1Masagi Davide ɠɛni bɛbɛi ma: «Dòun zunui Salomɔn, nii ɠilagi GALA ge yiimazeɠeai la, toɠa ga zunu loungo nɔ, ɠi gola la dɛ zea, botii ma suwɔɔlɔʋɛ, tɔɔzei pɛlɛi nii la ga nuɓusɛ nɔnɔ, Ɠɔoɠɔ GALAGI ɠa nɔnɔ ʋe.
2Nɔ̀un nà ɓɔɠɔi gè sòoda vai pɛ kɛɛʋɛ, nii a kɛ gè kɛʋele ɓɛtɛi ɠɛ nà-GALAGI zei ʋɛlɛi nii lo fai zu: zanugi, walii, kɔlu ɓɔigi, kɔlu ɠite, naa ʋɛɛ gului ʋa, gè naati gaalɛɛʋɛ ba, nii a kɛ niiti kpein ti maanɛai ga ti ɓɛtɛ ga sɔɔlai naa ma ziiti, ti ʋa ɓɛtɛ ga tiye. Gè kɔtu ʋapagiti gaalɛɛʋɛ ba ɓalaa: niiti ta zoo ɲɛkpɛzu, niiti ti volozu, ma ʋɔnɛgiti, kɔtu zɔngɔ ɓaagi ma zii pɛ, ta kɔtu ɠolegiti, kɔtui wola mɔinʋɛ.
3Naa pɛ poluma, nii gè kɛʋele ɓɛtɛai GALA sei ʋɛlɛi lo fai zu, GALA sei ʋɛlɛi nɛɛ ʋelei ma bɛ̀, gè nà ɓɔɠɔi kɔli papagiti fea, zanugiti, waliiti, niiti ti ga kpɔ̀ɠɔ geleiti, é ɠula niiti polu gè ti ɓɛtɛai GALA pɛlɛ ɲadegai lo fai zu.
4Nii makɛgai bɛ̀ naa ɠa ga: kilo waaungila (100.000) zanu kitei zu, nii é zeɠezu Wofiil, naa ɓɔ kilo waaunfelegɔ waaʋuunaanigɔ (240.000) ʋa walii maaɲadegai zu pɛlɛi ɠoozuʋɛ ziɛ vai zu.
5Zanugi ta walii niiti ta ná, nii a kɛ sɔɔlai nii nɔpɛ maanɛai ga é ɓɛtɛ ga zanugi ɓaa walii, ti ɓɛtɛ ga niiti, botii pɛ su niiti ɲɛɛliɠi ɠɛ nuiti ta ɠɛ ti kɛ. Niima ziɛgi zu niina, wo zaama, ɓɛ ɠa kɛʋele ɓɛtɛai ga é faaɓɔɠɔ ɠɛ ga ɠoozunɛ ʋele Ɠɔoɠɔ GALAGI ʋɛ?»
6Naama ziɛgi zu Izilayɛle ɠundiɠiiti kpein, pɛlɛyeɠe geleiti, boloda geleiti, nu ungilagila ta nu waagilagila kundiɠiiti, naa ʋɛɛ niiti ba ti masagi ná-faiti unda, ti pɛ ti zɛba ti vebɛaniiti fe, ti daai ɠisu.
7Nii ti gaalɛɛni ba é ɠɛni ga: zanugi kilo waaungila waaʋuulɔfela (170.000), zanu kae waapuugɔ (10.000), walii leʋeni kilo waaunsaʋagɔ (300.000) ʋa, kɔlu ɓɔigi a la zeeli kilo waaundɔzita (600.000) zu, kɔlu ɠitei a la leʋe kilo miliyɔn saʋagɔ (3.000.000) ʋa.
8Zɔiti kɔtu zɔngɔ ɓaagiti ti ɠɛni ti ya, naati ti ɠɛni ʋaazu ga tiye, ti ɗa kaliva Yeɠiyɛle ma, Gɛɛlɛson mavofodai, ga ti ʋa da Ɠɔoɠɔ GALAGI zei ʋɛlɛi wu naavolo makɛsuʋɛ.
9Nuɓusɛi wola ɠoozunɛɛni vebɛanii naati fai zu, tɔɔzei ti ɠɛni feezu ga yii pɛ Ɠɔoɠɔ GALAGI ʋɛ. Masagi Davide ɓɔɠɔi ɓalaa gola ɠoozunɛɛni.
10Davide mamagi veeni Ɠɔoɠɔ GALAGI ʋɛ bɛbɛi pɛ gaazu, é ɠɛ ma:
11Ɠɔoɠɔ GALAGI, ɗa ɠa è-ʋo ge ga
12Ɗa ɠa kpɛtɛi ta lɛbiyai zeɠezu è ʋɔ.
