मरकुस 1

¹ज्य बोगवानान बेटाख यीशु मसीन, हाजाली खोबरीन सुरवात हे।1:1 थोड़ाक लेख माय बोगवानान बिटोख नाह लिखेल हे।

²जिहकेरीन यशाया जाणकारान पुस्तेक माय लिखेल हे:

³उजाड़ी माय एक आयेड़नारान आवाज होमलानो,

⁴तानकेरता बपतीस्मा केरनार योहान उजाड़ी माय आवीन बपतीस्मा, एने पारचार केरतालो देखानो। एने माणहाह केयो, “पाप केरने सोड़ो एने बपतीस्मा लिवो, काय बोगवान तुमरा पाप माफ केरी।”

⁵यहुदिया देसान ईलाका माय रेणारे आखा माणहे, एने यरूशलेम हेयराम रेणारे माणहे योहान फाय आवा, एने वचन होमलीन जान तान पापान माफी मांगीन यरदन नेदी माय योहान फाय रेन बपतीस्मा लेदा।

⁶योहान उटड़ान रोचकान फाड़का पेर रियेल ईतो, एने कोमरा माय चामड़ान पुट्टो बांद रियेल ईतो, एने तान खाणो टिड्या एने जेंगली मोवाल एतो।

⁷योहान इहकेरीन पारचार केरतालो, “जो एदमी मार पासाण आवण्यो हे, तो माहु रेन जादा ताकेतवालो हे। तान खाहड़ान दोयड़ी सोड़नेन वोर मार माय लायकी नाय मीले।

⁸मी ते तुमूह पाण्या केरीन बपतीस्मा केरथु, पुण तो तुमूह चोखाला जीवा केरीन बपतीस्मा केरी।”

⁹ता दिह्याम ओहलो एनो काय यीशु गेलील ने नासरत गावाम रेन आवो, एने यरदन नेदी माय योहान फाय रेन बपतीस्मा लिदो।

¹⁰जेवी यीशु बपतीस्मा लेन पाण्या माय रेन उपेर आवो, तुलेचबूखे यीशु हेरोग उगेड़तालो एने चोखाला जीवाह पेरवान गेत ता पोर उतेरतालो दिख्यो।

¹¹1:11 मत्ती 3:17; 12:18; मरकुस 9:7; लुका 3:22एने हेरगा माय रेन ज्यो आवाज होमलानो, “तु मारो मोंगाल्लो बिटोख हे, एने मी तार पोर जुलूम खुस हे।”

¹²तेवी चोखालो जीव यीशुह उजाड़ी माय ली गीयो,

¹³एने उजाड़ी माय चालीह दिह वोर सैतान यीशुन पारेख किरते रिनो; एने यीशु जेंगली जेनवेरा हिऱ्यो रिनो, पुण हेरोगदुत आवीन तान सेवा चाकरी केऱ्या।

¹⁴बपतीस्मा केरनार योहान देराय जाणेन पासाण यीशु गेलील माय आवो, एने बोगवानान राज ने हाजाली खोबरीन पारचार किरते रिनो।

¹⁵1:15 मत्ती 3:2एने यीशु इही किन पारचार केरतालो, “टेम पुरो एय जायेल हे, एने बोगवानान राज आहने आव लागेल हे; तुमरा पापाम रेन मोन फिरावो एने हाजाली खोबरी पोर बुरहो किरो!”

¹⁶जेवी यीशु गेलील ने देरीयान दिड़े दिड़े जाणे बाजरियेल ईतो, तेवी तो शमोन एने तान बाहख अन्द्रियासाह देरीयाम जाल टाकताला दिख्यो, काहाकाय ता मासऱ्या एता।

¹⁷तेवी यीशु ताह केयो, “मार पासाण आवो मी तुमूह हिकाडुह काय माणहाह बोगवाना फाय किहीक लावणु हे।”

¹⁸ता यीशुन वात होमलीन जालीह जागेस सोड़ीन तान पासाण चाल देना।

¹⁹यीशु थोड़ोक ओंगाण चालीन गीयो, तेवी जब्दीन सोरा याकुब एने योहान ज्या दुय बाहख डोंडह्या पोर जाल हुदारताला ताह देखाना।

²⁰जेवी यीशु ताह दिख्यो, तुलेचबूखे ताह हाद्यो; एने ता तान आबाख जब्दीह मोंजर्‍या हिऱ्यो डोंडह्या पोर सोड़ीन यीशुन पासाण चाल देना।

²¹तेवी यीशु एने तान चेला गेलील देसान कफरनहूम हेयरा माय आवा, एने यीशु विहेवणेन दिह यहुदिन बोक्ती केरन्या गेरा माय जाईन हिकाड़ने बाज गीयो।

²²1:22 मत्ती 7:28,29एने माणहे यीशुन हिकवोण होमलीन बोंगलाय जाताला, काहाकाय यीशु ताह देरेमगुरून गेत नाह; पुण आदिकार हिऱ्यो हिकाड़तालो।

²³तुलेचबूखे बोक्ती केरन्या गेरा माय एक बुतड़ो लागेल माणुह एतो, तो आयड़ीन केयो,

²⁴“एय यीशु नासरी आमुह तुवा हेऱ्यो काय काम? काय तु आमुह खेतेम केरने आयेल हे? मी तुवाह जाणथु, तु बोगवानान चोखालो खुबर्‍यो हे!”

