1Nɛ̀i gè ga Egilisi lotuɠɔi, nà ɠa gè sɛʋɛi nii leʋesu nɛ̀ɛɲɔɠɔi Gaiyuse ma, gè nɛai ʋɛ ga gaamai.
2Nɛ̀ɛɲɔɠɔi, nà pɔ ga è-yeavaiti pɛ ti zoloo ga pagɔ, è ɠɛ kɛdɛyai zu è-ɓusɛi zu, eɠɛʋelei è la zɛnvu zu vaiti su.
3Kòozunɛɛni gola, de-ɠɛɛleaiti paai ma, ti zeɠe è ʋɔ bɛ, ti ɗa-wooɠɛɠiladai wo gaamai zu, eɠɛʋelei è ziɛzu la gaamai zu.
4Koozunɛ nɔpɛ ge la wɔɔlɔa zèa, é ʋa leʋe nii ʋa, ga gè mɛni ga dòinti ta ziɛzu gaamai zu.
5Nɛ̀ɛɲɔɠɔi, ɗa ziɛzu ga wooɠɛɠiladai fai pɛ su è kɛɛzu ɠɛɛɠɛlointi bɛ, anɛɛ naati bɛ niiti ti ga wɛɛinti.
6Ti naama zeele wooi woni Egilisi nuiti gaazu, nii pilɛgai ɗa-nɛɛbɛi ʋa. Nà è maanɛɛnɛzu ga è ɓɔ ti ʋa ta-ziɛi zu, eɠɛʋelei soloogai la GALA gaazu.
7Tɔɔzei Kilista ná-botii ma ziɛi ɠa ti bosu, ti la yeezeini kidaaleʋelala nuiti ta-ɓɔba nɔpɛ bu.
8Naa ma, de maanɛɛʋɛ de yeezei nii ɠɛɠala nuiti bu, naa ɠa a kɛ de losu ɠɛ botii naa ʋa, nii ti kɛɛzu gaamai ʋɛ.
9Gè sɛʋɛ go leʋeni Egilisii ma, kɛlɛ Diyotelɛfe, nii wɔinɗai ga é ɠɛ ga ta-ɠundiɠii, é la gi levezu ga tago ɓalaa.
10Naa ɠa é ba, siɛgi zu gè ʋaazu la, nà siɛ ʋele ɲɔiti bo, woo ɲɔiti ta zɛɛiti é ti wosu gi ma. Kɛlɛ é la ɓelani naa ʋa, é la kɛɛzu é ʋa yeezei de-ɠɛɛleaiti bu, ti ʋaazu, zɔiti ta ɠɛɛna ti yeezei ti wu, é pele ɓesa naati tuɠɔ, é ti ɓɛ Egilisii zu.
11Nɛ̀ɛɲɔɠɔi, mina ʋokɔɠɔ faa ɲɔi ma, kɛni faa ʋagɔi. Zɔi é faa ʋagɔi ɠɛɛzu, naa ɠa ga GALA nu, kɛlɛ zɔi é faa ɲɔi ɠɛɛzu, naa la GALA kwɛɛ pa.
12Ɛsɛ pɛ ka zeele woo ʋagɔi wosu Demetiliyuse ʋɛ, gaamai ɓɔɠɔi ɠa ɓɔɛzu ná-faa zu. Gá ɓalaagi gá zeele wooi wosu bɛ, tama è kwɛɛ ga nii gi bosu, gaamai ɠana.
13Faa mɔinmɔin ka kìsu ga gè bo è ma, kɛlɛ gè la wɔinni gè ʋa naa ɠɛ ga sɛʋɛ ɓakui ta sɛʋɛ ɗɛi.
14Toɠa kìsu ga su la ɠoozazu de ɓɔɠɔ ɠa, da ɓɔɛ ʋɔ názu, laani ta la.
15Ziilɛigi ɠɛ è ʋɛ. De-wɔɔlaiti ta è luʋɔsu. De-wɔɔlaiti tuʋɔ, ti ɠilagilagi pɛ.