Titus 2 — Pathien Lekhabu Inthieng Chongtung Thar | Bíblia online

¹Aniatachu, nangma'n chu chongrin adik vai kêng ni minchu ngêt rang.

²Putarngei chu hangvanga oma, roijêkthei, le indînthei; taksônna diktak dôn mi, lungkham, le tuongdierna dôn mi ni rangin minchu ngei sabak roh.

³Ma angdên han pitarngei khom an nupang nunchan rieta, ringnun inthienga om rangin minchu ngei roh. Mi êro ngâi le ju suok nitet no rese ngei. Asa ngêt hah minchu rese ngei,

⁴nuvengte avâng uol ngei hah an lômpa le an nâingei lungkham rang, ti rilminchu theina rangin,

⁵indîntheina le inthârna, le insûng cherêlnu satak, an lômpangei chong nuoia omngei, hanke tutên Pathien chongngei misîr minsiet noni ngei.

⁶Ma angdên han ruothartengei khom indînthei rangin mohôk ngei roh.

⁷Nangma vâng chu neinun nâma nunchan minenna satak ni ni ngêt rang. Ni minchuna ngei han khom miritomtak le takintâitakin tho roh.

⁸Chongbâi thum tak, dem theiloi chong hah mang roh, hanke na râlngei han ei chungroia ite asie ti rang dôn noni ngeia, inzak an tih.

⁹Suokngei chu an pungei rachamtakin om rang le neinunnâma an pungei râiminsân rang ani. An pungei an makhal ngei rang reng nimaka,

¹⁰an pungei neinun khom an muruk rang nimak. Manêkin chu, an satna le an taksônomna minlang tit ngêt rangin minchu ngei roh, hanke mi Sanminringpu ei Pathien minchuna roi luttie hih an sinthona nâma an minlang rang ani.

¹¹Mi nâmin sanminringna an man theina rangin Pathien moroina hah minlang ani.

¹²Ma moroina han, Pathien minlut jôtloi le rammuol ôinangei mâkraka, hi rammuola hin indîntaka om le diktak le Pathien minlut jôta ringnun mang rangin mi rila,

¹³ei lei ngâk ei Pathien roiinpuitak le Sanminringpu Jisua Khrista2:13: Ei Pathien roiinpuitak le Sanminringpu Jisua; aninônchu Pathien roiinpuitak le mi Sanminringpu Jisua Khrista. chôiminsânga, a juong inlâr rang satvur Nikhuo ei sabei anghan.

¹⁴Ama nanâkin eini rangin ânpêka, phuoloinangei nâm renga mi mojôka, male ama ata tatak vai ni rangin mi minthienga, sin sa tho rangin mi nuom tatak ani.2:14: Lap 130:8; Jôk 19:5; Bal 4:20; 7:6; 14:2; 1 Pet 2:9

¹⁵Ma neinunngei hih minchu ngei inla, no chong rangâi ngei hah na rachamneina nâm mangin mohôk ngei inla, ngo ngei roh. Tutên nang enminnuoi no rese ngei.