1Salomɔn Ezipete masagi Falaɠɔn ná-doun anzanui vuluni, vului naa maaʋele ma, ti ɠilini ʋa ta Falaɠɔn. É ʋa ɠɛ é ɓe ga masa pɛlɛi lo, ta Ɠɔoɠɔ GALAGI zei ʋɛlɛi, naa ʋɛɛ siɠigi ʋa Zeluzalɛme ma, nii é ɠɛni lolisu ɓalaa ga Davide ná-taa wolai, miná ɠa é zeini ná.
2Nuɓusɛiti ti ɠɛni dɛ zalaɠaiti kulazu zalaɠa ɠula adaʋɛti, mazɔlɔɔ ti la ɠɛni dɛ Ɠɔoɠɔ GALAGI zei ʋɛlɛi loni bɛ.
3Ɠɔoɠɔ GALAGI nɛɛni Salomɔn ʋɛ, é ɠɛni ziɛzu ga kɛɛɠɛ Davide ná-tɛnɛ gooiti. Kɛlɛ tɔ ɓɔɠɔi ɠɛni zalaɠaiti kulazu, é ɗa ansansegiti gala zalaɠa ɠula adaʋɛti.
4Yeeta, masagi liini Gaɓaɠɔn ga é zalaɠai ɠula, Mazɔlɔɔ miná ɠa ná ɠɛni ga zalaɠa ɠula ada ɓiigi: Salomɔn gala zalaɠa mɔinmɔingaa ɠulani niina zalaɠa ɠulazuʋɛ miná.
5Kpidii, Ɠɔoɠɔ GALAGI ɠulani bɛ kɛlɛma segi zu Gaɓaɠɔn, é ɠɛ ma: «Nii wɔin è ma, dɛɛ, gè kɛ è ʋɛ.»
6Salomɔn gooɠaaʋoteni, é ɠɛ ma: «È ɗa-wooɠɛɠilada wolai ɠulaʋɛ kɛlɛma ɗa-wotiɠɛ nui kɛ̀ɛ Davide ʋɛ, tɔ ɓalaa é ziɛ gaamai ta telebodai zu, naa ʋɛɛ sɔledai ʋa è ʋɛ. È naama wooɠɛɠiladai makɛga bɛ ga è doun zunu ve bɛ, nii é zeini za ná-masa kpɔkpɔgi ɠa.
7Niizu niina, Ɠɔoɠɔ GALAGI nà-GALAGI, ɗa ɠa è kɛ̀a ga masagi, nɛ̀i gè ga ɗa-wotiɠɛ nui, kɛ̀ɛ Davide ʋotogi zu, nà ma, nà ga zunu loungo nɔ, nii é la zooni deve wosu.
8Nɔ̀un nɛ̀i gè ga ɗa-wotiɠɛ nui, gè wɛlɛa nɔ, gè ɓɔɠɔ ɠa ɗa-nuɓusɛiti untuɠɔ, niiti è yiimazeɠeai ga tiye, ti mɔinɗai, nu la zooga ti ɠaalusu, è ʋa ti-lie kwɛɛ.
9Naa ɠa é ba, ɠigi ve zèa, nɛ̀i gè ga ɗa-wotiɠɛ nui, nii nà lo da ɗa-nuɓusɛiti tuɠɔ, gè kwɛɛ nii pagai ta nii ɲɔuɗai. Mazɔlɔɔ ni naa laade, ɓɛ ɠa a zoo losu ɗa-nuɓusɛ mɔinmɔingi niiti tuɠɔ?»
10Naama ƓALA falii Salomɔn kɛɛni, é nɛɛni Maliɠii ʋɛ.
11GALA ge wooɠaaʋoteni, é ɠɛ ma: «Tɛi naa ɠa è falizu, è la sii zuɠooza valini ɓɔɠɔ ʋɛ, è la naavolo valini ɓɔɠɔ ʋɛ, è la ɓalaa è zili nuiti saa vai valini, kɛlɛ ɠigi ɠa è falizu, nii a kɛ è masadai ɠɛ ga telebodai,
12nà è yiima vai laazeelizu, nii a kɛ ɠigi ɠɛ è ma, ta è ɠeleɠele, é leʋe naati ba, ti ɠɛa è luɠɔ, ta niiti ti ʋaazu è ʋoluʋele.
