1जेवी आराम माय रिगणेन वायदो एवी वोर हे, ते आपुह बिणे जुवे, ओहलो नाय एय काय तुमरे माय रेन कुण बी ताह रेन एंजाणल्यो रेय जाय।
2आपुह बी ताच ने गेत हाजाली खुबेर केणेन आयेल एती, पुण होमलेल वचना केरीन ताह काईच फायदो नाह ईनो, काहाकाय होमेलणारान मोना माय बोरहा हेऱ्यो नाह बोहनो।
3पुण आपु जा बुरहो किरेल हेते, ता आराम माय रिगतेह। जीहे तु कियेल ईतो:
4काहाकाय हातवा दिह्यान बाराम वचन ज्य कियेल हे: “बोगवान हातवे दिह तान आखो काम निवरावीन आराम किरेल।”
5एक वारीन उंजु ज्याच बागाम पोशो किथे, “ता मार आराम माय रिग नाय सेकती।”
6जेवी ज्यी वात बाकी हे काय कोलाक उंजु हेते जा ता आराम माय रिगती, एने ताह तान हाजाली खुबेर पेल होमलायेल ता उकुम नाह मान्या केरीन ता माय नाह रिग्या, पुण एवी बी दिहरान केरता आराम ने बायणो उगड़ो हे।
7तानकेरीन तो ईखेह खाज दिह्याह ठेरावीन ओलाक दिह्यान पासाण दाऊद ने पुस्तेक माय ताह “आज ने दिह” किथे। जीहे पेल केवाय जायेल एतो,
8केदी यहोशु ताह आराम माय रिगाड़ लितो, जान बाराम बोगवान वायदो किरेल ईतो, ते बोगवान ज्यान पासाण दिहरा दिह्यान बाराम नाय कितो।
9ते जो बी एय, जिहकेरीन बोगवान हातवे दिह आराम किरेह, तिहेस केरीन बोगवानान माणहान केरता तो एक आराम बाकी हे।
10काहाकाय जो तान आराम माय रिगेल हे, तो बी बोगवानान गेत तान काम पुरो केरीन आराम केरती।
11केरीन आपु ता आराम माय रिगणेन कोसीत केरने जुवे, ओहलो नाय एय काय एगदाह तान गेत उकुम नाह मानेन डेंड बोगणे पोड़ जाय।
12काहाकाय बोगवानान वचन जीवतालो एने ताकेतवालो हे, एने दुयदारी तेलवारीह रेन बी जुलूम तेज हे; एने जीव एने जीवाह, एने गाठ गाठ एने गोदा गोदाह आंगे केरीन आरा पार कोरने। एने मोनान आसा एने विचारान नियाव किरेह।
13केलीन काल्ली बी वोस्तु बोगवानान नेजरी मा लिकायेल नाह सोती, तान डोलान सामने जाह आपुह लेखो जोखो आपणु हे। एकेक वोस्तु बिगेर लिकायेल उगाड़ली हे एने काल्ली बी लिकायेल नाह सोती।
14जेवी आपणो उहलो मुखी चाकर्यो हे, जो हेरगाम रेन आयेल हे, मतलब बोगवानान बिटोख यीशु, ते आवो, आपु आपणा बोरहा माय मोजबुत बोणीन रेता।
15काहाकाय आपणो उहलो मुखी चाकर्यो नाह सुतो जो आपणी कोमजोरी माय आपु हिऱ्यो दुखी नाय एय सिके, पुण तो आखी वातु माय आमरे गेत पारखाय ते जायेल, तीबी विण पाप निकेलनु।
16केरीन आवो, आपु गीण ने राजगादिन आहने ईमोत बांदिन चालहु काय आपु पोर किव एय, एने ती गीण सापड़ावहु जो गिरेज ने बुखेत आपणी मोदेक केरी।