1Gè la ga wɔɔlɔ ɓaa? Gè la ga keela ɓaa? Gè la ɠɛni Yesu ɠaani ɓaa, de-Maliɠii? Wo la ga nà-botii zulɔnɔgi ɓaa, Maliɠii ná-botii zu?
2Ni gè la ga keela nui tanigaani gaazu, nà ga keelai wɔun wo ʋɛ. Mazɔlɔɔ wa ga nà-keela wotii ma ʋoogi Maliɠii ná-botii zu.
3Naa ɠa nà ɗa ɓɔɠɔ maavaawo da naati daalɔɠɔma, niiti ti màalɔɔzu.
4Naama zobo ge la gi ʋɛ ɓaa, gi ʋa daamianigi ta kpɔɔle anii zɔlɔɔ gá-wotii maaʋele ma?
5Naama zobo ge la ɓena ɠɛ gi ya ɓaa, gi ʋa kidaaleʋe anzanui ta ʋilɛ ʋolu, é ɠɛ ga gi-anza, eɠɛʋelei keelai zɔiti ti kɛɛzu la, ta Maliɠii deɠeiti, ta Piyɛlɛni?
6Ɓaa mu, nà-o, Ɓalanaɓase-o, gá nɔ ɠa gá ɗa botii ɠɛ pɛ, gi ʋa ɠɔnɔgi zɔlɔɔ?
7Ɓɛ ɠa a ɗa salaʋusu vai ɠɛ ga tɔ ɓɔɠɔi yeaɠɔligi? Ɓɛ ɠa a ɗa leezɛn ɓelei leʋe, é la ma waai ta mia? Ɓɛ ɠa a ɗa togani ɓulugi makɛ, é la togani ɓulugi ma ɲiimiɗɛi ta ɓɔlea?
8Niima vaiti gè ti wosu, ti la ga nuɓusɛiti ta-leveiti nɔ, mazɔlɔɔ GALA ná-tɔgi ɓalaa ka ti wosu.
9Mazɔlɔɔ sɛʋɛʋɛ Moize ná-tɔgi zu ga: «Mina nikɛi laaʋɛ ɠili, a ɠɛna moloi ɠaalia ga.»9:9 TSV 25:4. GALA ka yiizoolɛzu ga nikɛiti nɔ ɓaa?
10Ɓaa, gi maaʋele laade, é ʋa ɠɛ nii wosu da? Ungo, giya ɠa naa zɛʋɛai gá-vaa zu. Kɛni zɔi é wozai wolizu, ta zɔi é moloi loɠazu, ti losuʋɛ ɠɛ kitogi zu, ga ta tɔnɔ zɔlɔɔ su.
11Ni gi zɛnvu zu vaiti fazaga wo zaama, faa ɲɔu ɠana ɓaa, ni gá gɔnɔ zɔlɔɔna wo-yeaɠɔligiti su?
12Ni naama zobogi ɠa zɔiti zea wo unda, naama zobogi la gi ya wo unda, é ʋa leʋe naati ba ɓaa?
13Tama wo kwɛɛ ga niiti ti boti ɲadegai ɠɛɛzu GALA sei ʋɛlɛi wu, naati ta ɗa ti-ɠɔnɔgi zɔlɔɔ GALA sei ʋɛlɛi wu. Ta zɔiti ti zalaɠai ɠulazu zalaɠa ɠulazuʋɛ, naati ta ɗa tɔnɔ zɔlɔɔ zalaɠaiti su, ti ɠulazu zalaɠa ɠulazuʋɛ.
14Zekana é la ɓalaa, Maliɠii deveʋɛ ga niiti ti Woo Niinɛ Ʋagɔi laazeelizu, naati ti ɠɔnɔgi zɔlɔɔ Woo Niinɛ Ʋagɔi laazeeli vai zu.
15Nɔ̀un, gè la niima zobogi tanɔpɛ seɠeni, gè la sɛʋɛi ɠɛɛzu ɓalaa ga gè ʋa ɠɛ niima vaiti maalolisu ga gè ti zɔlɔɔ ɓɔɠɔ ʋɛ. Tɔun nɛɛʋɛ bɛ̀ vɔlɔ ga gè za, kɛlɛ nu nɔpɛ ge mina lɛbiyai ma ungi ɠulaa zèa!
