يَيَ 20

¹سَندٍ لْشْي مَرِيَمَ مَفِدَلَكَ نَشَ سِفَ فَبُرِ يِرٍ سُبَشّ مَ بٍينُن كُيٍ شَ مَيَلَن. عَ تٌ مّننِ لِ، عَ نَشَ عَ تٌ نَ فّمّ شُنفبٍ نُ بَرَ بَ فَبُرِ دّ مَ.

²نَ كُي، عَ نَشَ سِفَ عَ فِ رَ سِمْن ثِيّرِ نُن عِسَ قْشِرَبِرّ بٌورٍ يِرٍ، عِسَ نُ نَشَن شَنُشِ، عَ عَ قَلَ عٍ بّ، «عٍ بَرَ مَرِفِ قُرٍ تٌنفٌ فَبُرِ كُي، مُشُ قَن مُ عَ كٌلٌن عٍ عَ سَشِ دّدّ.»

³نَ كُي، ثِيّرِ نُن عِسَ نَ قْشِرَبِرّ بٌورٍ قَن نَشَ مِنِ سِفَقٍ رَ فَبُرِ يِرٍ.

⁴عٍ قِرِنيِ نَشَ سِفَ عٍ فِ رَ، كْنْ عِسَ قْشِرَبِرّ مَشَنُشِ نَشَ فَبُرِ لِ بٍينُن ثِيّرِ سِنفٍ شَ نَا لِ.

⁵عَ تٌ عَ قٍلٍن عَلَكٌ عَ شَ فَبُرِ كُي مَتٌ، عَ نَشَ كَسَنفٍ دُفِيٍ تٌ، كْنْ عَ مُ سٌ نَ كُي.

⁶سِمْن ثِيّرِ تٌ مّننِ لِ، عَ نَشَ سٌ قْنمّ كُي كٍرٍن نَ، عَ قَ دُفِ بٍنتٍنيِ تٌ نَشَن نُ سَشِ عِسَ قُرٍ مَ،

⁷عَ نُن دُفِ نَشَن نُ مَكُنقُكُنقُشِ عِسَ يَتَفِ مَ. نَ دُفِ نُ سَشِ عَ شَتِ مَ، عَ سَ كِ يَءِلَنشِ عَ قَنيِ رَ.

⁸نَ تّمُي، عِسَ قْشِرَبِرّ بٌورٍ، نَشَن سِنفٍ فَبُرِ يِرٍ لِ، عَ قَن نَشَ سٌ نَ كُي. عَ نَشَ عَ بِرِن تٌ، عَ دَنشَنِيَ.

⁹عٍ مُ نُ قَهَامُي سْتْشِ كِتَابُي شَ مَسٍنيِ مَ سِندٍن، قَ قَلَ عَ قٌ عَلَ شَ مِشِ سُفَندِشِ شَ كٍلِ قَشّ مَ.

¹⁰نَ دَنفِ شَنبِ نَ قْشِرَبِرّ قِرِنيِيٍ نَشَ فبِلٍن عٍ شْنيِ.

¹¹مَرِيَمَ تٌ نُ تِشِ فَبُرِ سٌدٍ دّ رَ، عَ نُ نَ وَقٍ. عَ تٌ عَ قٍلٍن عَ شَ فَبُرِ كُي مَتٌ،

¹²عَ نَشَ مَلٍكّ قِرِن تٌ. عٍ مَشِرِشِ دُفِ قِيشّ رَ، عٍ دْشْشِ عِسَ قُرٍ نُ سَشِ دّننَشّ. كٍرٍن نُ نَ عَ شُنسَدٍ رَ، بٌورٍ نُ نَ عَ سَنلَابٍ رَ.

¹³عٍ نَشَ مَرِيَمَ مَشْرِن، «ﭑ مَ دِ، عِ وَقٍ مُنقٍ مَ؟» عَ نَشَ عٍ يَابِ، «عٍ بَرَ ﭑ مَرِفِ قُرٍ تٌنفٌ، ﭑ مُ عَ كٌلٌن عٍ عَ سَشِ دّدّ.»

¹⁴عَ تٌ فّ نَ قَلَدٍ، عَ نَشَ عَ كٌبٍ رَتٌ، عَ قَ مِشِ ندٍ تٌ، عَ تِشِ نَا. عَ مُ عَ كٌلٌن عَ عِسَ نَن عَ رَ.

¹⁵عِسَ نَشَ عَ مَشْرِن، «ﭑ مَ دِ، عِ وَ مَ مُنقٍ رَ؟ عِ نَ ندٍ قٍنقٍ؟» مَرِيَمَ حْشْ عَ مَ، سَنسِ مّينِمَ نَن نُ عَ رَ. نَ كُي، عَ نَشَ عَ يَابِ، «ﭑ بَ، شَ عِ تَن نَن نَ قُرٍ تٌنفٌشِ، عِ شَ نَ يِرٍ مَسٍن ﭑ بّ عَلَكٌ ﭑ شَ سِفَ عَ تٌنفٌدٍ.»

¹⁶عِسَ نَشَ عَ قَلَ عَ بّ، «مَرِيَمَ.» مَرِيَمَ تٌ عَ مَقِندِ، عَ نَشَ عَ رَتِن، «رَبُنِ!» نَ نَن قَلَشِ عٍبُرُ شُي، «كَرَ مْشْ».

