1Neɓate ná-doun zunui Zeloɓoame ná-kona puugɔ maazu lɔsaʋasiɛi (18) ma masadai zu Izilayɛle unda, Aɓiyame zeini Zuda unda ga masagi.
2Kona saʋagɔ ɠa é kɛɛni masadai zu Zeluzalɛme. Dee laa ɠɛni ga Maaka, Aɓisalɔme ná-doun anzanui ɠɛni de.
3Aɓiyame kotoi naati kɛɛni, niiti kɛɛɠɛ ti ɠɛɛni tɔun tuɠɔ, é la ɠɛni Ɠɔoɠɔ GALAGI nɛɛni ʋɛ ga zii pɛ ga mɛmɛwola Davide ɠɛʋele.
4Kɛlɛ Davide maaʋele ma, ná-GALAGI, Ɠɔoɠɔ GALAGI doun zunu ɠila feeni bɛ, naa ʋa zei potogi zu, nii a kɛ pɛlɛyeɠei ɠaa mina leʋe, ta Zeluzalɛme yɛ ga masa taa wolai.
5Mazɔlɔɔ Davide ziɛni telebodai zu Ɠɔoɠɔ GALAGI ɠaazu, é la kololala nɔpɛ kɛɛni ga naa, é ɠula Ɠɛte nui Ilii ná-fai ʋolu.
6Kɔɔi yɛni nɔ ɠɔ Loɓoameni zɔɠɔzu ta Zeloɓoame, sii ma voloi pɛ su.
7Aɓiyame ná-kɛɛwotii mɔtaiti, ta nii kpein é kɛɛni, naati sɛʋɛʋɛ Zuda masagiti ta-ɠɛɛwoti zɛʋɛi zu. Kɔɔi ɠɛni Aɓiyameni zɔɠɔzu ta Zeloɓoame.
8Aɓiyame zaani. Ti maaɠuluni Davide ná-taa wolai zu. Ná-doun zunui Aza ɠa é masadai ɠɛɛni potogi zu.
9Zeloɓoame ná-kona ʋuufelesiɛi (20) ma masadai zu Izilayɛle unda, Aza zeini Zuda unda ga masagi.
10Kona ʋuunaanigɔ maazu ɠila (41) ɠa é kɛɛni masadai zu Zeluzalɛme. Deewola laa ɠɛni ga Maaka, Aɓisalɔme ná-doun anzanui ɠɛni de.
11Aza Ɠɔoɠɔ GALAGI yiima vai ɠɛɛni, eɠɛʋelei nɔ mɛmɛwola Davide kɛɛni la.
12É koloɠolo nuiti kpein kulani zooi ʋa, niiti ti ɠɛni zalaɠa ɠula adaʋɛti, é kɔɔɠɔ ganigiti kpein koloɠolo, nii mɛmɛwolani ti ti ɓɛtɛni.
13É lɛbiya laaseigi zeɠeni deewola Maaka ʋa, nii é ɠɛni lolisu ga «Masa mama wolai», mazɔlɔɔ naa kɔɔɠɔ gani ɲɔi ta ɓɛtɛni anzanu ɠalagi Asela ʋɛ. Aza kɔɔɠɔ ganigi naa leʋeni ga, é gala Sedelɔn pɛtugi zu.
14Kɛlɛ anɛɛ Aza zii ma voloi pɛ su, é Ɠɔoɠɔ GALAGI nɛɛni ʋɛ ga zii pɛ, é la ɠɛni zalaɠa ɠula adaʋɛti kpeni.
15É ʋaani ga anii naati Ɠɔoɠɔ GALAGI zei ʋɛlɛi ma ɠoizuʋɛ, niiti ta kɛɛɠɛ ti ti veeni Ɠɔoɠɔ GALAGI ʋɛ: walii, zanugi, ta sɔɔla ɠiligiti.
16Kɔɔi ɠɛni nɔ Aza yɔɠɔzu ta Izilayɛle masagi Ɓaasa, ti-zii voloi pɛ daawu.
17Ɓaasa ʋaani yeeta, é kɔɔi ʋɛɛ Zuda yooi ʋa, é siɠigi lo Lama taa goi ma, nii a kɛ é pelei leʋe Zuda masagi Aza luɠɔ ta ná-zooi zu nuiti, ti mina ɗa ga lɔ, ti ʋa ɗa ɠula ga miná ʋele.
18Aza walii ta zanugi pɛ seɠeni, niiti ti ɠɛni Ɠɔoɠɔ GALAGI zei ʋɛlɛi ma naavolo makɛsuʋɛ, ta masagi ná-pɛlɛi wu, é ti ve ná-botiɠɛ nu wolaiti zea. Naa ʋoluma é ti leʋe Siili masagi Ɓɛne-Ɠadade ma, nii é ɠɛni zeini Damase, Taɓalimon ná-doun zunui, é ɠɛ mɔnɔ ga Ɠeziyon ná-dounloin, é ɠɛni naa ma,
19«De minazeɠe yɔɠɔzu, eɠɛʋelei de-ɠɛɛni felegɔ ti kɛɛni la. Pɛtɛ, gè walii ta zanugiti teʋega è ma. Li, è ɗa-minazeɠegi ɠoloɠolo nii é wo yɔɠɔzu wa Izilayɛle masagi Ɓaasa, nii a kɛ é zeɠe nà-zooi ma.»
