يَيَ 10

¹«ﭑ شَ نْندِ قَلَ وٌ بّ، مُحّتِ نُن سُوتٍ مُ سٌمَ فْورّ نَادّ رَ. عٍ تُفَنمَ نّ سَنسَنيِ شُن مَ.

²نَشَن سٌمَ فْورّ نَادّ رَ، نَ نَن قِندِشِ شُرُ سٍ دّ مَدٌنيِ رَ.

³نَادّ كَنتَمَ نَن نَادّ رَبِمَ عَ بّ. عَ نَ وْيّن شُرُ سٍيٍ رَ، عٍ بِرِن بِرَ عَ قْشْ رَ. عَ كَنكَن شِلِ عَ شِلِ رَ، عٍ بِرِن مِنِ تَندٍ.

⁴عَ نَ عَ فبٍ بِرِن نَمِنِ، عَ سَ تِمَ عٍ يَ رَ نّ، عٍ قَن بِرَ عَ قْشْ رَ، بَرِ مَ عٍ عَ شُي كٌلٌن.

⁵شَ مِشِ فبّتّ نَ عَ رَ عٍ مُ نَشَن كٌلٌن، عٍ مُ بِرَ مَ عَ قْشْ رَ مُكُ. عٍ عٍ فِمَ نّ نَ تَن يَ رَ، بَرِ مَ عٍ مُ عَ شُي كٌلٌن.»

⁶عِسَ نَشَ نَ تَالِ وْيّنيِ قَلَ عٍ بّ، كْنْ عٍ مُ عَ شَ مَسٍنيِ قَهَامُ.

⁷نَ كُي، عِسَ مَن نَشَ عَ مَسٍن، «ﭑ شَ عَ قَلَ وٌ بّ عَ نْندِ كِ مَ، ﭑ تَن نَن نَ يّشّييٍ شَ نَادّ رَ.

⁸نَشٍيٍ سِنفٍ قَ ﭑ بّ، مُحّتِيٍ نُن سُوتٍيٍ نَن نَ عٍ بِرِن نَ. يّشّييٍ مُ عٍ تَن شُي رَ مّ.

⁹ﭑ تَن نَن نَ فْورّ نَادّ رَ. نَشَن يٌ نَ سٌ ﭑ سَابُي رَ، عَ كَنيِ كِسِمَ نّ، عَ نُ سٌ، عَ نُ مِنِ، عَ نُ بَلٌي سْتْ.

¹⁰مُحّتِ تَن مُ قَمَ قٍقٍ مَ بَقٍ مُحّ تِدٍ، قَشّ تِدٍ، نُن كَسَرّ سَدٍ. ﭑ تَن قَشِ نّ، عَلَكٌ مِشِيٍ شَ كِسِ سْتْ، عٍ شَ دُنِحّءِفِرِ شَ قَن عَ قَنيِ رَ.»

¹¹«ﭑ مِسَالِشِ شُرُ سٍ كَنتَمَ قَنيِ نَن نَ، نَشَن مُ تٌندِ مَ قَشَدٍ عَ شَ شُرُ سٍ كَنتّ كُي.

¹²وَلِكّ نَن عَ فِمَ وُلَ بَرٍ يَ رَ، بَرِ مَ شُرُ سٍيٍ مُ قِندِشِ عَ فبٍ رَ، عَ بْحّ مُ نَ عٍ كَنتَقٍ رَ. عَ شُرُ سٍيٍ رَبّحِنمَ نّ، وُلَ بَرٍ ندٍيٍ قَشَ، عَ ندٍيٍ رَيٍنسٍن يّ.

¹³وَلِكّ مُ عَ حّنفِ سَمَ شُرُ سٍيٍ شَ قٍ شْن.

¹⁴ﭑ تَن مِسَالِشِ شُرُ سٍ كَنتّ قَنيِ نَن نَ. شُرُ سٍيٍ كَنتّ نُن عَ شَ شُرُ سٍيٍ، عٍ عٍ بٌرٍ كٌلٌن،

¹⁵عَلْ ﭑ تَن نُن بَبَ عَلَ مُشُ مُشُ بٌرٍ كٌلٌنشِ كِ نَشّ. ﭑ قَن بَرَ تِن قَشَدٍ ﭑ مَ شُرُ سٍيٍ بّ.»