13Naa pɛ poluma, nii è la falini, nà naa veezu è ya, naavoloi ta lɛbiyai, nii a kɛ è-zii ma voloi pɛ su, è ɠɛɠala mina zɔlɔɔ masagiti saama.
14Ni ɗa ziɛna ga nà-peleiti, è ɠolo nà-deveiti ta nà-tɔgiti bɛ ga è-ɠɛɛ Davide ɠɛʋele, nà è-zii zuɠooza.»
15Salomɔn wuunni, é gaaɠa ga GALA kpɔɛʋɛ pɔ segi zu. É ɠaleni ma Zeluzalɛme, é li Maliɠii ná-minazeɠe kesui ʋɔ bɛ. É gala zalaɠaiti ta ziilɛi zalaɠaiti kulani, é fɛti wola ɠɛʋele ɓɛtɛ ná-botiɠɛ nu wolaiti bɛ.
16Yeeta koloɠolo anzanu felegɔ ʋaani masagi ʋɔ bɛ, ti lo kakala.
17Gilagi ɠɛni ma: «Ni ɗa vaana bu, màliɠii, woilo gòo ma. Gá anzanui nii gá ɲiizu pɛlɛ ɠilagi wu, gè doun zunu ɠila sɔlɔɔgɛ koba.
18Folo saʋagɔ ʋoluma, tɔ ɓalaa é doin zɔlɔɔ. Giya ɠila nɔ ɠa gi ɠɛa pɛlɛi wu, nu ɠili nɔpɛ ge la ɠɛa gi ɠoba, kɛni gi felegɔ nɔ.
19Kpidii niina é laani ná-doin ma, naa za.
20Buzeɠe ʋele ɠana kua zaamai, názu nɛ̀i gè ga ɗa-wotiɠɛ anzanui gè ɲiizu, é dòin zeɠe kàkala, é da ɠakala, é nɔnɔ ma loun ʋoomai la kàkala.
21Sobui gè wuzeɠea ga gè ɲiimii ve doin ya, gè ka ga doungoi zaaʋɛ. Foloi ɠulaai ma, gè ɗa pɛtɛ ga pagɔ, gè ka niina ga nɔ̀nɔ ma loin laade, nii gè sɔlɔɔgai.»
22Zɔi yɛ ná, é ɠɛ ma: «Zɛ! Dòin ɠa é vulua, ɗɔnɔi ɠa saai!» Ma mɔungi ɠɛ ma: «Ɓa-o, ɗɔnɔ naa mu ka saai, nɔ̀nɔi ɠa é vulua!» Naama maaɠaalii ɠa ti ɠɛni ga masagi ɠakala.
23Gaaɓelagi zu, naa ɗa ɠɛ ti ma: «Zɔi ɠɛ: ‹Dòin ɠa é vulua, ɗɔnɔi ɠa saai,› zɔi ɓalaa ge ɠɛ: ‹Ɓa-o! È-loin ɠa saai, nɔ̀nɔi ɠa é vulua.› »
24Masagi ɠɛ ma ʋolu: «À ʋa ga boɠa zɔkpɔi ta pɔ̀.» Ti ʋa ga boɠa zɔkpɔi pɔ.
25É ɠɛ ma: «Doungoi nii é vulua, à teʋe su fele, wo gilazuʋɛ ve zɔi ya, wo gilagi ve zɔi ɓalaa zea.»
26Zɔi nɔnɔ ɠɛni ga doungoi é vulua, ná-doin maawɔin soni ga gola, é ɠɛ masagi ma: «Maliɠii, doungoi nii é vulua, à fe zea, kɛlɛ à mina paa!» Kɛlɛ bɔɔlai ɠɛni ma: «Ɓa-o! À teʋe su, naazu é la yɛga zèa, é la yɛga zea.»
27Názu ɠa masagi tukpɔi ɠaaleʋeni la, é ɠɛ ma: «À mina doungoi ʋaa, nii é vulua, wo fe anzanu mɔungi ya, toɠa ná-doun ʋe.»
28Izilayɛle nuiti pɛ ti masagi ná-tukpɔɠaaleʋei naa ma woo mɛnini. Ti pɛ ti luani ba, tɔɔzei ti kwɛɛni ga é ɠigi zɔlɔɔgɛ GALA zea tukpɔɠaaleʋe vai zu.