1 Korinth 10 — Pathien Lekhabu Inthieng Chongtung Thar | Bíblia online

¹Ka lâibungngei le sarnungei, ei richibulngei Moses jûingei chunga neinun atung hah nin riet bang rangin ku nuom ani. Anrêngin sûm thupna nuoia an om rieia hoiriemin Tuipui Sen varâl an kâi ani.10:1: Jôk 13:21-22; Jôk 14:22-29

²Sûm le tuipuia han Moses nûkjûingei nitheina rangin anrêngin baptis changin an om ani.

³Anrêngin rathatienga bu munkhatin an nêka,10:3: Jôk 16:35

⁴munkhatin rathatienga tui an nêka. Anni ngei leh sepuipu rathatienga lungpui renga tui an nêka; ma lungpui hah Khrista ani.10:4: Jôk 17:6; Tel 20:11

⁵Aniatachu an lâia mi tam uol chunga chu Pathien mulunghoi maka, ramchâra han an ruok ânzamnung ani.10:5: Tel 14:29,30

⁶Atûn, ma ngei hah eini ranga minenna ani, neinun saloi ngei an ngâitui angin ei ngâitui loina rang le10:6: Tel 11:4

⁷an lâia mi senkhat mirimilngei an biek angin ei biek loina rangin. Pathien lekhabu'n, “Mingei ha ruolhoia sâk rangin an insunga, hannirese junêk le indit hoiinhâinân an inlet nôk” ati angin.10:7: Jôk 32:6

⁸An lâia mi senkhatin inditnasaloi an songa, sûnkhat sûngin mi isâng sômnikleithum an thi anghan eini chu inditna saloi song no uh.10:8: Tel 25:1-18

⁹An lâia mi senkhat Pumapa10:9: Pumapa; miziek senkhat ngei an chu dôn Khrista. an minsina, murûlin amuchuk that ngei ok anghan minsin no uh. 10:9: Jôk 21:5,6

¹⁰An lâia mi senkhat Pathien kôm an chiera, Thina Vântîrtonin a minmang ngei anghan chier no uh.10:10: Tel 16:41-49

¹¹Ma an chunga neinun tung ngei murdi hah midangngei rangin minennangei ania, eini zora monga lêng ngei inningna ranga mangei ha miziek ani.

¹²Adettaka inding nin ni tiin nin mindonin chu nin inlet loina rangin indîn roi.

¹³Huongna nin tong ngei murdi hah mingei tuong ngâi tena ani. Pathien chu a chonginkhâma iem aom sikin nin phari loi rang dôr chu huongna nin tong rang phal no nih; huongna nin tuong zorân tuongdierna ranak nangni pêk a ta, male huongna jôkna lampui khom nangni sin pe atih.

¹⁴Masikin, ku ruol moroitak ngei, mirimilngei biek hih mâk ta roi.

¹⁵Arietvar mingei kôma misîr anghan nin kôm ki misîr ani; ku thurchi misîr hih mindon roi.

¹⁶Satvurna khuri chunga Pathien kôm râisânchong ei misîr ngâi: ei nêkin Khrista thisen hah ên sempuina ani. Male vâipôl ei khoi ngâi ha: ei sâk khom hih Khrista takpum ên sempuina ani.10:16: Mat 26:26-28; Mk 14:22-24; Luk 22:19-20

¹⁷Vâipôl hih tâpkhat ani angin, eini hih mi tamtak ni khom ila, vâipôl tâpkhat renga ei rêngin ei chang pak sikin takpum inkhat ei ni.

¹⁸Israel mingei hah en ta u, inbôlna neinunpêka om sâk ngei han mâichâma Pathien sin hah an insempui ani.10:18: Och 7:6

¹⁹Mirimil aninônchu a kôma sâk pêka om hah neinun kâmom ki tina mo?

²⁰Nimak! ki ti chu sonongngei mâichâmngeia inbôlna hah Pathien kôm niloiin ramkhoringei kôm kêng an pêk ani. Ramkhoringei leh lôminchang rangin chu nangni phal tet mu-ung.10:20: Bal 32:17 (LXX)

²¹Pumapa khuri le ramkhoringei khuri nêk molop thei no tunui; Pumapa dosâng le ramkhoringei dosâng khom sâk molop thei no tunui.

²²Aninônchu Pumapa hah ei min nuor rang mo? Ama nêka rât uolin ên be mini?10:22: Bal 32:21

²³“Jâttin tho thei rangin phal ei ni,” an ti anghan. Adik, hannirese jâttin nâm sa let mak. “Jâttin tho thei rangin phal ei ni,” aniatachu jâttin hi satna ni let mak.10:23: 1 Kor 6:12

²⁴Tutu khom athei vaia satna rang vai rok loiin midang satna rang rok rese.

²⁵Me bazara an zuor kai chu ite rekel loiin nin sielesarietna sikin sâk roi.

²⁶Pathien lekhabu'n, “Pilchung le asûnga omngei murdi hih Pumapa ta ani,”10:26: Lap 24:1 ati sikin.

²⁷Sonong inkhatin bunêk rang nangni a sielin se ta ungla, nangni a do kai chu rekel tet loiin nin sielesarietna sikin sâk roi.

²⁸Aniatachu tumakatin, “Hi sâk hih mirimil kôma pêksai ani,” tiin nangni a rilin chu nangni rilpu sik le ama sielesarietna sikin sâk no roi

²⁹ma hih nin sielesarietna ki ti nimaka, midangngei sielesarietna ki ti kêng.

³⁰Ka sâk chunga Pathien kôm râisânchong ki misîr sai piel ha irang mo mîn min la êro ngâi hi?”

³¹Asa, ma anghan nin sin murdi, nin sâk le nin nêk murdi, Pathien roiinpuina rangin tho roi.

³²Judangei, Jentailngei le Pathien koiindangngei ta ranga bâiinkhamna nin niloina rang lam takin om roi.

³³Ko tho angtak hin tho roi; Keima rang satna rok loiin, sanminring an ni theina ranga mi murdi satna rang rokin, ki sinthona nâma mi murdi râiminsân rangin ki mindon ngâi ani.