1Salomɔn wɛɛn anzanu mɔinmɔin nɛɛni ʋɛ, é ɠula Falaɠɔn ná-doun anzanui ʋolu, tanigaa ti ɠɛni ga: Moaɓe nu, Amɔn nu, Edɔme nu, Sidɔn nu, ta Ɠɛte nuiti,
2ti ɠulani zii naati su, niiti Ɠɔoɠɔ GALAGI ɠɛni Izilayɛle nuiti ma ta-vaa zu: «À mina ɠili ti ʋa, ti mina ɠili wo ʋa, mazɔlɔɔ ta wo-yiiti tati ta-ɠalagiti pɔ pelei.» Naama ziiti ka Salomɔn gilini ti ʋa ga nɛɛbɛi.
3É masa doun undɔfela (700) vuluni, ti ɠɛ ga anzaiti, é anzanu unsaʋagɔ (300) ɠiligaa zei, niiti ti la vuluni ga zɔiti kɛʋele. Anzaiti ti zii latini.
4Salomɔn wɔlɔzaɠa siɛgi zu, anzaiti ti zii latini gala kiligiti ma, zii la mɔ ɠɛni ná-GALAGI Ɠɔoɠɔ GALAGI ɠila nɔ ʋa, eɠɛʋelei kɛɛɠɛ Davide yii ɠɛni la.
5Salomɔn Asetaate lɛbini, Sidɔn nuiti ta-ɠalagi, é Milikɔme lɛbi, Amɔn nuiti ta-ɠɔzɔba ɠɔɔɠɔ gani.
6Salomɔn Ɠɔoɠɔ GALAGI wanama vai ɠɛɛni, é la ziɛni ga naa yiima ʋelei pɛ, eɠɛʋelei kɛɛɠɛ Davide ziɛni la.
7Naama ziɛgi zu, Salomɔn zalaɠa ɠula adaʋɛ ɓɛtɛni gizei ma é Zeluzalɛme folo ɠulazu ʋelei, Kemɔse ʋɛ, Moaɓe nuiti ta-ɠɔzɔba ɠɔɔɠɔ gani, é ta ɓɛtɛ Mɔlɔke ʋɛ, Amɔn nuiti ta-ɠɔzɔba ɠɔɔɠɔ gani.
8Ʋele ɠana é kɛɛni la anzaiti kpein ta-ɠalagiti bɛ, wɛɛn anzanui niiti ti ɠɛni zea, nii a kɛ naati ti ɗa zalaɠaiti kula ga ansansegiti ta toganiiti.
9Ɠɔoɠɔ GALAGI, Izilayɛle ná-GALAGI yiiɠaawanani Salomɔn ma, mazɔlɔɔ é ʋoluaveni Ɠɔoɠɔ GALAGI ʋa, nii é ɠulani ba ga seizu felegɔ.
10Naama ge devei veeni zea, é lo niima vai ga é mina gala kili dɛbi, kɛlɛ Salomɔn la ɠɛni Ɠɔoɠɔ GALAGI ná-deveiti soni.
11Ɠɔoɠɔ GALAGI ɠɛni Salomɔn ma: «Tɛi ʋele ɠana è ziɛzu la, è la nà-minazeɠegi ta nà-deveiti makɛni, niiti gè ti veeni è ya, nà masadai ɠulazu è ya, gè fe naa ya, nii é è yeeɠɔɠɔwu.
12Kɛlɛ gè la naa ɠɛɛzu siɛgi zu è vulua la dɛ, è-ɠɛɛ Davide maaʋele ma. È-loun zunui ɠa gè ʋaazu masadai ɠulazu zeezu.
13Gè la ɓalaa masadai pɛ kulazu zeezu, nà boloda ɠila zɛsu è-loun zunui ya, nà-botiɠɛ nui Davide maaʋele ma, ta Zeluzalɛme, ʋɛ gè yiimazeɠeai ga ná.»
14Ɠɔoɠɔ GALAGI Salomɔn zakpeɲɔɠɔ ɠila buzeɠeni, Edɔme nui Ɠadade, é ɠɛni ga masa pɛlɛi wu nui ta.
