠundiɠi wolaiti, kpɛtɛ nu wolaiti, zobobɛ nuiti, ta nuɓusɛi mɔtaiti pɛ, duɔiti ta wɔɔlɔiti, ti pɛ ti lɔɔɠuni pugiti su, ta fasa ɠizeiti saama.
16Ti ɠɛni ɠɛɛzu gizeiti ma ta fasaiti: «À loo gi ma, à gi lɔɔɠu naa ʋa, nii é zeini masa kpɔkpɔgi ɠa, gi maaɠooza Baala Ziʋoi ná-ziiɠaawanai ʋa!
17Mazɔlɔɔ ta-yiiɠaawana volo wolai ʋaa, ɓɛ ɠa a zoo é lo daawu?»