قْلّ 2

¹كٌورٍ، بْشِ، نُن سٍ بِرِن دَا كِ نَن نُ نَ كِ.

²لْشْي سٌلٌقٍرٍ ندٍ عَلَ شَ وَلِ نَشَ كَمَلِ. عَ نَشَ عَ مَلَبُ.

³عَلَ نَشَ تِدٍ سَ نَ لْشْي سٌلٌقٍرٍ ندٍ مَ، عَ شَ قِندِ لْشْي سّنِيّنشِ رَ بَرِ مَ عَ عَ مَلَبُ نَ لْشْي نّ عَ شَ وَلِ كَمَلِشِ شَ قٍ رَ.

⁴تَرُشُي نَن يَ، دُنِحَ دَاشِ كِ نَشّ. مَرِفِ عَلَتَلَ بْشِ نُن كٌورٍ دَا تّمُي نَشّ،

⁵قْتْنيِ يٌ مُ نُ نَ. سَنسِ يٌ مُ نُ نَ نَشَن بُلَشِ بْشِ مَ بَرِ مَ مَرِفِ عَلَتَلَ مُ نُ تُنّ يٍ رَفٌرٌشِ سِندٍن. عَدَ مَ قَن مُ نُ نَ نَشَن بْشِ رَوَلِمَ،

⁶كْنْ يٍ نُ لُمَ مِنِ رَ بْشِ بُن، عَ قَ يٍنسٍن يّ يِرٍ بِرِن مَ.

⁷مَرِفِ عَلَتَلَ نَشَ عَدَ مَ يَءِلَن بّندّ رَ. نَ دَنفِ شَنبِ عَ نَشَ نِي رَ سٌ عَ قَتٍ عَ حْي كُي. عَ قِندِ عَدَ مَ رَ نَ كِ نّ.

⁸نَ شَنبِ مَرِفِ عَلَتَلَ نَشَ يِرٍ قَنيِ يَءِلَن سٌفٍتٍدٍ مَبِرِ. نَ يِرٍ شِلِ «عٍدٍن.» عَ نَشَ عَدَ مَ لُ مّننِ.

⁹مَرِفِ عَلَتَلَ نَشَ وُرِ مْولِ بِرِن نَبُلَ مّننِ، وُرِ تٌقَنيِيٍ، وُرِ نَشٍيٍ بٌفِ قَن عَ دٌن دَاشِ رَ. نَ يِرٍ تَفِ وُرِ قِرِن نُ نَ. كٍرٍن شِلِ «سِمَيَ وُرِ.» بٌورٍ شِلِ «قٍ قَنيِ نُن قٍ حَاشِ كٌلٌن وُرِ.»

¹⁰شُرٍ نَشَن يٍ رَ سٌشِ عٍدٍن كُي سَنسِيٍ بّ، عَ تٌ دَنفِشِ، عَ عِتَشُنشِ دْشْ نَانِ رَ.

¹¹نَ سِنفٍ شِلِ ثِسٌن. نَ نَن دَنفِمَ هَوِلَ بْشِ بِرِن مَ، شّيمَ نَ دّننَشّ.

¹²نَ شّيمَ قَن. وُرِ يٍ شِرِ حْشُنمّ قَن نَ نَ، عَ نُن فّمّ تٌقَنيِ نَشَن شِلِ عٌنِشِ.

¹³نَ شُرٍ قِرِن ندٍ شِلِ فِشٌن. نَ نَن دَنفِمَ كُسِ بْشِ بِرِن مَ.

¹⁴نَ شُرٍ سَشَن ندٍ شِلِ تِفِرِ. نَ نَن دَنفِمَ عَسُرِ بْشِ مَ عَ سٌفٍتٍدٍ بِرِ رَ. نَ شُرٍ نَانِ ندٍ شِلِ عٍقِرَتِ.

¹⁵مَرِفِ عَلَتَلَ نَشَ عَدَ مَ رَ سَبَتِ عٍدٍن، عَلَكٌ عَ شَ نْ نَ يِرٍ رَوَلِدٍ، عَ مَن شَ مّينِ نَ مَ.

¹⁶مَرِفِ عَلَتَلَ نَشَ يَامَرِ سٌ عَدَ مَ يِ رَ، عَ نَشّ، «عِ نْمَ يِ وُرِ بٌفِ بِرِن دٌندٍ نَشَن نَ عٍدٍن كُي،

¹⁷كْنْ عِ نَشَ ‹قٍ قَنيِ نُن قٍ حَاشِ كٌلٌن وُرِ› بٌفِ دٌن دٍ، بَرِ مَ عِ نُ نَ دٌن، عِ قَشَمَ نّ.»

¹⁸مَرِفِ عَلَتَلَ نَشَ عَ قَلَ، «عَ مُ قَن شّمّ شَ لُ بٍ عَ كٍرٍن. ﭑ قَمَ مَلِمَ قَنيِ دَالِدٍ عَ بّ.»

¹⁹بُورُنيِ سُبٍ بِرِن نُن شْنِ بِرِن مَرِفِ عَلَتَلَ نَشَن دَالِشِ بّندّ رَ، عَ نَشَ عٍ شَنِن عَدَ مَ شْن مَ عَ شَ عٍ شِلِ سَ. عَدَ مَ شِلِ نَشٍيٍ سَ عٍ شُن مَ، نٍيٍ نَشَ قِندِ عٍ شِلِيٍ رَ.

²⁰عَ نَشَ شُرُ سٍ بِرِن، شْنِ بِرِن، عَ نُن بُورُنيِ سُبٍ بِرِن شِلِ سَ.

²¹مَرِفِ عَلَتَلَ نَشَ شِ شْلِ رَدَنفِ عَ مَ. عَ نَشَ عَ رَشِ عَ قَنيِ رَ. عَ تٌ شِ، مَرِفِ عَلَتَلَ نَشَ عَ فَنيَنيِ شْرِ كٍرٍن بَ، عَ قَ مّننِ رَفَلِ.

²²نَ شَنبِ، مَرِفِ عَلَتَلَ نَشَ عَدَ مَ فَنيَنيِ شْرِ قِندِ فِنّ رَ، عَ قَ نَ فِنّ قِ عَدَ مَ مَ.

²³عَدَ مَ نَشَ عَ قَلَ، «يِ فِنّ قَتَنشِ ﭑ شْرِ نُن ﭑ سُبٍ نَن نَ. عَ شِلِ نّ ‹فِنّ›، بَرِ مَ عَ مِنِشِ شّمّ نّ عِ.»

²⁴نَ قٍ نَ عَ تٌشِ، شّمّ قَمَ نّ كٍلِدٍ عَ بَبَ نُن عَ نفَ شُن مَ، عَ مَسٌ عَ شَ فِنّ رَ، عٍ قِندِ كٍرٍن نَ.

²⁵شّمّ نُن عَ شَ فِنّ مَفٍلِ نَن نُ عَ رَ، كْنْ نَ قٍ يَافِ مُ نُ عٍ مَ.