15Siɛgi zu Davide kɔɔi ʋɛɛni la Edɔme yooi ʋa, ná-kɔɔɠuluɓai Zoaɓe lɛɛni ná poomaiti maaɠuluzu, názu ɠa é Edɔme zunuiti pɛ paani la ti ɠɛni Edɔme,
16é yɛni ná alu dɔzita laawu ta Izilayɛle ɠɔɔʋɛbɛiti pɛ, eyɛsu ti zunuiti pɛ pa.
17Názu ɠa Ɠadade ʋelani la, ti li Ezipete ta Edɔme nuiti, niiti ti ɠɛni ga kɛɛɠɛ ná-botiɠɛ nuiti. Naama ziɛgi zu Ɠadade ɠɛni dɛ ga zunu loungo.
18Ti zeɠeai ma Madiyan, ti zeelini Palan, ti Palan nuiti seɠe ya, ti zeeli Ezipete, Ezipete masagi Falaɠɔn ʋɔ bɛ. Falaɠɔn pɛlɛ ta zou veeni Ɠadade ʋɛ, é ɗa kɔnɔkula.
19Ɠadade undaanɛɛ zɔlɔɔni Falaɠɔn ya, eyɛsu Falaɠɔn ná-nimɔɠɔi ve bɛ ga anza, masagi anzai Taapanɛse ná-seelai.
20Taapanɛse ná-seelai doun zunu ɠila sɔlɔɔni Ɠadade ʋɛ, é daasei pɛɛ ga Genuɓate. Taapanɛse doungoi naa ɠulani su Falaɠɔn ná-pɛlɛi wu, Falaɠɔn ná-dointi saama.
21Siɛgi zu Ɠadade yɛni da Ezipete, é mɛni ga Davide zaa, ná-kɔɔɠuluɓai Zoaɓe ɓalaa ge zaa, é ɠɛni Falaɠɔn ma: «Ɓena bà, gè ɠale ma nà-zooi zu.»
22Falaɠɔn gaazaɠani, é ɠɛ ma: «Leeni ɠa è ʋalagai ma kòbaʋɛ? Toɠa ɠale è pɔ ga è ɠale ma ɗa-yooi zu?» É naa wooɠaaʋoteni, é ɠɛ ma: «Gè la ʋalani ani nɔpɛ ma, kɛlɛ ɓɛ gè li.»
23GALA ge Salomɔn zakpeɲɔɠɔi taɠili buzeɠeni, Eliada ná-doun zunui Lezon, é ʋelani, é zeɠe Ɠadadezɛɛl ʋɔ bɛ, Soɓa masagi.
24É nui tanigaa ɠaalɛɛni ba ɠoba, siɛgi zu Davide Ɠadadezɛɛl ná-kɔɔʋɛbɛiti paa la, naazu é ɓɔɠɔ ɠɛni ga kɔɔɓɔ kundiɠi, ti liini, ti zei Damase, é ɗa masadai ɠɛ miná.
25É ɠɛni ga Izilayɛle ziliɲɔɠɔ Salomɔn zii ma voloi pɛ su, naama vaa ɲɔi kpein koba, nii Ɠadade ɠɛni kɛɛzu la, é zilini ga Izilayɛle, é ɗa masadai ɠɛ Siili yooi unda.
26Zeloɓoame ɠɛni ga Neɓate ná-doun zunui, Efelayime nui nii ná-taazuʋɛ ɠɛni ga Seleda, dee ɠɛni ga poanzai ta, daa ga Selua. Zeloɓoame ɠɛni ga Salomɔn ná-botiɠɛ nu wolai ta. Tɔ ɓalaa é wuzeɠeni masagi laalɔɠɔma.
27Pɛtɛ ʋelei é wuzeɠeni la naa laalɔɠɔma. Salomɔn ɠɛai ma pɛtugi laave fai ma nii daa ga Milo, ta é zeɠei laaɠulu, nii é ɠɛni siɠigi ʋa kɛɛɠɛ Davide ná-taa wolai ma.
28Zeloɓoame ɠa gaaɓaa nu. Salomɔn kaai ma ga toɠa botii ɠɛɛzu ga pagɔ, é toni Zozɛfe ná-pɛlɛyeɠei wu ɠasɔ zeɠe nuiti pɛ unda.
