1À ɠaaɓa ga wo nɛɛbɛi ziɛ. À Zɛnvu Ɲadegai ná-vebɛaniiti wɔin ɠɛ, ma un ge daa ma ga GALA goo wo fai.
2Zɔi é ɓɔɛzu zii woo ɠiligiti su, naa la ɓɔɛzu nuɓusɛiti pɔ, kɛni GALA, mazɔlɔɔ nii é bosu, nu nɔpɛ ge la gaaɠaazu. Zɛnvu Ɲadegai ná-zobogi maaʋele ma, toɠa dɔɔɠuzu vaiti bosu.
3Kɛlɛ zɔi é GALA gooi wosu, naa ɠa ɓɔɛzu nuɓusɛiti pɔ, é ti li luɠɔma kidaaleʋei zu, é ti iɲɔdɔɔ, é ti ɠaanɛɛnɛ.
4Zɔi é ɓɔɛzu zii woo ɠiligiti su, naa ɠa ɓɔɠɔ nɔ liizu luɠɔma kidaaleʋei zu, tama zɔi é GALA gooi wosu, naa ɠa Egilisii liizu luɠɔma kidaaleʋei zu.
5Nà pɔ ga wo pɛ wo ɗa ɓɔɛ zii woo ɠiligiti su, kɛlɛ wɔ̀inʋɛ mɔnɔ gola ga wo zoo wo ɗa GALA gooi wo. Zɔi é GALA gooi wosu, naa wɔɔlɔʋɛ zɔi ʋa, é ɓɔɛzu zii woo ɠiligiti su, kɛni ni nu ɠa ná, a zoo daawooleʋesu, nii a kɛ Egilisii li luɠɔma kidaaleʋei zu.
6Kɛ̀ɛleaiti, lee lɔnɔ ka wa sɔlɔɔ zèa, nà ʋaana wo ʋɔ bɛ, gè ɗa ɓɔɛ wo ʋɔ zii woo ɠiligiti su, ni gè la ɓɔɛni wo ʋɔ ga kulakɛlɛma vaiti, ɓaa faaɠwɛgi, ɓaa GALA gooi, ɓaa kalagi?
7Gɛingɛin ganigiti pɛtɛ, eɠɛʋelei koolei la, ɓaa kɔnigi, ni gooi la ɠɛ zɔleni, ɗa gaaɠa ɠale ga nii ɠa koolei bosu, ɓaa kɔnigi bosu?
8Ni puʋu fɛɛ wooi a zupuna, ɓɛ ɠa a ɠɛʋele ɓɛtɛ kɔɔɠɔ vai ma?
9Zekana é la wa ɓalaagi. Ni wa ɓɔɛna zii woo ɠiligiti su, ga wooiti nu la ti ʋoluɠwɛɛ, ta naa ɠaaɠa ɠale? Wa ɓɔɛ fiilɛi nɔ zu.
10Zii woo mɔinmɔin ka eteai zu. Ti zaama, gila kpalaa ge la ná nii é wosu, ni polu la ba.
11Tama, ni gè la zii wooi naa ɠwɛɛ, nii ti ɓɔɛzu la pɔ̀, naama nui ɠɛa bɛ̀ ga wɛɛn, nà ɓalaa gè ɠɛa ga wɛɛn naama nui ʋɛ.
12Zekana é la wa ɓalaagi. Tɔɔzei wɔin ɠa wo ma gola ga wo Zɛnvui ná-vebɛaniiti sɔlɔɔ suwɔɔlɔ, ti ɠaiziɛ ungi ɠɛ wo ʋɛ ga Egilisii li luɠɔma kidaaleʋei zu.
13Naa ɠa é ba, zɔi é ɓɔɛzu zii woo ɠiligi zu, é GALA fali ga é vebɛanii zɔlɔɔ, é zoo é daawooleʋe.
14Mazɔlɔɔ ni nà GALA falina zii wooi naa zu, nà GALA falizu ga zɛ̀nvui, kɛlɛ nà-kisiɛi zu ɲakai ʋe.
15Leeni ɠa nà kɛ naazu? Nà GALA fali ga zɛ̀nvui, kɛlɛ nà GALA fali ɓalaa ga kìgi. Nà guyei loo ga zɛ̀nvui, kɛlɛ nà guyei loo ɓalaa ga kìgi.
16Ni naa laade, ɗa GALA mamasu ga è-yɛnvui, zɔi é la niima vai ɠaaɠaani, naa ɠa zoo ɠale é ɓɔɛ bu ga: «Amina» ɗa-mama bogai naa zu? Tɔɔzei é la naa ɠwɛɛ, nii è bosu.
17Anɛɛ ni ɗa-mama GALA falii ʋagɛ gola, é la ɓɔsu zɔi ʋa, é ʋa li luɠɔma kidaaleʋei zu.
18Nà GALA mamasu, tɔɔzei nà zii woo ɠiligi wosu, gè leʋe wo pɛ ba.
19Kɛlɛ Egilisi maaɓɔgi zu, zìima ɠa ga gè kpɔɛ lɔɔlugɔ nɔ wo, wooiti nu a ti ɠaaɠa, nii a kɛ zɔiti ti ɠi sɔlɔɔ, naa vizɔgɛ gè ʋa kpɔɛ waapuugɔ (10.000) wo zii woo ɠiligi zu.
