1 Thessalonika 5 — Pathien Lekhabu Inthieng Chongtung Thar | Bíblia online

¹Lâibungngei le sarnungei, ha neinunngei juongtung rang zora le nikhuo chungroi chu nangni miziek pe rang nâng mak.

²Pumapa Nikhuo chu jâna inru hong ngâi anghan juongtung atih, ti nangni rengin nin riet minthâr ani.5:2: Mat 24:43; Luk 12:39; 2 Pet 3:10

³Mingeiin, “Ningbeiriem le jôkna,” zorân an bê lâitakin inningloiin an chunga sietminmangna juong dê ngei a ta! inningloia nupang chunga nâiha ahong tung anghan nîng atih, male mingei hah rotpai thei noni ngei.

⁴Aniatachu, lâibungngei le sarnungei, nangni chu ijînga om mak choia, male ma Nikhuo han inru angin nangni dêrak no nih.

⁵Nin rêngin avâra mi le sûna mi nin ni. Jâna mi le ijînga mi nimak me.

⁶Masikin midangngei anghan in no u; meng ei ta, male hangvangin om ei ti u.

⁷Jâna kêng mingei an in ngâi; jâna kêng ju khom an inrûi ngâi.

⁸Hannirese eini chu sûna mi eini sika hin taksônna le lungkhamna rôppho hah hakin, male sanminringna sabeina hah lukhum anghan mangin hangvangin om ei ti u.5:8: Isa 59:17; Eph 6:13-17

⁹Pathien'n a taksina tuong rangin mi thang maka, ei Pumapa Jisua Khrista jâra sanminringna chang rangin mi thang ani,

¹⁰a juong tika ei lei ring innom, ei lei thi innom ama leh munkhata ei om theina rangin ei ruthûlin ama a thi ani.

¹¹Masikin inkhat le inkhat inmohôk ngâi ungla, inkhat le inkhat insan inlôm ngâi roi, atûna nin tho ngâi anghan.

¹²Ka lâibungngei le sarnungei, nin lâia sin dûktonga khristien ringnuna nangni ruoi ngei le nangni minchu ngei hah asadima nin jâ ngei rangin nangni kin ngên ani.

¹³An sintho sika han lungkham ngei ungla, jâna lientak pêk ngei ungla. Nin lâia inngêi-irrin om roi.

¹⁴Kin lâibungngei le sarnungei, mithaboi ngei hah rokôk ungla, mulungchîn ngei hah mohôk ungla, mirâtloi ngei hah san ungla, mi murdi chunga nin phûk min-uoi roi, tiin nangni kin ngên ani.

¹⁵En roi, tukhom asaloi chu asaloi nanâkin thuon no ungla, zoratin inkhat le inkhat chunga sin sa tho pe inlôm rang le mi murdi chunga khom tho rangin khîna sin roi.

¹⁶Râiminsân tit ungla,

¹⁷zoratin chubaitho ungla,

¹⁸i-ih chunga khom râisânchong misîr ngen roi. Ma hih Khrista Jisua leh nin inzoma nin tho ngâi ranga Pathien'n nangni a nuom ani.

¹⁹Ratha Inthieng khan no roi;

²⁰inmohôkna thurchingei mumâk no roi.

²¹Neinunngei murdi en minsin ungla: asa kai chu pom tit ungla

²²male asaloi murdi renga chu inkêm roi.

²³Inngêina mi pêk ngâipu Pathien han lam tina nangni minthieng senla, ei Pumapa Jisua Khrista a juong tika nin ratha, nin mulungrîl, takpum le theiloina ngei murdi renga le nin pumin nangni mojôk rese.

²⁴Nangni koipu hah taksônom ani sikin, tho khom thông atih.

²⁵Lâibungngei le sarnungei, keini rang khom chubai mi tho pe roi.

²⁶Iempungei murdi hah intum inthiengin leh chibaimûk ngei roi.

²⁷Hi lekhamuthuon hih iempungei murdi kôm pore rangin Pumapa rachamneinân nangni ke ngên ani.

²⁸Ei Pumapa Jisua Khrista moroina hah nin kôm om rese.