29Naama ziɛgi zu Zeloɓoame ɠulaai ma Zeluzalɛme ʋa, ti ɠomini pelei zu ta GALA goo wo nui Ayiya, Silo nui, seɠe niinɛi kɔba. Ti nu felegɔ nɔ ɠa ti ɠɛni dɔɓɔi zu.
30Ayiya ná-seɠe niinɛi ɠulani ɠɔba, é baliʋali su ga puugɔ maazu felegɔ (12).
31É ɠɛni Zeloɓoame ma: «Puugɔi zeɠe ɓɔɠɔ ʋɛ, mazɔlɔɔ Ɠɔoɠɔ GALAGI, Izilayɛle ná-GALAGI wooi ɠaa: ‹Pɛtɛ, nà ʋaazu masadai ɠulazu Salomɔn ya, gè boloda puugɔi ve è ʋɛ.
32Kɛlɛ boloda ɠila ka yɛsu zea nà-botiɠɛ nui Davide maaʋele ma, ta Zeluzalɛme, taai nii gè yiimazeɠeai la Izilayɛle wolodaiti kpein saama.
33Nà naa ɠɛɛzu tɔɔzei ti ʋoluavega nɔ̀un ba, ti nɔkɔ Sidɔn nuiti ta-ɠalagi Asetaate wu, ti nɔkɔ ɓalaa Moaɓe nuiti ta-ɠalagi Kemɔse wu, ta Amɔn nuiti ta-ɠalagi Milikɔme wu, naa ʋoluma ti la kɛɛni ti ʋa ziɛ ga zìimai, ti la zìima vaa ɠɛɛni, ti la nà-deveiti ta nà-tɔgiti soni, Salomɔn kɛɛɠɛ Davide ɠɛʋele.
34Gè la masadai pɛ kulazu zea, mazɔlɔɔ nà seɠezu ga masagi sii ma voloi pɛ su, nà-botiɠɛ nui Davide maaʋele ma, nii gè yiimazeɠeai la, ta é nà-deveiti ta nà-tɔgiti sogai.
35Kɛlɛ nà masadai ɠulazu ná-doun zunui yeezu, gè boloda puugɔ ve è ya,
36nà boloda ɠila zɛsu zea, naa ɠa a kɛ nà-botiɠɛ nui Davide mina ʋala mavofoda ma, nii a ɠɛ masadai ɠɛɛzu nɔ̀un gaazu Zeluzalɛme taazuʋɛ, ʋɛ gè yiimazeɠeai ga ná ga gè dàaseigi ʋɛɛ ná ʋa.
37Nà è zeɠezu, è masadai ɠɛ naa kpein unda, nii a nɛɛ è-yii ʋɛ, ɗa ɠɛ ga Izilayɛle masagi.
38Ni ɗa woilona nii kpein ma gè è levezu ma, ɗa ziɛna ga zìimai, nii pagai gàazu, ɗa naa ɠɛna, è nà-deveiti ta nà-tɔgiti so, eɠɛʋelei nà-botiɠɛ nui Davide kɛai la, nà yɛ è ʋa, gè masa pɛlɛyeɠe lo è ʋɛ, nii é la ɲiikpiga eyɛsu pɛ, eɠɛʋelei gè ta logai la Davide ʋɛ, nà Izilayɛle ve è ʋɛ.
39Nà Davide mavofodaiti unmaayeizu ga naa, kɛlɛ naa lɛi é ʋa ɠɛ yɛsu ma ɠɔ.› »
40Salomɔn ɠɛni pɔ ga é Zeloɓoame ʋaa, kɛlɛ Zeloɓoame ʋelani, é li Ezipete, masagi Sisake ɠoba, é yɛni Ezipete eyɛsu Salomɔn za.
41Salomɔn ná-kɛɛwotii mɔtaiti, ta nii kpein é kɛɛni, ta ná-ɠimalai, naati sɛʋɛʋɛ Salomɔn ná-kɛɛwotiiti ma zɛʋɛi zu.
42Salomɔn kɛɛni masadai zu Zeluzalɛme ta Izilayɛle pɛ unda ga kona ʋuunaanigɔ (40).
43Naa ʋoluma, Salomɔn zaani. Ti maaɠuluni kɛɛɠɛ Davide ná-taa wolai zu. Ná-doun zunui Loɓoame ɠa é masadai ɠɛɛni potogi zu.