1Gè wɛlɛni, gè Baala Ziʋoi ɠa loni Siyɔn gizei ma, ta nu waaungila waaʋuunaani maazu naanigɔiti (144.000), daaseigi ta Kɛɛɠɛ laaseigiti sɛʋɛai ti-loʋalaʋɛti.
2Gè wooi ta mɛnini, é zeɠe geeɠɔlɔgi zu, eɠɛ ziɛ wola zulu gooi, eɠɛ geeɓadɛ lu golai. Wooi gè mɛnini, é ɠɛni eɠɛ kɔni gɛin nuiti ta-ɠɔni gɛin gooi.
3Ti ɠɛni guye niinɛi loozu masa kpɔkpɔgi ɠakalaʋɛ, zɛnvu su ani naanigɔiti gaazu, ta kɛwola wɔlɔiti. Nu nɔpɛ ge la ɠɛni zooga é ʋa guyei tɛi maalɛlɛ, kɛni nɔ nu waaungila waaʋuunaani maazu naanigɔiti (144.000) nɔ, niiti ti unmɔɔni, ti ɠula eteai zu.
4Naati ka ti la ɓɔɠɔ ɠɔzɔni anzanuiti pɔ, ti la anzanu vaa nɔpɛ kɛɛni. Ta Baala Ziʋoi ʋolu, ʋɛ nɔpɛ é liizu ná. Ti unmɔɔgɛ, ti ɠula nuɓusɛiti saama, ti ɠɛ ga ma mɔungiti GALA bɛ ta Baala Ziʋoi ʋɛ,
5zɛɛ nɔpɛ ge la ɠɛni ti-laawooi ʋa, kɔzɔzu nɔpɛ ge la ti ʋa.
6Gè geezuɠeelai taɠili kaani, é ɗa ɠoʋe geezuʋɛ fiilɛi zu, ɠɔoɠɔ Woo Niinɛ Ʋagɔi ɠɛni zea ga é daazeeli eteai zu nuɓusɛiti pɛ ma, ziiti pɛ ma, ta bolodaiti pɛ, ta zii wooiti pɛ su, naa ʋɛɛ nuɓusɛiti pɛ ba.
7É ɠɛni wooɠulazu la, é ɗa ɠɛ ma: «À lua GALA ba, wo lɛbiyai ve tɔun bɛ! Mazɔlɔɔ ná-tukpɔɠaaleʋe yeei zeelia. À nɔkɔ naa wu, nii é geeɠɔlɔgi, ta zooi, ta kpoloɗɛi, ta ziɛungiti kpɛtɛa!»
8Geezuɠeelai taɠili, felesiɛi ɠana, naa ʋilɛni ma mɔungi ʋolu, é ɠɛ ma: «É loa bu, é loa bu, Ɓaɓilɔne taa wolai! Tɔ ɠa é ná-koloɠolo ziiɠula dɔɔi loni ziiti pɛ da!»
9Geezuɠeelai zaʋasiɛi ʋilɛni ti ʋolu, é ɗa wooɠula, é ɠɛ ma: «Ni nu nɔpɛ ka nɔkɔna filɛ zuai wu, ta baaɠulabai, é ná-poogi zɔlɔɔ toʋalaʋɛ, ɓaa zee ʋa,
10tɔ ɓalaa ka GALA ná-ziiɠula dɔɔi ɓɔle, nii é la zupuni, puai ná-ziiɠula ɗaawɔi zu. Toɠa ɓɔlɔ abui zu, é ɠalazu ga timinigi, naa ɠa ɠɛ geezuɠeela ɲadegaiti gaazu ta Baala Ziʋoi.
11Ti ɓɔlɔ abui ma luului ɠa yɛ ɠulazu eyɛsu ɠɔ, dooɠo ge la ɠɛa ti ʋɛ, folo ʋɛɛ kpidi ʋa, tɛiti ti nɔkɔsu filɛ zuai wu ta baaɠulabai, ta nu nɔpɛ nɔ é daaseigi ma ʋoogi zɔlɔɔsu.»
12Naazu ɠa GALA ná-nuiti, niiti ti ziɛzu ga GALA ná-deveiti, ta ti ga wooɠɛɠila nuiti Yesu ʋɛ, ti maanɛai la ga ti ta-yiilɔɔi ɠula kɛlɛma.
13Gè wooi ta mɛnini geeɠɔlɔgi zu, é ɠɛ mà: «Nii zɛʋɛ ga: ‹Undaanɛ nu ɠa ga naati, niiti ti ɠiliai yɛsu Maliɠii ʋa, ti za niizu!› » GALA Zɛnvui ɠɛni ma: «Ungo, ta ta-wotiiti ma looɠogi wo, mazɔlɔɔ ti-ɠɛɛ vaa ʋagɔiti ta ɠɛ ti ʋolu.»
14Gè wɛlɛni mɔnɔ, gè tonaɓiin kolegi ɠa. Nui ta ɠɛni zeini tonaɓiingi maazuʋɛ, kulaai ga nu ná-doun zunu. Masa bɔɔlɔgi é ga zanugi, naa ɠɛni unba, soo lufa leʋe woɠa ɠaaligi zoni zea.
15Geezuɠeelai taɠili ge ɠulani GALA sei ʋɛlɛi wu, é wooɠula gola naa ma, nii é ɠɛni zeini tonaɓiingi maazuʋɛ, é ɠɛ ma: «Ɗa-zoo lufa leʋe woɠai ʋili, é moloi leʋe, moloi leʋe ziɛgi zeelia, mazɔlɔɔ eteai mɔa, é zeeli teʋei ma!»
16Zɔi é ɠɛni zeini tonaɓiingi maazuʋɛ, é ná-soo lufa leʋe woɠai ʋilini eteai zu, eteai leʋeni eɠɛ molo.
17Geezuɠeelai taɠili ge ɠulani GALA sei ʋɛlɛi wu é geeɠɔlɔgi zu, tɔ ɓalaagi soo lufa leʋe woɠa ɠaaligi ɠɛni zea.
18Geezuɠeelai taɠili mɔnɔ, nii zobogi zea abui unda, naa ʋaai, é zeɠe zalaɠa ɠulazuʋɛ. É wooɠulani gola zɔi ma, nii soo lufa leʋe woɠa ɠaaligi ɠɛni zea, é ɠɛ ma: «Ɗa-zoo lufa leʋe woɠa ɠaaligi zeɠe, é eteai ná-leezɛn ɓelei ma wulu ɠɔpɔgiti kula, mazɔlɔɔ ná-leezɛinti ti ɓɔiɗa.»
19Geezuɠeelai ná-soo lufa leʋe woɠai ʋilini eteai zu. É eteai ná-leezɛn ɓelei ma waai ɠulani, é ti ʋu GALA ná-ziiɠula golai ma lɔɔ ɓɛtɛzuʋɛ.
20Ti leezɛin naa ziɠani taa ʋoluʋɛ, ɲama ɓoigi ɠulani siɠazuʋɛ, é yɛ yeizu, é zeeli kilo unsaʋagɔ (300) zu, gaaɠoozaai ga mɛtɛlɛ ɠila ta tukpɛ (1,5).