²⁵पुण यीशु ताह दोपकाड़ीन केयो, “ठावको रे, एने ज्या एदम्यान सेरीर माय रेन निकेल जा!”

²⁶तेवी बुतड़ो ताह मोहदेलीन मोठेस आयेड़नो, एने तान सेरीर माय रेन निकेल गीयो।

²⁷तो देखीन आखा माणहे ओला बोंगलाय गीया एने एका दिहराह केया, “ज्य काय हे? काय ज्यी नोवाली हिकवोण हे? ज्या एदम्या फाय बुतड़ाह उकुम आपणेन आदिकार हे, एने तो तान उकुम मानेह!”

²⁸एने यीशुन बाराम खुबेर गेलील ईलाकान आहने पाहने आखी जागे पोसीर गीयो।

²⁹यीशु एने तान चेला यहुदिन बोक्ती केरन्या गेरा माय रेन निकेल गीया, एने याकुब एने योहान हिऱ्यो शमोन एने अन्द्रियास ने गेर आवो।

³⁰शमोनान हाहवोक हेरी माय दुखारी खाटला पोर लोट रियेल एती, जेवी यीशु ता पुचनो, तीन बाराम ताह केया।

³¹तेवी यीशु जाईन तीन आथ दिऱ्यो, एने तुलेचबूखे तीन हेरी उतेर गीयो, एने ती उठीन यीशु एने तान चेलान सेवा चाकरी केरने बाज गियी।

³²हांजीन टेम माय दिह बुड़ गीयो, तेवी माणहे आखा दुखाऱ्याह एने जा माय बुतड़ा एता ताह यीशु फाय लावा।

³³एने आखा गावान माणहे गेरान ओंगाण टोलवाय गीया।

³⁴एने यीशु जुलूम जाणे जा बात बातीन दुखा माय एता ताह हुदाऱ्यो। एने जुलूम बुतड़ाह काड्यो एने ताह कायच बोलने नाह दिनो, काहाकाय बुतड़ा यीशुह ओलेखताला।

³⁵उठ्यान विगोस दिह उगणेन पेल यीशु उठीन गेरा माय रेन निकलीन एक उजाड़ जागे गीयो, एने ता विन्ता केरने बाज गीयो।

³⁶पुण शमोन एने तान हाती यीशुह होदणे गीया।

³⁷जेवी यीशु ताह सापड़ी गीयो, तेवी ता यीशुह केया, “आखा माणहे तुवाह होदतेह।”

³⁸यीशु ताह जापाप आप्यो, “चाला आपु आस पास ने गावा माय जाता। माहु ता बी पारचार केरनु हे, काहाकाय मी ज्यान केरताच आयेल हे।”

³⁹तानकेरता ता गेलील माय गीया, एने यीशु यहुदिन बोक्ती केरन्या गेरा माय जाईन पारचार किऱ्यो एने बुतड़ाह बाहेर काड़ते रिनो।

⁴⁰एक कोढी यीशु फाय आवीन तान पाया पोड़ीन विन्ता केरीन केयो, “केदी तारी मोरजी एय, ते तु माहु हुदार सिकेह।”1:40 माहु चोखो किर, ज्यी बेमारी माणहा देरमान नेम प्रती खाराब किरेह।

⁴¹यीशु ता पोर गीण केरीन आथ ओंगाण केरीन ताह सापलीन केयो, “मारी मोरजी हे काय तु हुदेर जाय!”

⁴²एने तुलेचबूखे कोढ ने बेमारी ताह एदम्याह सोड़ देनी, एने तो हुदरी गीयो।

⁴³तेवी यीशु ताह सोमजाड़ीन चालोच मुकेल दिनो।

⁴⁴एने ताह केयो, “होमेल, कुणीह मा किहे। पुण जाईन चाकऱ्याह देखाड़जे एने ताह तार पारेख केरने दे, एने आपणे हुदेर जाणेन बाराम जो मुसो नेम ठेरायेल हे, ताह बेट चेड़ावजे काय ता पोर पुरावो एय।”

⁴⁵पुण तो बाहेर जाईन ज्यी वातीन जुलूम पारचार केरने बाज गीयो, एने जुलूम पोसराव दिनो काय यीशु उदाह हेयरा माय नाह जाय सीकनो। पुण बाहेर उजाड़ी माय रिनो, एने आखी जागे रेन माणहे यीशु फाय आवती रेना।