¹⁷عِسَ نَشَ عَ قَلَ عَ بّ، «عِ نَشَ عِ بّلّشّ دِن ﭑ نَ، بَرِ مَ ﭑ مُ نُ تٍ بَبَ عَلَ يِرٍ سِندٍن. سِفَ ﭑ نفَشَكٍرٍنيِيٍ يِرٍ، عِ عَ قَلَ عٍ بّ، عَ ﭑ قَقٍ تٍدٍ ﭑ بَبَ شْنيِ، ﭑ مَرِفِ عَلَ نَشَن قِندِشِ وٌ قَن بَبَ رَ، وٌ قَن مَرِفِ عَلَ.»

¹⁸مَرِيَمَ مَفِدَلَكَ نَشَ سِفَ شِبَارُ رَ عِسَ قْشِرَبِرّيٍ يِرٍ، عَ عَ قَلَ عٍ بّ، «ﭑ بَرَ مَرِفِ تٌ!» عَ مَن نَشَ عِسَ شَ شّيرَ عِبَ عٍ بّ.

¹⁹نَ سَندٍ لْشْي كٍرٍنيِ، عِسَ قْشِرَبِرّيٍ نُ مَلَنشِ بَنشِ كُي نُنمَرٍ رَ، نَادّ بِرِن مَبَلَنشِ يُوِقِ كُنتِفِيٍ شَ يَرَفَاشُي مَ. عِسَ نَشَ مِنِ عٍ مَ، عَ تِ عٍ تَفِ، عَ عَ قَلَ، «عَلَ شَ وٌ بْحّ سَ.»

²⁰عَ تٌ نَ قَلَ عٍ بّ، عَ نَشَ عَ بّلّشّيٍ نُن عَ سّيتِ مَسٍن عٍ بّ. عٍ نَشَ سّيوَ مَرِفِ تٌقٍ رَ.

²¹عِسَ مَن نَشَ عَ مَسٍن عٍ بّ، «بْحّسَ شَ لُ وٌ بّ. ﭑ بَرَ وٌ شّي عَلْ بَبَ عَلَ ﭑ شّيشِ كِ نَشّ.»

²²عَ تٌ فّ نَ قَلَدٍ، عَ نَشَ قٌيٍ قٍلُن عٍ مَ، عَ عَ قَلَ، «وٌ شَ لُ عَلَ شَشِلِ سّنِيّنشِ شَ فٌرٌ وٌ مَ.

²³شَ وٌ دِحّ مِشِ هَاكّ مَ، نَ هَاكّ بَرَ حْن، كْنْ شَ وٌ مُ دِحّ، نَ هَاكّ لُمَ عَ مَ.»

²⁴عِسَ مِنِ عَ شَ شّيرَ قُ نُن قِرِنيِيٍ مَ تّمُي نَشّ، تٌمَسِ، عٍ نَشَن شِلِمَ «فُلِ»، عَ مُ نُ نَ عٍ يَ مَ مّننِ.

²⁵نَ كُي، بٌورٍيٍ نَشَ عَ قَلَ عَ بّ، «مُشُ بَرَ مَرِفِ تٌ!» كْنْ عَ تَن نَشَ عٍ يَابِ، «شَ ﭑ تَن مُ لَنتُمَ قْشِ تٌ عَ بّلّشّ كُي، ﭑ نَن ﭑ بّلّشّسٌلٍ رَ سٌ نَا، شَ ﭑ مَن مُ ﭑ بّلّشّ سَ عَ سّيتِ مَ عٍ دّننَشّ سْشْ، ﭑ تَن مُ لَمَ عَ رَ قٍوٌ!»

²⁶شِ سٌلٌمَسَشَن دَنفِ شَنبِ، عِسَ قْشِرَبِرّيٍ مَن تٌ نُ مَلَنشِ بَنشِ كُي، تٌمَسِ نُ نَ عٍ يَ مَ. هَلِ نَادّ بِرِن تٌ نُ مَبَلَنشِ، عِسَ نَشَ مِنِ عٍ مَ مّننِ، عَ تِ عٍ تَفِ، عَ عٍ شّيبُ، «بْحّسَ شَ لُ وٌ بّ.»

²⁷نَ تّمُي، عِسَ نَشَ عَ قَلَ عَ بّ، «ﭑ بّلّشّ مَتٌ. عِ شَ عِ بّلّشّسٌلٍ سَ ﭑ سّيتِ مَ عٍ دّننَشّ سْشْ. عِ نَشَ تّفّ ﭑ عِ. عِ شَ دَنشَنِيَ.»

²⁸تٌمَسِ نَشَ عَ قَلَ عَ بّ، «ﭑ مَرِفِ عَلَ!»

²⁹عِسَ نَشَ عَ مَسٍن عَ بّ، «عِ دَنشَنِيَشِ نّ، عِ تٌ بَرَ ﭑ تٌ؟ هّيرِ نَ مِشِيٍ بّ نَشٍيٍ بَرَ دَنشَنِيَ، هَلِ عٍ مُ ﭑ تٌشِ.»

³⁰عِسَ كَابَنَكٌ فبٍفبٍ رَبَ نّ عَ قْشِرَبِرّيٍ يَ شْرِ، نَشٍيٍ مُ سّبّشِ يِ كِتَابُي كُي.

³¹كْنْ نَشٍيٍ شَ قٍ تَن سّبّشِ يِ كِ، عٍ سّبّشِ نّ عَلَكٌ وٌ شَ لَ عَ رَ، عَ عِسَ نَن نَ عَلَ شَ مِشِ سُفَندِشِ رَ، عَلَ شَ دِ. نَ كُي، وٌ نَ دَنشَنِيَ عَ مَ، وٌ كِسِ سْتْمَ نّ عَ سَابُي رَ.