20Kɛ̀ɛleaiti, à mina ɠɛ ga doungoiti wa-ɠidafaawui ɠɛʋelei zu. À ɠɛ ga doungoiti faa ɲɔi letemazu, kɛlɛ à ɠɛ ga kpakologiti wa-ɠidafaawui letemazu.
21Sɛʋɛʋɛ GALA Sɛʋɛi zu ga:
22Zii woo ɠili bo fai ɠa mu ga poogi kidaaleʋelala nuiti bɛ, kɛlɛ kidaaleʋe nuiti taade. Kɛlɛ tɔun, GALA goo wo fai ɠa ga poogi kidaaleʋe nuiti bɛ, kɛlɛ kidaaleʋelala nuiti taade.
23Ni tanisu, Egilisii pɛ ka ɠaalɛɛna ba, ti pɛ ti ɗa ɓɔɛ zii woo ɠiligiti su, ni niima vai ɠaaɠaalala nuiti ta ʋaana, ɓaa kidaaleʋelala nuiti, ti la ɠɛa ma wo litigɛ ɓaa?
24Kɛlɛ ni ti pɛ ta GALA gooi wosu, kidaaleʋelala nui ta a ʋaana, ɓaa niima vai ɠaaɠaalala nui ta, ti pɛ ta-ɓɔɛi ɠa ná-kotoi ɠula kɛlɛma, é ɓɔɠɔ ɠwɛɛ ga sɔba nu,
25ziimaʋɛ ma lɔɔɠuzu vaiti ta ɠula kɛlɛma. Toɠa unpilɛ zooi ma, é nɔkɔ GALA bu, é bo ga: «Gaamazu, GALA ka wo zaama!»
26Kɛ̀ɛleaiti, leeni ɠa maanɛai é ɠɛ deɠɛmu? Siɛgi zu wo maaɓɔsu da, ta ɠa ná guye looi veai zea, ta ɠa ná kalagi wo fai veai zea, ta ɠa ná kulakɛlɛmai vai veai zea, ta ɠa ná zii woo ɠiligi wo fai veai zea, ta ɠa ná a zoo é daawooleʋe, naa pɛ ge ɠɛ ga zaɓui é ɓɔ Egilisii ʋa, é li luɠɔma kidaaleʋei zu.
27Ni nui ta a ɠɛɛna é ɓɔɛ zii woo ɠiligi zu, nu felegɔ ɓaa nu saʋagɔ ta laa ʋa naa ma ga seizu saʋagɔ, kɛlɛ ti kula bu ga gilagila. Kɛlɛ kɛni nu ɠɛ ná, é ɗa ti laawooleʋe.
28Ni daawooleʋe nu la ná, ti maaɠɛ kpɔ Egilisii zu, ti ɗa ɓɔɛ yiimaʋɛ GALA pɔ.
29GALA goo wo nuiti tetema, nu felegɔ ɓaa saʋagɔ nɔ kpɔɛi wo, nii ti bosu, zɔiti ti ɗa ɠida naa wu.
30Kɛlɛ ni GALA ga fai ta ɠulana zɔi ʋɛ kɛlɛma, ma mɔungi maaɠɛ kpɔ.
31Mazɔlɔɔ wo pɛ wa zoo wo GALA gooi wo, ni wa seɠena da ga gilagila, naa ɠa a kɛ ɛsɛ pɛ ge faa maalɛlɛ, ɛsɛ pɛ iɲɔ ge lɔ kidaaleʋei zu.
32Zɔiti ti GALA gooi wosu, ta ɗa dama ga vebɛanii feai ti ya,
33mazɔlɔɔ GALA ge la ga faazupu ƓALAGI, kɛni ziilɛi GALAGI.
34kɛni anzanuiti ti ɗa maaɠɛ kpɔ, Egilisi maaɓɔgiti su, mazɔlɔɔ é la veeni ti ʋɛ ga ti ʋa ɗa kpɔɛi zuɠula ná, kɛlɛ kɛni ti ɓɔɠɔmaayei, eɠɛʋelei tɔgi bogai la.
35Ni ta pɔ ga ti fai ta zuɠɛzɛ zo, kɛni ti ti-zinigiti gaazaɠa pɛlɛi wu. Mazɔlɔɔ é la zolooni anzanui ma ga é ʋa ɓɔɛ Egilisi maaɓɔgi zu.
36Toɠa ɠale, wo ʋɔ bɛ ɠa GALA daawooi zeɠeai ná ɓaa? Ɓaa mu wa ɠila nɔ ɠa seeliai wo ma?
37Ni nui ta ɠa ɠisiɛzu ga toɠa ga GALA goo wo nu, ɓaa GALA Zɛnvui ma vebɛani veeʋɛ bɛ, kɛni é kwɛɛ ga niiti gè ti zɛʋɛai, gè ti leʋe wo ma, ta ga Maliɠii ná-deveiti.
38Ni nu a ɠɛlɛna ti ɠwɛɛ fai ʋa, tɔ ɓalaagi é la ɠwɛɛga.
39Naa ɠa é ba, kɛ̀ɛleaiti, à GALA goo wo vebɛanii wɔin ɠɛ, kɛlɛ à mina pele leʋe zii woo ɠiligiti bo fai luɠɔ.
40Kɛlɛ kɛni fai pɛ ge ɠɛ gaaɠula ba ga pagɔ.