1Wɛlɛ ʋele ɠa siɠida makɛ nuiti ti zeini la kpasu. Kolé mavofodaiti saama, niiti ti ɠɛni ná, tiya ɠaa: Kolé ná-doun zunui Meselemiya, Azafe ná-pɛlɛyeɠei wu nu ɠɛni ga naa.
2Ná-doun zunuiti ti ɠɛni ga niiti eɠɛʋelei ti zɔlɔɔ pelei la: Zakali, Yediayɛle, Zeɓadia,
3Yateniyɛle, Elame, Yoɠanan ta Eliyɔyenayi.
4Woɓɛde-Edɔme ná-doun zunuiti ti ɠɛni ga niiti eɠɛʋelei ti zɔlɔɔ pelei la: Semaya, Yeɠozaɓade, Yoa, Sakaal, Netaneyɛle.
5Amiyɛle, Isakaal ta Pewuletayi, ti pɛ kpɔga ɠɛni ga nu lɔsaʋa, tɔɔzei GALA ge tuya looni bɛ.
6Ná-doun zunui Semaya doun zunua zɔlɔɔni, niiti ti ɠɛni ga zobobɛ nuiti ta-ʋɛlɛyeɠeiti bu, tɔɔzei ti ɠɛni ga sɔɓelama nuiti.
7Naama loun zunuiti ti ɠɛni ga: Wɔteni, Lefayɛle, Woɓɛde, Ɛlɛzaɓade, ma un ge daa ma mɛɛ ga ti-ɠɛɛlointi Eliyu ta Samakia niiti ti ɠɛɛni ga soofaala nu ɠiteɠitegiti.
8Woɓɛde-Edɔme mavofodaiti kana. Tiya-o, ti-lointi-yo, naa ʋɛɛ ta-wolodamaiti ba, ti ɠɛni ga nu ʋuulɔzita maazu felegɔ (62), ti pɛ ti ga sɔɓelama nuiti, niiti ti ɠɛni ta-wotiiti kɛɛzu ga zɛbɛi.
9Meselemiya nɔnɔ ma ɓɔgi zu, ná-doun zunuiti ta kɛɛɠɛlointi ka ti ɠɛni su, ti nu puugɔ maazu lɔsaʋa (18), ti ɠɛni ga sɔɓelama nuiti.
10Melali mavofodai Woza doun zunuiti sɔlɔɔni. Simili ɠa é ɠɛni ga totuɠɔi, anɛɛ ni tɔ lɛi é ʋa ɠɛni ga doun mɔungi, kɛɛɠɛ seini ga totuɠɔi.
11Naa ʋolu, felesiɛi ɠɛni ga Yilikiya, saʋasiɛi Teɓaliya, naanisiɛi Zakali. Woza ná-bolodamai zu nuiti ti ɠɛni ga nu puugɔ maazu saʋagɔ (13).
12Siɠida makɛ nuiti ta-ɓɔgi naati pɛɛ, naa ʋɛɛ totuɠɔiti ba, ta ti-ɠɛɛlointi pɛ, ti ɠɛni ta-wotii ɠɛɛzu Ɠɔoɠɔ GALAGI zei ʋɛlɛi wu.
13Ti kpakutoomai ɠɛɛni ga ti siɠidaʋɛti gaaɠwɛ pɛlɛyeɠe ɓɔgiti ba, zeelɔzɔɠɔzu la ɠɛni ɠɛɛni ɓolomadɔɠɔiti ta seizumaanɛgiti zɔɠɔzu.
14Kpakutoomai maaʋele ma, Selemiya ɠa é folo ɠulazu ʋele ʋɛlɛlaʋɛ zɔlɔɔni. Ná-doun zunui Zakali, nii é ɠɛni ga tɛnɛbo nu wola ɠigi ma, kpakutoomai maaʋele ma, naa lɛkpɛmaʋɛ nu ɠɔʋɛzu ʋele ʋɛlɛlaʋɛ zɔlɔɔni.
15Lɛkpɛmaʋɛ nu yeezazu ʋele ʋɛlɛlaʋɛ veeni Woɓɛde-Edɔme ya, kasɔ ʋuu ʋɛlɛiti ti ve ná-doun zunuiti zea.
16Supime ta Woza, naati ka folo liizu ʋele ziɠidaʋɛ veeni ti ya, naa ʋɛɛ siɠidaʋɛ ʋa, ná laaseigi ga Salekɛte, nii daalaosu ga pelei zu ʋele nii é lɛɛzu.
17Folo ɠulazu ʋele ʋɛlɛlaʋɛ, Levi nu lɔzita foloi ma, lɛkpɛmaʋɛ nu ɠɔʋɛzu ʋelei, nu naanigɔ foloi ma, lɛkpɛmaʋɛ nu yeezazu ʋelei, nu naanigɔ foloi ma, nu velefelegi zeizu felegɔ kasɔ ʋuuzu felegɔiti faa ma.
