لُكِ 5

¹عِسَ نُ نَ فٍنٍسَرٍتِ بَا دّ رَ. حَمَ قَن نُ عٍ بٌرٍ شّتّنمَ عَلَكٌ عٍ شَ عَ شُي مّ عَلَ شَ مَسٍنيِ كَوَندِدٍ.

²عِسَ نَشَ كُنكُي قِرِن تٌ بَا دّ رَ. يّشّسُشُييٍ نُ بَرَ فٌرٌ عٍ كُي، عٍ نُ عٍ شَ يّلّيٍ رَشَقٍ.

³عِسَ نَشَ بَكِ سِمْن شَ كُنكُي كُي، عَ عَ مَشْرِن عَ شَ كُنكُي ندٍدِ مَمِنِ شَرٍ دّ رَ. نَ شَنبِ، عِسَ نَشَ دْشْ كُنكُي كُي، عَ سٌ حَمَ كَوَندِقٍ.

⁴عِسَ تٌ فّ مَسٍنيِ تِدٍ، عَ نَشَ عَ قَلَ سِمْن بّ، «وٌن شّي دُلَ مَ. وٌ يّلّ سَ نَا، وٌ شَ سَ يّشّ سُشُ.»

⁵سِمْن نَشَ عَ يَابِ، «كَرَ مْشْ، مُشُ كْي بِرِن نَن نَدَنفِشِ يَكٌتٌمْي نَن نَ، مُشُ مُ سٍسٍ سُشُ. كْنْ عِ تَن نَن تٌ عَ قَلَشِ، ﭑ مَن سَ يّلّ سَمَ.»

⁶عٍ تٌ نَ رَبَ، عٍ نَشَ يّشّ فبٍفبٍ سُشُ يّلّ كُي، يّلّ نَشَ بْو قْلْ.

⁷عٍ نَشَ عٍ بّلّشّ مَفِرَ بٌورٍيٍ بّ نَشٍيٍ نُ نَ كُنكُي بٌورٍ كُي، عٍ شَ قَ عٍ مَلِ. عٍ تٌ قَ، عٍ نَشَ نَ كُنكُي قِرِنيِيٍ رَقٍ يّشّ رَ هَن عٍ قِرِن بِرِن نَشَ وَ دُلَقٍ.

⁸سِمْن ثِيّرِ تٌ نَ قٍ تٌ، عَ نَشَ بِرَ عِسَ بُن مَ، عَ عَ قَلَ، «مَرِفِ، عِ شَ عِ مَكُيَ ﭑ نَ، بَرِ مَ يُنُبِتْي نَن ﭑ نَ!»

⁹عَ نَ قَلَ نّ بَرِ مَ عَ تَن نُن عَ بٌورٍ بِرِن نُ بَرَ فّ كَابَدٍ نَ يّشّ سُشُقٍ رَ،

¹⁰سِمْن وَلِبٌورٍيٍ، سٍبٍدٍ شَ دِ قِرِنيِيٍ يَكِ نُن يَيَ، عٍ قَن نُ بَرَ كَابَ. نَ كُي، عِسَ نَشَ عَ قَلَ سِمْن بّ، «عِ نَشَ فَاشُ. عِ دَرِشِ يّشّ نَن سُشُ رَ، كْنْ كٍلِ يِ وَشَتِ مَ، عِ قَمَ مِشِيٍ نَن سْتْدٍ ﭑ بّ.»

¹¹عٍ تٌ كُنكُي رَتٍ شَرٍ مَ، عٍ نَشَ سٍ بِرِن لُ نَا، عٍ بِرَ عِسَ قْشْ رَ.

¹²عِسَ تٌ نُ نَ تَا ندٍ كُي، عَ نَشَ شّمّ ندٍ لِ نَا، كُنّ دِنشِ عَ قَتٍ بِرِن نَ. عَ تٌ عِسَ تٌ، عَ نَشَ عَ يَتَفِ رَقٍلٍن بْشِ مَ، عَ عَ مَيَندِ، «ﭑ مَرِفِ، شَ عِ تِن، عِ نْمَ ﭑ نَسّنِيّندٍ.»

¹³عِسَ نَشَ عَ بّلّشّ عِتَلَ، عَ عَ سَ كُنّ كَنيِ مَ، عَ عَ قَلَ عَ بّ، «ﭑ تِنشِ. قِندِ مِشِ سّنِيّنشِ رَ.» كُنّ قُرٍ نَشَ عَ بّحِن كٍرٍن نَ.

