प्रेरितान काम 3

¹एक दिह पतरस एने योहान हिराणेन तीन वाजता विन्ता केरनेन टेम माय उपेर मोंदिराम जाणे बाजरियेल एता।

²तेवी पायदासीर एक लेंगड़ो माणुह सुंदर नावान बायणा हेऱ्यो बोह रियेल एतो। एने ताह ता दाड़ीन मोंदिरान बायणा पोर बोहाड़ देताला काय तो मोंदिर माय जाणारा फाय बिख मांगे

³जेवी तो पतरस एने योहानाह मोंदिराम जाताला दिख्यो, तेवी ता फाय बिख मांग्‍यो।

⁴तेवी पतरस एने योहान ताह हास केरीन देख्या, एने पतरस केयो, “आमरी उगे देख!”

⁵तेवी तो ता फाय काय तीबी जुड़ी केरीन आसा केरीन तान उगे देखणे बाज गीयो।

⁶पुण पतरस ताह केयो, “होनो चांदी ते मार फाय नाह सोतो, पुण जो मार फाय हे तो तुवाह आपथु: यीशु मसी नासरीन नावाम चाल फिर!”

⁷एने पतरस तान जीवड्यो आथ देरीन उठाड्यो। एने चालोच तान पाय एने मांडा माय ताकेत आव गियी;

⁸तेवी तो उसलीन उबरेय गीयो, एने चालने फिरने बाज गीयो, एने चालते कुदतेन बोगवानान बोड़ाय केरतीन ता हिऱ्यो मोंदिराम गीयो।

⁹आखा माणहे ताह चालतालो फिरतालो एने बोगवानान बोड़ाय केरतालो देखीन,

¹⁰ताह ओलखी लेदा काय ज्यो ते तोस हे जो मोंदिर ने सुंदर नावान फाटेक पोर बोहीन बिख मांग्‍या केरतालो, जी गेटना ता हेरी ईयेल एती ता जुलूम बोंगलायीन एने ताह जुदोच लागो।

¹¹जेवी तो पतरस एने योहानाह देर रियेल ईतो, तेवी आखा माणहे बोंगलातेन ता सुलेमानान खोली केवातालो, ता दोवड़ीन आवा।

¹²ज्यो देखीन पतरस माणहाह केयो, “एय इस्राएली माणहे, तुमू ज्या माणहाह देखीन काहा बोंगलातेह? एने आमरी उगे इही केरीन काहा देखतेह? जीहे काय आमुच आमरी ताकेत केरीन एने बोक्ती केरीन ज्याह चालने फिरनेन बाराबोर बाणाव देना।

¹³अब्राहाम, इसहाक, एने याकुबान एने आपणा बाप दादान बोगवान तान चाकऱ्या यीशुन बोड़ाय केऱ्या। जाह तुमू देराव देना, एने पिलातुस ताह सोड़ देणेन विचार केरतालो, तेवी तुमू तान सामने तान नाकार केऱ्या।

¹⁴3:14 मत्ती 27:15-23; मरकुस 15:6-14; लुका 23:13-23; योहान 19:12-15तुमू ता चोखाला एने देरमीह नाकार केऱ्या, एने विन्ता केऱ्या काय एक खुनीह तुमरी केरता सोड़ाय जाय।

¹⁵एने तुमू जीवाय आपणारा अगुवाह मार टाक्या, पुण ताह बोगवान मुरेल माय रेन जीव उठाड्यो एने ज्यी वातीन आमु गोवा हेते।

¹⁶एने तास ने नाव, ता बुरहो केरीन जो तान नावा माय हे; ज्या माणहाह तुमू देखतेह एने जाणतेह बी, ताह यीशुन नावाम ज्यी ताकेत आपेल हे।

¹⁷“एवी एय बाय बोणहा, मी जाणथो काय ज्यो काम तुमू बिगेर जाणीन केऱ्या, एने तिहेच केरीन तुमरा आदिकारी बी किरेल हेते।

¹⁸पुण ज्‍यु वातुह बोगवान आखा बोगवानान उगे रेन बोलनारान मुया केरीन पेलुच केय दियेल ईतो, काय तान मसी दुख वेठी, एने ताह तो इहकेरीन पुरो किऱ्यो।

¹⁹तानकेरता मोन बुदलो एने पाप केरनेन सोड़ो, काय तुमरा पाप मिट जाती,

²⁰काहाकाय आत्मिक सान्तीन टेम मालीक फाय रेन आवी, एने तो यीशुह मोकली, जो तुमरी केरता पेलुच रेन मसी ठेराय जायेल हे।

²¹जोरेवरी हे काय हेरगा माय ती टेम वोर रेय, जाह वोर तो आखी वातुह पेल ने गेत नाय केर लेय, जान चेरचा जुनाला कालाम रेन बोगवान तान चोखाला जाणकारान मुया केरीन कियेल हे।

²²3:22 तो माहु जिहकेरीन मुकलेल हे; नाहते मार गेत।जिहकेरीन मुसो कियेल हे, ‘मालीक बोगवान तुमरा बायाख माय रेन तुमरी केरता मार गेत एक जाणाव केरन्याह उबो केरी। जो काय तो तुमूह केय, तान तुमू होमेलज्यो।

²³जो बी जाणाव केरनारान नाय होमली, तो बोगवानान माणहाम रेन खेतेम केराय जाय।’

²⁴पोशो शमुएल वोर रेन ते तान पासाण वोर जोला जाणाव केरनार बुलील एता, ता आखा ज्या दिह्यान बाराम खुबेर देना।

²⁵तुमू जाणकारान सोरा एने ता वायदान बागी हेते, जो बोगवान तुमरा बाप दादा हिऱ्यो बांदिल ईतो, अब्राहामाह केयो, ‘तारा वोसी केरीन देरतीन आखा गेराणान माणहाह बोरकेत जुड़ी।’

²⁶बोगवान तान चाकऱ्याह मुरेल माय रेन जिवाड़ेन पेल तुमू फाय मोकलेल हे, काय एकेक आखाह खाराबी माय रेन फिरावीन बोरकेत आपी।”