¹⁶«يّشّي فبّتّيٍ قَن نَ ﭑ بّ نَشٍيٍ مُ نَ يِ فْورّ كُي. قٌ ﭑ شَ قَ نّ نٍيٍ قَن نَ. عٍ قَن ﭑ شُي رَ مّمَ نّ، يّشّييٍ بِرِن قِندِ فْورّ كٍرٍن نَ، شُرُ سٍ دّ مَدٌنيِ كٍرٍن بّ.

¹⁷نَ نَن عَ تٌشِ بَبَ عَلَ ﭑ شَنُشِ، بَرِ مَ ﭑ نَن ﭑ نِي قِمَ، عَلَكٌ ﭑ مَن شَ عَ رَ سُشُ.

¹⁸مِشِ شَ مُ ﭑ تَن نِي بَمَ دٍ، ﭑ تَن يّتّ يَتِ عَ قِمَ. نْي نَ ﭑ بّ، ﭑ شَ ﭑ نِي قِ. نْي مَن نَ ﭑ بّ، ﭑ شَ فبِلٍن عَ رَ سُشُ رَ. ﭑ بَبَ ﭑ يَمَرِشِ نَ نَن نَ.»

¹⁹يُوِقِيٍ مَن مُ نُ لَنشِ عٍ بٌرٍ مَ نَ مَسٍنيِ شَ قٍ رَ.

²⁰مِشِ فبٍفبٍ نُ عَ قَلَقٍ نّ، «حِننّ نَن نَ يِ قْشْ رَ. عَ بَرَ دَشُ. وٌ وٌ تُلِ مَتِمَ عَ رَ مُنقٍ رَ؟»

²¹كْنْ بٌورٍيٍ نُ عٍ يَابِمَ، «حِننّ نَ مِشِ نَشَن قْشْ رَ، عَ مُ وْيّنمَ يِ مْولِ رَ دٍ! كَ حِننّ نْمَ دْنشُي يَ رَبْودٍ؟»

²²شِنبٍلِ تّمُي تٌ نُ عَ رَ، دَرِ سَلَمُكَيٍ نُ نَ هْرْ مْبَنشِ رَبِ سَلِ نَن نَبَقٍ.

²³عِسَ نُ حّرّقٍ هْرْ مْبَنشِ يِرٍ ندٍ، دّننَشّ شِلِ «مَنفّ سُلٍمَنِ شَ بُنتُنيِ.»

²⁴يُوِقِيٍ نَشَ عِسَ رَبِلِن مّننِ، عٍ عَ قَلَ عَ بّ، «عِ سِيكّ بَمَ مُشُ مَ مُن تّمُي؟ شَ عِ تَن نَن قِندِشِ عَلَ شَ مِشِ سُفَندِشِ رَ، عَ قَلَ مُشُ بّ عَ قِيشّ رَ.»

²⁵عِسَ نَشَ عٍ يَابِ، «ﭑ حَن بَرَ عَ قَلَ وٌ بّ، كْنْ وٌ مُ لَشِ ﭑ نَ. ﭑ قٍ نَشٍيٍ رَبَمَ ﭑ بَبَ شِلِ رَ، نٍيٍ نَن قِندِشِ سٍيدٍحْشْيَ رَ ﭑ مَ قٍ رَ.

²⁶كْنْ وٌ مُ دَنشَنِيَشِ، بَرِ مَ ﭑ مَ يّشّييٍ شَ مُ وٌ رَ.

²⁷ﭑ فبٍ يّشّييٍ تَن ﭑ شُي مّمَ، ﭑ عٍ كٌلٌن، عٍ بِرَ مَ ﭑ قْشْ رَ.

²⁸ﭑ تَن عَبَدَن كِسِ نَن قِمَ عٍ مَ. عٍ مُ لْيمَ عَبَدَن، سٍسٍ مَن مُ عٍ بَمَ ﭑ يِ رَ.