20Ɓɛne-Ɠadade yeezeini masagi Aza ná-kpɔɛi wu, é ná-salaʋusu ɠundiɠiiti teʋeni, ti li ti kɔɔi ʋɛɛ Izilayɛle laa wolaiti ba. Ti tɔɔzeini Iyon, ti li Dan ta Aɓɛle-Ɓɛte-Maaka, ti Kinelɔte ɠoʋi zo, naa ʋɛɛ Nɛfɛtali yooi mɔtai pɛ ba.
21Ɓaasa naa mɛnigai ma, é looɠoni siɠigi lo fai ʋa Lama ma, é zeini Tiilesa.
22Masagi Aza ɠɛni Zuda nuiti kpein ma, kula ba la ba, ti kɔtuiti ta guluiti mɛɛn, niiti Ɓaasa ɠɛni botii ɠɛɛzu ga tiye Lama ziɠigi losuʋɛ. Masagi Aza ti zeɠeni, é siɠigi lo da Geɓa ta Misepa ma Ɓɛnzamɛn yooi zu.
23Aza ná-kɛɛwotii mɔtaiti, ta nii kpein é kɛɛni, ná-tɔɠɔɠula faiti, ta taai niiti é siɠigi loni ti ma, naati sɛʋɛʋɛ Zuda masagiti ta-ɠɛɛwoti zɛʋɛi zu. Pɔlɔzaɠa siɛgi zu kɔɠɔ wanai ɠa é soni.
24Aza zaani. Ti maaɠuluni mɛmɛwolani ta-ɠabamaʋɛ, mɛmɛwola Davide ná-taa wolai zu. Ná-doun zunui Zozafate ɠa é masadai ɠɛɛni potogi zu.
25Aza ná-kona felesiɛi ma masadai zu Zuda unda, Zeloɓoame ná-doun zunui Nadaɓe zeini Izilayɛle unda ga masagi. Kona felegɔ ɠa é kɛɛni masadai zu Izilayɛle unda.
26É Ɠɔoɠɔ GALAGI wanama vai ɠɛɛni, é ziɛ ʋele ɲɔuni ga kɛɛɠɛ ɠɛʋele, nii é nuiti diini kotoi ɠɛɛ vai ma.
27Isakaal wolodamai zu nui daa ga Ayiya, naa ná-doun zunui Ɓaasa yaava ɠilini Nadaɓe ma, siɛgi zu Nadaɓe ta Izilayɛle ɠɔɔʋɛbɛi pɛ ti Filisiti nuiti ta-laa wolai Giɓeton zeini la kɛlɛ su. Ɓaasa masagi Nadaɓe ʋaani.
28Ɓaasa paani Zuda masagi Aza ná-konagi zaʋasiɛi ma masadai zu, é masadai ɠɛ potogi zu.
29É ɠɛɛni nɔ feya ga masagi, é Zeloɓoame ná-pɛlɛyeɠei wu nuiti pɛ paani, é la ɠɛni naa mavofodai zu nui gila kpalaa zɛni vulua, é ti zuwuɠaaleʋeni, eɠɛʋelei nɔ Ɠɔoɠɔ GALAGI boni la, é ɠula Silo ƓALA goo wo nui Ayiya la.
30Naa kpein ge ɠɛɛni tɔɔzei kotoi ʋa Zeloɓoame kɛɛni, ta nii é nuɓusɛiti diini kɛɛ vai ma, naa ɠa é Ɠɔoɠɔ GALAGI, Izilayɛle ná-GALAGI yiiɠaawanani.
31Nadaɓe ná-kɛɛwotii mɔtaiti, ta nii kpein é kɛɛni, naati sɛʋɛʋɛ Izilayɛle masagiti ta-ɠɛɛwoti zɛʋɛi zu.
32Kɔɔi ɠɛni nɔ Aza yɔɠɔzu ta Izilayɛle masagi Ɓaasa ti-zii voloi pɛ daawu.
33Aza ná-kona saʋasiɛi ma masadai zu Zuda unda, Ayiya ná-doun zunui Ɓaasa zeini Izilayɛle unda ga masagi Tiilesa. Kona ʋuufelegɔ maazu naanigɔ (24) ɠa é kɛɛni masadai zu.
34É Ɠɔoɠɔ GALAGI wanama vai ɠɛɛni, é ziɛ ʋele ɲɔu ga Zeloɓoame ɠɛʋele, nii é Izilayɛle nuiti diini kotoi ɠɛɛ vai ma.