1 Korinth 16 — Pathien Lekhabu Inthieng Chongtung Thar | Bíblia online

¹Atûn chu, Judea rama Pathien mingei ranga chôiruol chungroi nin miziek anghan. Galatia koiindangngei kôma ki ril anghan nangni khom lei tho ngêt sa roi.16:1: Rom 15:25,26

²Masikin ko hong tika chôiruol rusuong anâng loina rangin, Pathienni tinna nin sisika nin sum suo ngei renga hah khâi ngêt ungla, male lei dar roi.

³Ko hong suole, nin neinunpêkngei chôia Jerusalema se ranga nin thangpu ngei hah mêlinrietna lekhangei min chôiin tîr ngei ki tih.

⁴Hanchu ke se ranga ânhoi ani vângin chu keima leh mên ruoipui thei an tih.

⁵Macedonia rama ka chai rang anâng sikin Macedonia rama ka chai suo tika nin kôm hong ki tih.16:5: Sin 19:21

⁶Nin kôm chu asôtzan om ki tih, phalbi sûng kai khom anithei, kho-kho tieng khom apêna ke sena ranga ma san thei nin tih.

⁷Atûna selampala nangni mu rang chu nuom mu-unga; Pumapa'n aphal ngâiin chu nin kôm zora sôtzan châm rangin kên sabei ani.

⁸Ephesi khuo hin Pentecosni tena chu ko om rang.16:8: Och 23:15-21; Bal 16:9-1116:8-9: Sin 19:8-10

⁹Mahan mi doipungei tamtak om khom rese ngeia, sin roiinpuitak le sin kâmomtak ki sin theina ranga zorânchum tak aom ani.

¹⁰Timothy hah nin lampui tieng a hong duoia anînchu, chi tet loia nin kâra aom theina rangin lamdon lei tho roi, keima angin Pumapa sin a tho ngâi sikin. 16:10: 1 Kor 4:17

¹¹Tutên enkhum no rese ngeia, phûkdâitakin ko kôm a hong kîrnôk theina rangin san ngêt ungla mojôk roi; iempungei leh munkhata hong rangin ka lei sabei kêng.

¹²Atûn, ei lâibungpa Apollos chungroi chu, iempu dangngei leh munkhatin nangni hongpan rangin ko mohôk tita, hannirese ama hih ma vêl hin chu hong rangin la minnuom phar16:12: ama hih la minnuom phar nimaka; aninônchu Mahi anrêngin Pathien lungdo ni let mak. nimaka. Nikhomrese zorânchum a man tika hong atih.

¹³Intûngchienin om ungla, taksônna han inding det ungla, hâi ungla, râttakin om roi.

¹⁴Nin sin ngei murdi hah lungkhamnân sin roi.

¹⁵Ka lâibungngei le sarnungei, Stephanas le a inmingei chungroi hah nin rieta; anni ngei hah Achaia rama Khristien chang masatak an nia, Pathien mingei chuonsin ranga inpêk an nia, 16:15: 1 Kor 1:16

¹⁶ma anga mingei ruoipunina, le tumakhat khom anni leh chuonsin ngâingei le sintho ngâingei chu an chong jûi rangin nangni ke ngên ani.

¹⁷Stephanas, Fortunatus, male Achaicus ngei; an hong hih asân ka râiasâna nin omloi khom indang loiin min donsûia

¹⁸male nin mulungrîlngei nangni an minhar pe anghan, kei khom min minhar kêng. Ma anga mingei hih minlut rang rohoi piel an ni.

¹⁹Asia ramhuol sûnga koiindangngei hin an chibaingei nangni an hong muthuona; Aquila le Priscilla male an ina koiindang inkhôm ngâingei hin Khristien chibaimûknangei nangni an hong muthuon.16:19: Sin 18:2

²⁰Hi muna iempungei murdi khom chibaimûknangei nangni an hong muthuon.

²¹Keima ku kut lelên mahi ki miziek ani: Paul renga chibaingei hi.

²²Tukhom Pumapa lungkham mu loi ngei chu an chunga khomâksâmna om rese!

²³Pumapa Jisua moroina hah nin kôm om rese.

²⁴Khrista Jisua sika nangni ku lungkhamna chu nin rênga nin kôm om rese.