²⁹ﭑ بَبَ، عَ تَن نَشَن عٍ سٌ ﭑ يِ رَ، عَ دَنفِ بِرِن نَ. سٍسٍ مُ نْمَ عٍ بَدٍ عَ تَن بَبَ عَلَ يِ رَ.

³⁰ﭑ تَن نُن بَبَ عَلَ، مُشُ بِرِن كٍرٍن.»

³¹يُوِقِيٍ مَن نَشَ فّمّيٍ تٌنفٌ، عٍ شَ عِسَ مَفْنْ عَ قَشَ شِلِ مَ،

³²كْنْ عَ نَشَ عَ قَلَ عٍ بّ، «ﭑ بَرَ وَلِ قَنيِ فبٍفبٍ رَبَ وٌ يَ شْرِ، نَشٍيٍ قَتَنشِ بَبَ عَلَ مَ. وٌ عَ قَلَ ﭑ بّ بَ، وٌ قَ وَشِ ﭑ قَشَقٍ ﭑ مَ وَلِ قَنيِ مُندُن مَ؟»

³³عٍ نَشَ عَ يَابِ، «مُشُ مُ عِ مَفْنْقٍ شّ عِ شَ وَلِ قَنيِ ندٍ شَ مَ. مُشُ عِ مَفْنْمَ عِ تٌ عَلَ رَ سْتْقٍ. عِ تَن عِبُنَدَ مَ وَشِ عِ يّتّ قِندِقٍ عَلَ رَ!»

³⁴عِسَ نَشَ عٍ يَابِ، «عَ مُ سّبّشِ شّ وٌ شَ سّرِيّ كِتَابُي كُي، عَ عَلَ عَ مَسٍن نّ، ‹ﭑ تَن عَلَ بَرَ عَ قَلَ، عَلَيٍ نَن وٌ رَ›؟

³⁵كِتَابُي شُي تَن مُ كَنَمَ. عَ شَ مَسٍنيِ قَشِ نَشٍيٍ مَ، عَلَ بَرَ عٍ شِلِ قَلَ، ‹عَلَيٍ›.

³⁶ﭑ بَرَ عَ قَلَ عَلَ شَ دِ نَن ﭑ نَ، كْنْ عَ مُ لَنمَ وٌ شَ عَ قَلَ ﭑ بَرَ عَلَ رَ سْتْ، بَرِ مَ بَبَ عَلَ ﭑ تَن نَن سُفَندِشِ، عَ ﭑ شّي دُنِحَ مَ.

³⁷شَ ﭑ مُ ﭑ بَبَ شَ وَلِيٍ شَ رَبَمَ، وٌ نَشَ لَ ﭑ نَ.

³⁸كْنْ شَ ﭑ عَ رَبَ، وٌ شَ لَ نَ وَلِ رَ، هَلِ وٌ مُ لَ ﭑ تَن نَ. وٌ شَ لَ ﭑ مَ وَلِ رَ، عَلَكٌ وٌ شَ عَ كٌلٌن عَ بَبَ عَلَ نَ ﭑ عِ، ﭑ قَن نَ بَبَ عَلَ عِ.»

³⁹عِسَ تٌ نَ قَلَ، مِشِيٍ مَن نَشَ كَتَ عَ سُشُدٍ، كْنْ عَ نَشَ مِنِ عٍ بّلّشّ.

⁴⁰عِسَ نَشَ فبِلٍن يُرُدّن نَاكِرِ مَ، عَ لُ مّننِ، يَيَ مِشِيٍ شُنشَ يٍ شْورَ قْلْ دّننَشّ.

⁴¹مِشِ فبٍفبٍ نَشَ سِفَ عَ يِرٍ، عٍ نُ عَ قَلَ عٍ بٌرٍ بّ، «عَننَبِ يَيَ تَن مُ تْنشُمَ مَكَابَشِ يٌ رَبَ، كْنْ عَ نَشَن بِرِن مَسٍن يِ شّمّ شَ قٍ رَ، عَ بِرِن قِندِشِ نْندِ نَن نَ.»

⁴²مّننِكَ فبٍفبٍ نَشَ دَنشَنِيَ عِسَ مَ.