Galatia 6 — Pathien Lekhabu Inthieng Chongtung Thar | Bíblia online

¹Ka malngei, mi tumakhatin nunsie sinin in ôk senla, nangni ratha mingeiin nin mindik rang ani; hannirese, mulung innêm takin nin tho rang ani. Nangni khom huongna han nin lût sa loina rangin in enchak roi.

²Nin puokpêl insan inlôm roi; hanchu Khrista balam nin jôm nîng atih.6:2: nin jôm nîng atih; miziek senkhata chu jôm ani.

³Nangman ite ni tetloia milien takin nênbên chu nethena ânhuong ni ni.

⁴Nin sin tho chit injêk bak ungla. Asa anin chu, mi sintho leh mintêk loiin, maleh nin sin thoa han insong thei nin tih.

⁵Nin rêngin nin puok chit nin pêl rang sikin.

⁶Nangma hah Khristien chong minchuna changpu ninia anînchu neinun sa no dôn murdi nang a minchupu kôma han ne sem sa rang ani.

⁷Nin theiin inhuong no roi; tutên Pathien a môh mintum no roi. Nu tu tak hah na ât rang ani.

⁸Na taksa ngâituina tienga nerthên chu thina hah ât na ta, Ratha tienga nu tua anînchu na ratha han kumtuong ringna hah ât atih.

⁹Masikin sin sa sin sôl no ih, ei mâk nônchu a ât zora la hong tung ngêt a tih.

¹⁰Ma anghan zora sa ei man dôr han mitin chunga sin sa sin ei ti u, aliekin taksônna han ei inmi ngei chunga sin uol ei ti u.

¹¹Keima kut ngêta nin kôma inrolbura ki miziek hih en ta u!

¹²Sertan ranga nangni pût ngâingei hah apêntieng korong minlanga, ânpâk nuomngei hah an ni. An tho ngâi nikhomrese, Khrista khros sika nuomlona an jôkna rang papaia an itho ngâi ani.

¹³Sertan ngei luo khomin Balam hah jôm ngâi makngei; taksa balama nin inpêk tia an insong theina rang ser nangni mintan nuom kêng an ni.

¹⁴Nikhomresea, keiman rang chu, ei Pumapa Jisua Khrista khros vai song ki tih, ha a khros jâra han rammuol hih ka rangin jêmdelin a om zoia, kei khom rammuol rangin jêmdelin ko om zoi.

¹⁵Miriem insintharna tiloi chu sertan le tanloi ite nimak.

¹⁶Male an ringnuna ma balam a jûi ngei chunga le Pathien mingei chunga inngêina le moroina om rese!

¹⁷Amongna rangin: atûn pêna chu tutên mimintak khâi no rese; isikamo ei tiin chu ka takchunga sabe hin Jisua suok kini hih a minlang ani.

¹⁸Ka malngei ei Pumapa Jisua Khrista moroina hah nin rênga kôma han om rese. Amen.