13Naa ɠa é ba, gá-ƓALAGI, gá è maamusɛzu,
14Mazɔlɔɔ nà ga leeni kae,
15Gá nɔ ga wɛɛinti ta seikɔɠɔma nuiti è ɠaazu,
16Ɠɔoɠɔ GALAGI, gá-ƓALAGI, naavoloi nii pɛ ka zɔlɔɔsu ɗa nɔ è ya,
17Ee, nà-GALAGI, gè suɠwɛɛ ga ɗa gi yiizumɔsu,
18Ee, Ɠɔoɠɔ GALAGI, gi-mɛmɛwolani Abalaame, Izaake, ta Izilayɛle ta-ƓALAGI, ɠi pagɔi nii ta kisiɛ ʋagɔi niiti makɛ yeenɔpɛ ɗa-nuɓusɛiti ziimaʋɛ.
19Zii ve dòun zunui Salomɔn ya, nii gaa la ɠwɛni su fele,
20Naa ʋoluma, Davide ɠɛni bɛbɛi ma: «À Ɠɔoɠɔ GALAGI mama, wa-ƓALAGI!» Bɛbɛi pɛ ge zɛba é mamagi ve Ɠɔoɠɔ GALAGI ʋɛ, ti-mɛmɛwolani ta-ƓALAGI. Ti ʋilɛni ɲiibiɠa, ti la Ɠɔoɠɔ GALAGI ɠɔɠɔwu ta masagi ɠaazu.
21Poluma zobui, ti zalaɠaiti ta gala zalaɠaiti kulani, ti fe Ɠɔoɠɔ GALAGI ʋɛ: nikɛ zinɛ waagila (1.000), baala sinɛ waagila (1.000), ta baala ziʋo waagila (1.000), naa ʋɛɛ puya zalaɠaiti ba ga dɔɔi nii a la kula ɠɛ su, naa ʋolu, ti zalaɠa mɔinmɔin kiligaa ɠula Izilayɛle pɛ bɛ.
22Naama voloi ti daamii ta kpɔɔlei woni ga koozunɛ wolai Ɠɔoɠɔ GALAGI ɠaazu. Ná zeizu velesiɛi ɠɛni ga nii, ti gulɔi ziɛ Davide ná-doun zunui Salomɔn ma Ɠɔoɠɔ GALAGI laaseigi zu, é ʋa ɠɛ ga ta-masagi. Ti gulɔi ziɛni ɓalaa Sadɔke ma, é ɠɛ ga zalaɠa ɠula nui.
23Salomɔn zeini Ɠɔoɠɔ GALAGI ná-masa kpɔkpɔgi ɠa, ga é masadai ɠɛ kɛɛɠɛ Davide ʋotogi zu. É masadai zeɠeni, é ɗa li luɠɔma, Izilayɛle nuiti pɛ ti ɠoloni bɛ.
24Kundiɠiiti ta salaʋusuiti, naa ʋɛɛ masagi ná-doun zunuiti pɛ ba, ti ɠoloni bɛ.
25Ɠɔoɠɔ GALAGI Salomɔn unbuzeɠeni Izilayɛle nuiti pɛ gaazu, é ná-masadai maawui é leʋe zɔiti pɛ ba, ti masadai ɠɛɛni Izilayɛle unda tɔun tuɠɔ.
26Izayi ná-doun zunui Davide masadai ɠɛɛni Izilayɛle pɛ unda.
27É kona ʋuunaanigɔ (40) ɠɛni masadai zu Izilayɛle unda: É kona dɔfelai ɠɛɛni Eɓelɔn, é kona ʋuusaʋagɔ maazu saʋagɔi (33) ɠɛ Zeluzalɛme.
28Davide zaani, kɛlɛ pɔlɔzaɠaga ʋoluma kɔɛkɔɛ ziilɛi su, é zii zɔlɔɔni, naa ʋɛɛ naavoloi ta lɛbiyai ʋa. Ná-doun zunui Salomɔn ɠa é masadai ɠɛɛni potogi zu.
29Masagi Davide ná-kɛɛwotiiti, é zo ma mɔungiti ma, é li ma ɠaaɓelagiti pɔ, naati sɛʋɛʋɛ GALA goo wo nuiti Samiyɛle, Natan ta Gade ta-zɛʋɛiti su.
30Ná-masadai, ná-zobogi, naa ʋɛɛ fai pɛ ba é ɠɛɛni ná-yeeɠɛɠalai, Izilayɛle yooi zu, ta zɔɔma masa zooiti su, naa pɛ bogɛ sɛʋɛi naati su.