1Gè devea ga gè mina ɠale ma mɔnɔ, gè ʋa li wo ʋɔ bɛ, é ʋa ɠɛ ga ziiɓɔlɔ vaa.
2Mazɔlɔɔ ni nà wo yiiɓɔlɔ vaa ɠɛɛna, ɓɛ ɠa a zoo é nɔ̀un koozunɛ? Naati gila nɔ ʋe, niiti gè ti yiiɓɔlɔ vai ɠɛai.
3Gè sɛʋɛi ɠɛɛni, gè teʋe wo ma eɠɛʋelei gè kɛɛni la, naa ɠa a kɛ, nà ʋaana, gè mina ziiɓɔlɔ zɔlɔɔ naati zea, niiti ti maanɛai ti kòozunɛ. Dàaʋɛ wo pɛ wo la, nà-koozunɛɛi ɠa ga wo pɛ wɔnɔ.
4Gè sɛʋɛi ɠɛɛni, gè teʋe wo ma, gè ɠɛni kidaaʋiligi zu ta ziizoolɛi, gàazuɗɛi ɗa ʋu, wo yiiɓɔlɔ vaa la ɠɛni de, kɛlɛ wo ɠɛ kwɛɛ nɔ, ʋelei gè wo nɛai la ʋɛ.
5Ni nui ta ɠɛa ga wo yiiɓɔlɔ zaɓui, nà laade é ʋa zìiɓɔlɔ, kɛlɛ wo pɛ be, ɓaa wo tanigaani nɔ ʋe, ni de la pooʋazu ma.
6Zeli mɔinmɔingi wo toga ma, naa kula ɠɛa ga ma nui.
7Naa ɠa é ba, maanɛɛʋɛ ga wo suvaayɛ niina, wo iɲɔdɔ, naa ɠa a kɛ ziiɓɔlɔ wolai mina ada ʋɛɛ ba.
8Nà wo maanɛɛnɛzu, à wa-nɛɛbɛi lɛɛ la ga wo-ziɛ ʋelei tɔun pɔ.
9Mazɔlɔɔ nà-sɛʋɛi ɠɛ ungi ɠana: gè wo zuɠɔɠɔ, ni wa ga woo zo nu fai pɛ su.
10Mazɔlɔɔ zɔi wo suvaayɛsu, nà ɓalaa gè naa zuvaayɛga. Siɛgi zu gè suvaayɛgi wosu da, (ni fai ta ɠa ná, nii nà suvaayɛ), nà suvaayɛ wo maaʋele ma Kilista ɠaazu,
11naa ɠa a kɛ, de mina Setana yɛ ná, é ʋa zobo sɔlɔɔ ade ma, mazɔlɔɔ ná-faiti ti la ga de ɠwɛɛtala zu vaa.
12Siɛgi zu gè zeelini la Toloase, ga gè Woo Niinɛ Ʋagɔi laazeeli, é ʋilɛ Kilista ʋa, Maliɠii botii ɠɛ zobo pagɔi ma ʋɛlɛlaʋɛ laalaoni tùɠɔ.
13Anɛɛ naa ʋe, zìizoolɛni ga gola, tɔɔzei gè la ɠɛni ade-ɠɛɛloin Tite ɠaani. Naa ɠa é ba, gè valini Toloase nuiti ma, gè li ga Masedoane ʋele.
14Kɛlɛ mamagi ɠa GALA bɛ, mazɔlɔɔ toɠa losu gi luɠɔ Kilista ná-pilɛ sɔlɔɔgai zu yeenɔpɛ. Toɠa botii ɠɛɛzu ga giye, gi ɗa Kilista ɠwɛɛ fai vaza adaʋɛ pɛ, eɠɛ gulɔ maku nɛɛnɛgi é vazasu adaʋɛ pɛ.
15Gi ɠɛɛʋɛ eɠɛ gulɔ maku nɛɛnɛgi Kilista kulazu ga zalaɠai GALA bɛ, gá ga naa naati saama, niiti ti kizogi zɔlɔɔgai, ta naati ɓalaa bɛ niiti ti undaaʋilisu.
16Zɔiti ti undaaʋilisu, toɠa ga saai ma makugi, é ti lɔɔzu saai zu. Zɔiti ti ɠizogai, toɠa ga zɛnvui ma makugi, é zɛnvui veezu. Ɓɛ ɠa zobogi bɛ, a zoo é niima wotii ɠɛ?
17Mazɔlɔɔ gi la ga ma mɔinmɔin kɛʋele, gi ʋa ɠɛ GALA daawooi zu yaaɠozu, kɛlɛ tɔɔzei GALA ka é gi leʋega, gá gaamai wosu tɔun gaazu ga Kilista ná-botiɠɛ nuiti.