16Nà ɠɛna Woo Niinɛ Ʋagɔi laazeelia, naa la bɛ̀ ga ɓɔɠɔ wɔɔlɔ vaa, mazɔlɔɔ ma ɠeleɠele ge la ná, kɛni gè kɛ. Maanɔɠɔ ɠa tùɠɔ, ni gè la Woo Niinɛ Ʋagɔi laazeelini!
17Ni nà ɓɔɠɔi zìimai ɠa gè kɛɛzu la, kulanuma ɠa bɛ̀ naazu, kɛlɛ ni nà kɛɛzu nɔ ga kɛɛɠeleɠele ge la ná vaa, toɠa ùnma ga kasɔ nii kalivaai mà.
18Nà-kulanumai ɠa ga leeni naazu? Tɔ ɠa é ga, gè Woo Niinɛ Ʋagɔi laazeeli, nii geya la ba, gè mina naama losuʋɛ zeɠe ʋɛ, nii é ga nɔ̀nɔi, nɛ̀i gè ga Woo Niinɛ Ʋagɔi laazeeli nui.
19Nà ga wɔɔlɔ, gè la ga nu nɔpɛ ná-duɔ. Anɛɛ naa ʋe, gè ɓɔɠɔ ɠɛa ga ɛsɛ pɛ ná-duɔi, naa ɠa a kɛ, ni toɠa zoo ɠɛɛzu, gè ma mɔinmɔin gola zɔlɔɔ.
20Nà ɠɛna botii ɠɛa Zuifuiti saama, nà ɠɛɛzu eɠɛ Zuifui ta, nii a kɛ gè Zuifuiti maazɔlɔɔ. Nà ɠɛna zɔiti ba, ti Moize ná-tɔgi wu, nà botii ɠɛɛzu ti zaama, eɠɛ nà ɠɛ tɔgi wu, nii a kɛ gè ti maazɔlɔɔ, anɛɛ ni nà ɓɔɠɔi gè la tɔgi naa wu.
21Zenɔ ɠana é la, siɛgi zu gè naati saama la, niiti ti la Moize ná-tɔgi ɠwɛɛ, ná ɗa ziɛ ga ti ɠɛʋele, eɠɛ gè la tɔ bu, nii a kɛ gè ti maazɔlɔɔ. Naa la bosu ga gè la ɠolozu GALA ná-tɔgi ʋɛ, mazɔlɔɔ nà ɠolozu Kilista ná-tɔgi ʋɛ.
22Zɔiti zɛbɛ la ti ʋa kidaaleʋei zu, gè ɠɛa ga zɛbɛsulala nu ga naati kɛʋele, nii a kɛ gè ti maazɔlɔɔ. Nà ɓɔɠɔ ɠɛɛzu ga ti pɛ kɛʋelei, nii a kɛ, ʋele-o-ʋele gè tanigaani kizo.
23Tama nà naa pɛ kɛɛzu Woo Niinɛ Ʋagɔi vaa ma, nii a kɛ gè nɔ̀nɔ zɔlɔɔ su.
24Wo la kwɛɛ ɓaa, ga zɔiti ti ɓizɛzu ɓɔɠɔ yɛ kpizɛi zu, ti pɛ ta ɗa ɓizɛ, kɛlɛ ti zaama, nu ɠila nɔ ɠa a ɗa zalai zɔlɔɔ? À ɓizɛ ɠana ga wo ʋa zalai zɔlɔɔ.
25Kpizɛ wo nuiti ta ɗa ɓɔɠɔ zo, ti yeeɠula faa mɔinmɔin su, nii a kɛ ti lɛbiya wɔɔlɔgi zɔlɔɔ, é la lɛbisu, é ɠoloɠolo. Kɛlɛ adɔnɔi, da kɛɛzu, nii a kɛ de lɛbiya wɔɔlɔgi zɔlɔɔ, nii é la ɠoloɠologa eyɛsu ɠɔ.
26Naa ɠa é ba, nà ɓizɛzu, kɛlɛ ani ɠa gàazu logai ba. Ɲɛpii gè kɔɔzu, fiilɛi laade gè ʋa ɠɛ doɠazu.
27Nà ɓakpasu kpùsɛi ma, é ɠolo bɛ̀, naa ɠa a kɛ nà GALA daawooi laazeelina nuiti ma, nà ɓɔɠɔi gè mina loo bu.