¹⁴نَ شَنبِ، عِسَ نَشَ عَ يَمَرِ، «عِ نَشَ يِ قٍ قَلَ مِشِ يٌ بّ. سِفَ عِ سَ عِ دّنتّفّ سّرّشّدُبّ بّ، عِ سّرّشّ بَ عِ شَ سّنِيّنيِ شَ قٍ رَ، عَلْ عَننَبِ مُنسَ عَ يَمَرِشِ كِ نَشّ. نَ قِندِ مَ سٍيدٍحْشْيَ نَن نَ عٍ بّ.»

¹⁵كْنْ عِسَ شَ قٍ شِبَارُ حَن نَشَ يٍنسٍن يّ دَنفِ عَ سِنفٍ رَ. حَمَ فبٍفبٍ نُ عٍ مَلَنمَ عٍ شَ عَ شُي رَ مّ، عَ مَن شَ عٍ رَيَلَن عٍ شَ قُرٍيٍ مَ.

¹⁶كْنْ عِسَ قَن نُ لُمَ سِفَ رَ يِرٍ مَدُندُشِيٍ، عَ سَ عَلَ مَشَندِ.

¹⁷لْشْ ندٍ، عِسَ نُ كَوَندِ تِقٍ. قَرِ سّنِيٍ نُن سّرِيّ كَرَ مْشْيٍ نُ بَرَ قَ دْشْ، نَشٍيٍ كٍلِشِ دَرِ سَلَمُ، عَ نُن فَلِلٍ نُن يُدَيَ تَا بِرِن. مَرِفِ شَ سّنبّ نُ نَ عِسَ مَ قُرٍ مَيٍ رَيَلَنقٍ رَ.

¹⁸نَ تّمُي، مِشِ ندٍيٍ نَشَ قَ نَمَتّ ندٍ رَ، عَ سَشِ سَدٍ مَ. عٍ نُ كَتَقٍ نّ عٍ شَ قَ عَ سَ عِسَ بُن،

¹⁹كْنْ حَمَ شَ قٍ نَشَ عَ نِيَ عٍ مُ نْ سٌدٍ عَ رَ. نَ كُي، عٍ نَشَ تٍ بَنشِ قَرِ، عٍ عَ قَرِ يِرٍ ندٍ مَبَ، عٍ قَ نَمَتّ رَفٌرٌ مّننِ رَ، عَ سَشِ عَ شَ سَدٍ قَرِ، عَ فٌرٌ حَمَ تَفِ عِسَ يَ عِ.

²⁰عِسَ تٌ عٍ شَ دَنشَنِيَ تٌ، عَ نَشَ عَ قَلَ نَمَتّ بّ، «ﭑ بٌورٍ، عِ شَ يُنُبِيٍ بَرَ شَقَرِ عِ بّ.»

²¹قَرِ سّنِيٍ نُن سّرِيّ كَرَ مْشْيٍ نَشَ سٌ عٍ مَحْشُنقٍ، «ثٍ، ندٍ يِ رَ، عَ تٌ عَلَ رَ سْتْمَ يِ كِ؟ ندٍ نْمَ يُنُبِيٍ شَقَرِدٍ، بَقٍ عَلَ كٍرٍن نَ؟»

²²عِسَ تٌ عٍ شَ مَحْشُنيِ كٌلٌن، عَ نَشَ عٍ مَشْرِن، «مُنقٍ رَ يِ مَحْشُنيِ مْولِ نَ وٌ بْحّ مَ؟

²³وْيّنيِ مُندُن سْونّيَ، عَ قَلَقٍ ‹عِ شَ يُنُبِيٍ بَرَ شَقَرِ،› كَ عَ قَلَقٍ ‹كٍلِ، عِ حّرّ›؟

²⁴ﭑ شَ عَ مَسٍن وٌ بّ عَ عَدَ مَ شَ دِ نْمَ يُنُبِ شَقَرِدٍ دُنِحَ مَ.» عَ نَشَ قَ عَ قَلَ نَمَتّ بّ، «ﭑ نَشّ عِ بّ، كٍلِ، عِ شَ سَدٍ تٌنفٌ، عِ شَ سِفَ عِ شْنيِ.»

²⁵نَمَتّ نَشَ كٍلِ مِشِيٍ يَ شْرِ كٍرٍن نَ. عَ نَشَ سٍ تٌنفٌ عَ نُ سَشِ نَشَن مَ، عَ قَ سِفَ عَ شْنيِ عَلَ مَتْشْ رَ.

