1Ɗɔun ɗa, dòun, è-zɛbɛi ɠaiziɛ zaalai zu, de sɔlɔɔsu da-ɠilibalai zu, da Yesu Kilista.
2Kalagi nii è sɔlɔɔgai zèa, gè ɗa bo zeele mɔinmɔin gaazu, ti ɠaliva wooɠɛɠila nuiti ma, niiti tiya ɓɔɠɔi ta zoo ti taɠiligaani kala da.
3Va bu, è ɗɔnɔ zɔlɔɔ kpɔlɔi zu, eɠɛ Yesu Kilista ná-salaʋusu ʋagɔi.
4Salaʋusu nɔpɛ ge la ná, nii a ɗa ɓɔɠɔ lɔ faa ɠiligiti su, ni toɠa pɔ ga é nɛɛ ná-kundiɠii ʋɛ.
5Ɠaɠo bo nu nɔpɛ ge la ná, a zoo zalai zɔlɔɔsu, ni é la ziɛni ga deveiti, ti zeiɗai.
6Tii ɠɛ nui é botii ɓaaɓaagi ɠɛɛzu, maanɛɛʋɛ tɔ mɔunpa é nɔnɔ zɔlɔɔ ma lɔnɔgi zu.
7Ɠida naa wu ga pagɔ, nii gè bosu è ma, naazu Maliɠii ɠa ti pɛ gaaɠaa ɠigi ve è ʋɛ.
8Ɠigi yɛ Yesu Kilista zu, nii é ga Davide mavofodai, buzeɠeai é ɠula saai ya, eɠɛʋelei Woo Niinɛ Ʋagɔi bosu la, nii gè daazeelizu.
9Naa ɠa gè kpɔlɔi zɔlɔɔsu ma vaa zu, ti ɗa gìli eɠɛ faa ɲɔu ɠɛ nu. Kɛlɛ GALA daawooi la ɠilini.
10Naa ɠa é ba, nà yiilɔɔzu fai pɛ bu, naati ta-vaa zu, niiti GALA ge yiimazeɠeai ga tiye, naa ɠa a kɛ tiya ɓalaa ti kizogi ta ɠɔoɠɔ lɛbiyai zɔlɔɔ ga Yesu Kilista maaʋele.
11Wooi niiti ta ga lada ɓɔɛi:
12Ni da lona kpaan,
13Ni da ɠɛna ga wooʋalada nuiti,
14Nuiti kitoo niima vaiti su, è ti maaɓakpa GALA gaazu, ti ɓeteʋe maaɠaali vaiti ba, ti la faa nɔpɛ paa nu ma, kɛni nɔ ti ti woomɛni nuiti ziiɠoloɠolo.
15Ɠaaɓa ga zɛbɛi pɛ, è ɓɔɠɔ lɛ ga nui nii GALA ka yeezei bu, botiɠɛ nui nii nu la unfe faa nɔpɛ ka ba, nii é gaama wooi laazeelizu ga sɔledai.
16Yeeɠula wafuun kpɔɛzuɠulaiti su, niiti ti la zolooni kidaaleʋei ma, mazɔlɔɔ zɔiti ti ʋilɛsu naati polu, naati ta ɗa li nɔ luɠɔma, GALA gaazuluabalalai zu.
17Kalagi ti bosu, naa ɠa luula eɠɛ palai, su ɗa li ga wɔɔlɔa. Yimené ta Filɛteni ta ga naama nui ta.
18Ti zeɠea gaamai ʋa, ti ɗa ɠɛ ma: «Kula saayai ɓega ga ɠɛ niina.» Ʋele ɠana ti nu mɔinmɔin kakasu la kidaaleʋe ʋelei ʋa.
19Anɛɛ naa ʋe, seɓasemai GALA ge daai, naa ɠa loni kpaan, niima wooiti sɛʋɛʋɛ ma ga poogi: «Maliɠii ná-nuiti kwɛɛ»,2:19 GlS 16:5. ta «Zɔi nɔpɛ é bosu ga toɠa ga Maliɠii nɔnɔ, é maaɠooza telebotalai ʋa».
20Pɛlɛ wolai wu, zanu aniɲakai ta wali aniɲakai ɠila nɔ laade, é ʋa ɠɛ ná, gulu geleiti ta pɔlɔ geleiti ɓalaa ta ɗa ɠɛ ná. Tanigaani ta ɗa ɠɛ faa unbu yɛ, mɔtaiti botii ɗa ɠɛ naati su yeenɔpɛ.
21Ni deɠɛmu nu a ɓɔɠɔ makɛna ɲadedai zu, é ʋilɛ niima vaiti ba, gè ti wosu, toɠa ɠɛ ga lɛbiya aniɲakai, é makɛsu yɛ, é pɛlɛ kɛɛɠɛi maavai ɠɛɛzu, soloogai kɛɛwoti ʋagɔi pɛ ma.
22Ɓizɛ nu niinɛlai ma ɠaazuɠulapɔiti ba, è telebodai ɠaiziɛ, ta kidaaleʋei, ta nɛɛbɛi, ta ziilɛigi, wa naati, niiti ti wooɠulazu Maliɠii ma ga ti-yiima ɲadegai.
23Ɠɛlɛ ɠimalala maaɠaaliiti ba, un ge la ti ʋa, naati ka ta ɗa kpɔɛi wuzeɠe.
24Tama Maliɠii ná-botiɠɛ nui maa la nɛɛni, é ʋa ɠɛ ga kpɔɛleʋe nu. Kɛlɛ kɛni tuʋalaa nɛɛ ɛsɛ pɛ bɛ, é zoo nuiti kalasu, ziilɔɔ.
25Maanɛɛʋɛ é ɗa sakpe nuiti kala ga sɛsɛbogi. Tanisu GALA ka pelei lɛɛ ga tiye, nii a kɛ ti-ziɛ ʋelei maavalibo, ti gaamai ɠwɛɛ.
26Ta ʋa ɠima naazu, ti ɠɛ ʋolu ga sɔɓelama nuiti, ti ɓɔɠɔ ɠula Inɛgi ná-balii ɠa, nii é ti zoni, ti lɔ ziimai ɠɛɛ vai zu.