18Pɛɛbai ʋɔ pelei, folo liizu ʋelei, nu naanigɔ ɠa é ɠɛni nu lɛɛzuʋɛ makɛsu, nu felegɔ ɗa pɛɛbaiti makɛ.
19Siɠida makɛ nuiti ta-ɓɔgiti kaa, niiti ti laaseigiti ti zɛʋɛni, ti ga Kolé ta Melali ti-mavofodaiti.
20Levi nui tanigaa ʋelei Ayiya la, é ɠɛni ga GALA sei ʋɛlɛ wu naavolo makɛ nui, ta sɔɔlaiti pɛ makɛ nui, niiti ti veai ga GALA nɔnɔ.
21Ti ɠɛni ga Layedan mavofodaiti, Gɛɛlɛson ná-pɛlɛyeɠei wu nuiti, ti ɠilagilagi ti ɠɛni ga ta-ʋɛlɛyeɠeiti ma lotuɠɔiti. Ti-laaseigiti kaa: Yeɠiyeli,
22ta ná-doun zunuiti Zetame ta kɛɛɠɛloin Zowɛle. Tiya ɠa Ɠɔoɠɔ GALAGI zei ʋɛlɛi wu naavoloi makɛ vai ɠɛni ti ʋa.
23Amalame, Yiseɠaal, Eɓelɔn ta Uziyɛle ti-mavofodaiti saama, niiti ti zeɠeni,
24ti ɠɛni ga: Seɓuwɛle Gɛɛlɛsome mavofodai, Moize ná-doun zunui, nii é ɠɛni ga naavolo makɛ nuiti ta-lotuɠɔ wolai.
25Kɛɛɠɛlointi niiti ti ɠɛni ga Eliyezɛɛl mavofodaiti, naati seɠezeɠeʋɛ da ga ti zɔlɔɔ pelei: Leyaɓia, Ezayi, Yolame, Zikili ta Selomite.
26Selomite ta kɛɛɠɛlointi ka ti zeini GALA sei ʋɛlɛi wu zɔɔlaiti makɛ vai unda, niiti masagi Davide ti veeni GALA bɛ, ta pɛlɛyeɠe lotuɠɔiti, ta nu waagilagila kundiɠiiti, naa ʋɛɛ nu ungilagila kundiɠiiti ba, ta salaʋusu ɠundiɠii zɔiti.
27Naati, ti kɔɔzoganii ɠilazuʋɛ veeni Ɠɔoɠɔ GALAGI zei ʋɛlɛi ɓɛtɛ vai zu.
28Selomite ta kɛɛɠɛlointi ka mɔnɔ ti ɠɛni wɛlɛzu GALA sei ʋɛlɛi wu zɔɔlaiti pɛ ma, niiti niima nuiti ti ti veeni GALA bɛ, naa ʋɛɛ ani mɔtaiti pɛ ba niiti ti veai GALA bɛ: GALA goo wo nui Samiyɛle, Kise ná-doun zunui Sayile, Nɛɛl ná-doun zunui Aɓenɛɛl, Seluya ná-doun zunui Zoaɓe.
29Yiseɠaal mavofodaiti saama, Kenania ta ná-doun zunuiti ka ti ɠɛni ga bɛbɛi ma vaaɠaaɠulaba nuiti Izilayɛle yooi zu, tiya ɠa ti ɠɛni ga kundiɠiiti ta tukpɔɠaaleʋe nuiti.
30Eɓelɔn nuiti saama, Ɠasaɓiya ta kaɲɔɠɔiti, sɔɓelama nu waagila undɔfela (1.700), naati ka ti ɠɛni wɛlɛzu Izilayɛle yooi ma, nii é Zuludɛn ɠobaʋɛ folo liizu ʋelei, tiya ɠa ti ɠɛni Ɠɔoɠɔ GALAGI ná-faiti unda, ta ti ɗa nuɓusɛiti zɔɠɔzu vaiti gaaɠula ba.
31Pɛlɛyeɠe laasei sɛʋɛiti da wooi ma, Yeliya ɠa é ɠɛni ga Eɓelɔn nuiti ta-lotuɠɔi. Masagi Davide ná-kona ʋuunaanigɔi (40) ma masa fai zu, ti faiti buuʋɛtɛni, ti ka ga kɔɔɠuluɓa wolaiti ta ti zaama ti ga nu ɓiigiti, Yazɛɛl taazuʋɛ Galaade ɠoʋii ma.
32Yeliya ta ná-bolodai zu nuiti ti ɠɛni ga nu waafelegɔ undɔfela (2.700), ti ga nu ɓiigiti, ta pɛlɛyeɠe lotuɠɔiti. Tiya ɠa masagi Davide GALA faiti ta nuɓusɛiti zɔɠɔzu vaaɠaaɠulaba vai ɠalivaani ti ma, Luɓɛn mavofodaiti, Gade mavofodaiti, ta Manasé mavofodaiti gilazuʋɛ unda.