John 20 — Pathien Lekhabu Inthieng Chongtung Thar | Bíblia online

¹Pathienni jînga, ala jîng mumuokin, Mary Magdalene thâna a sea, thân kotbâia lung hah muluoipai saiin ava mua.

²Simon Peter le ruoisi dang Jisua'n a lungkham ngâipu, kôm han a tâna, male an kôm, “Thân renga Pumapa hah an lâk paia, male an darna riet khâi mak me,” a tia.

³Hanchu Peter le ruoisi dang hah thâna an sea.

⁴Anruonin an tâna, aniatachu ruoisi dang hah Peter a khêl pita thâna a tung masa ani.

⁵Ân kûna male puoninnêm zuot a mua, hannirese asûnga chu lût mak.

⁶Anûka Simon Peter a juonga male thân sûnga a lût pata. Puoninnêm zuot chu a mua

⁷male Jisua lu tuomna puon ha chu puoninnêm zuot leh munkhatin om loiin atheia ânzuotin ava mua.

⁸Hanchu ruoisi dang, thâna tung masapu khom hah ava lûta; a mua male a iem zoi.

⁹(Pathien lekhabu'n thina renga lân thoinôk atih, ti hah la riet thei uol mak ngei ani.)

¹⁰Hanchu ruoisingei hah an ina an kîr nôk zoi.

¹¹Mary chu chap pumin thân pêntieng ândinga, chap chungin ân kûna, thân sûng a vênga

¹²male vântîrton inik angoia invôn Jisua ruok an min jâlna luthun tieng inkhat kethuon tieng inkhat an insung a mua.

¹³Ha ngei han, “Nupangnu, ithomo na chapa?” tiin an rekela.

¹⁴Hanchu amanu ha a hônheiin chu mahan Jisua ânding a mua; hannirese amanu ha Jisua ani tiin riet mak.

¹⁵Jisua'n a kôm, “Nupangnu, ithomo na chapa? Tumo no rok?” tiin a rekela.

¹⁶Jisua'n amanu kôm han, “Mary!” a tia.

¹⁷Jisua'n amanu kôm han, “Mi mutu sôt no roh, asikchu ka Pa kôm la se nôk mu-ung. Hannirese ka lâibungngei kôm sênla, ka Pa an Pa, ka Pathien an Pathien kôm ki kîr nôk rang ani zoi tiin va ril ngei roh,” a tia.

¹⁸Masikin Mary Magdalene hah a sea, male Pumapa a mu tie le an inkaina a ril ngei hah ruoisingei ava misîr pe ngei zoi.

¹⁹Ha Pathienni kholoia han, Juda rachamneipungei an chi sikin ruoisingei hah insûnga inkhâr kalin an intûpa. Hanchu Jisua a honga an lâia ândinga, “Nin lâia rathânngamna om rese!” a tia.

²⁰Mahi a ti suole chu a kutngei le a kângrâm a min mu ngeia. Pumapa an mua, ruoisingei ha râisânnân an sip zoia.

²¹Avêlin Jisua'n an kôm, “Nin chunga rathânngamna om rese. Pa'n mi tîr anghan kei khomin nangni ki tîr ani,” a tipe ngeia.

²²Hanchu ratha a mûtkhum ngeia male an kôm, “Ratha Inthieng man roi.

²³Mingei sietnangei khom nin ngâidam kai chu ngâidamin om an ta; nin ngâidam loi kai chu ngâidamin om no ni ngei,” a tia.20:23: Mat 16:19; 18:18

²⁴Jisua a hong lâihan ruoisi sômleinik ngei lâia Thomas (Ânphîr an ti) ha chu an lâia omaka.

²⁵Masikin ruoisi dangngei han, “Pumapa kin mu zoi!” an tipea.

²⁶Hapta khat suole chu ruoisingei hah insûnga an intûp nôka, Thomas khom an kôm a om sa. Inkhârngei hah an kala, aniatachu Jisua a honga, an lâia ândinga, an kôm, “Nin chunga rathânngamna om rese,” a tia.

²⁷Hanchu Thomas kôm, “Nu kutruol leh mahin khîk inla, male ku kutngei hi en roh; hanchu ka kângrâm khom nu kut sônin pûr inla tôn roh. Iemzoiloiin om khâi nônla, male iem ta roh!” a tipea.

²⁸Thomas'n a kôm, “Ku Pumapa le ka Pathien ni ni!” tiin a thuona.

²⁹Jisua'n a kôm, “Mi ni mu sika ni iem mini? Mi mu loia mi iem ngei chu satvur ani bak na!” a tipea.

³⁰Jisua'n a ruoisingei mitmu chunga sininkhêl dang tamtak ngei a thoa, mangei hah hi lekhabu sûng hin miziek nimak.

³¹Hannirese Jisua hih Messiah, Pathien Nâipasal ani ti nin iem20:31: iem; miziek senkhat ngei an dôn chu iem titna rangin. theina rang le ama nin iemna sika ringna nin dôn theina ranga hingei hi chu miziek ani.