²⁶حَمَ بِرِن دّ نَشَ عِشَرَ كِ قَنيِ، عٍ نُ عَلَ مَتْشْ. عَلَ شَ يَرَفَاشُي قَن نَشَ لُ عٍ بْحّ مَ، عٍ عَ قَلَ، «تٌ، مُشُ بَرَ كَابَنَكٌ قٍيٍ تٌ.»

²⁷نَ دَنفِ شَنبِ، عِسَ نَشَ مِنِ، عَ دُوتِ مَشِلِ ندٍ تٌ نَشَن شِلِ لٍوِ، عَ دْشْشِ دُوتِ مَشِلِدٍ. عِسَ نَشَ عَ قَلَ عَ بّ، «بِرَ ﭑ قْشْ رَ.»

²⁸لٍوِ نَشَ كٍلِ، عَ قٍ بِرِن نَبٌلٌ، عَ بِرَ عَ قْشْ رَ.

²⁹نَ تّمُي، لٍوِ نَشَ شُلُنيِ بٍلٍبٍلٍ تِ عَ شْنيِ عِسَ بّ. عٍ بِرِن نُ نَ عٍ دّفٍقٍ يِرٍ كٍرٍن، دُوتِ مَشِلِ وُيَشِ نُن مِشِ فبّتّيٍ قَن نُ نَ نَا.

³⁰قَرِ سّنِيٍ نُن سّرِيّ كَرَ مْشْيٍ نَشَ عِسَ قْشِرَبِرّيٍ مَشْرِن، «مُنقٍ رَ وٌ نُن دُوتِ مَشِلِيٍ نُن يُنُبِتْييٍ وٌ دّفٍمَ يِرٍ كٍرٍن؟»

³¹عِسَ نَشَ عٍ يَابِ، «مِشِ يَلَنشِ هَيِ مُ نَ سٍرِبَ مَ. قُرٍ مَ نَن هَيِ نَ عَ مَ.

³²ﭑ مُ قَشِ تِنشِنتْييٍ شَ شِلِدٍ. ﭑ قَشِ يُنُبِتْييٍ نَن شِلِدٍ، عٍ شَ تُوبِ.»

³³مِشِ ندٍيٍ نَشَ قَ عَ قَلَ عِسَ بّ، «عَننَبِ يَيَ نُن قَرِ سّنِيٍ قْشِرَبِرّيٍ سُنيِ نُن سَلِيٍ رَبَمَ هَن، كْنْ عِ فبٍيٍ تَن عٍ دّفٍمَ تُن.»

³⁴عِسَ نَشَ عٍ يَابِ، «شَ قُتِشِرِ شُلُنيِ عَ لِ، وٌ نْمَ عَ قَلَدٍ فِنّقٍنيِ بٌورٍيٍ بّ عٍ شَ سُنيِ سُشُ عَ نَ عٍ قّ مَ تّمُي نَشّ؟

³⁵وَشَتِ قَمَ، فِنّقٍنيِ بَمَ عٍ يِ رَ تّمُي نَشّ. نَ وَشَتِ تَن، عٍ سُنيِ سُشُمَ نّ.»

³⁶عِسَ مَن نَشَ تَالِ ندٍ سَ عٍ بّ، «مِشِ يٌ مُ دُفِ شُنتُنيِ بَمَ دُفِ نّينّ رَ عَ شَ دُفِ قٌرِ لٌنثٌ عَ رَ. شَ نَ رَبَ، دُفِ نّينّ كَنَمَ نّ، نَ شُنتُنيِ قَن مُ لَنمَ دُفِ قٌرِ مَ.

³⁷مِشِ يٌ مَن مُ وّنِ نّينّ سَمَ لّبّ قٌرِ كُي، شَ نَ مُ عَ رَ وّنِ نّينّ نَ قُنتُ، نَ لّبّ قٌرِ بُلَمَ نّ، وّنِ قِلِ، عَ سَسٍ قَن كَنَ.

³⁸عَ لَن نّ وّنِ نّينّ شَ سَ لّبّ نّينّ نَن كُي.

³⁹مِشِ يٌ مَن مُ وَ مَ وّنِ نّينّ شْن شَ عَ بَرَ وّنِ قٌرِ مِن، بَرِ مَ عَ عَ قَلَمَ نّ، ‹وّنِ قٌرِ نَن قَن.›»