योहान 3

¹फरिसी माय नीकुदेमुस नावान एक माणुह एतो, तो यहुदिन आदिकारी ईतो।

²तो एक राती यीशु फाय आवीन केयो, “एय रब्बी, आमुह मालुम हे काय तु बोगवानान उगे रेन आयेल हे। काहाकाय कुण बी ज्या चोमेत्काराह जा तु देखाड़ेह, केदी बोगवान ता हिऱ्यो नाय रेय ते देखाड़ नाह सिकेत।”

³यीशु ताह जापाप आप्यो, “मी तुवाह खेरीच केथु, केदी एगदान नोवालो जेल्मो एया सावाय तो बोगवानान राज नाय देख सेकी।”3:3 पोशो; नाहते उपेर रेन।

⁴नीकुदेमुस यीशुह केयो, “माणुह जेवी डावालो एय जाय, ताहार पोशो किहीक पायदा एय सिकेह? काय तो तान आईख ने पेटाम पोशो जाईन पायदा एय सिकेह!”

⁵यीशु जापाप आप्यो, “मी तुवाह खेरीच केथु, जाह वोर काल्लोस बी माणुह पाणी एने चोखाला जीवाम रेन पायदा नाय एय ताह वोर तो बोगवानान राज माय रिग नाय सेकी।

⁶काहाकाय माणुह आहख आबाख फाय रेन सेरीर माय जेल्मो लिथे, पुण जो जीवान उगे रेन जेल्मो लियेल हे तो जीव हे।

⁷बोंगलाय मा काय मी तुवाह केयोह, तुवाह पोशो नोवीन जेल्मो लेणे जोरवरी हे।

⁸वारो जा मोन लागी ता जाणे; एने तु तान आवाज होमलेह, पुण नाह जाणेत काय तो का रेन आवीह एने का जाथे। जो कुण जीवाम रेन जेल्मो लियेल हे तो ओहलोच हे।”

⁹नीकुदेमुस यीशुह सावाल फुशो, “ज्‍यु वातु किहीक एय सेकत्युह?”

¹⁰ज्यो होमलीन यीशु ताह जापाप आप्यो, “तु इस्राएलान गुरू हे तीबी ज्‍यु वातुह नाह सुमजेत?

¹¹मी तुवाह खेरीच केथु काय आमुह जो मालुम हे तो केतेह, एने जो आमु दिखेल हेते तान गोवाय देतेह, एने तुमू आमरी गोवाय नाह मानते।

¹²जेवी मी तुमूह दुनियान वातु कियेल; एने तुमू बुरहो नाह केरते, ते केदी मी तुमूह हेरगान वातु केह, ते ओवता किहीक बुरहो किरहो?

¹³यीशु मसीन बिगेर काल्लोस माणुह हेरगा माय नाह गीयो, तो एकुस जो हेरगाम रेन उतरेल हे एने तो माणहान बिटोख हे।”3:13 वचन 21 वोर ज्यो सावाल किरेल सोबदा चालु रेय सेकतेह।

¹⁴एने जिहकेरीन मुसा उजाड़ी माय पितलान गेड़हाह खाम्बा पोर उपेर चेड़ायेल ईतो, तिहेस केरीन जोरवरी हे काय माणहान बेटाख बी उपेर चेड़ावे,

¹⁵केरीन जो कुण ता पोर बुरहो केरी ताह जेलेमक्यो जीवाय जुड़ी।

¹⁶काहाकाय बोगवान दुनियाह ओहलो मोंग किऱ्यो काय तो तान एकुस मोंगाल्ला बेटाख आप दिनो, काहाकाय जो कुण ता पोर बुरहो केरी तो खेतेम नाय एय, पुण जेलेमक्यो जीवाय सापड़ावी।

¹⁷बोगवान तान बेटाख दुनिया माय ज्यानकेरता नाह मुकल्यो काय दुनियान नियाव केरी, पुण ज्यानकेरता काय दुनियाह तान उगे रेन सुटकारो जुड़ी।

¹⁸जो ता पोर बुरहो किरेह तान नियाव नाय एय; पुण जो ता पोर बुरहो नाह किरेत तो दोसी ठेराय गीयो, ज्यानकेरता काय तो बोगवानान एकुस मोंगाल्ला बेटाख ने नावा पोर बुरहो नाह केऱ्यो।

¹⁹एने आरोपी ठेराणेन कारेण ज्यो हे काय उजालो दुनियाम आवोह: पुण माणहे आंदाराह उजालाह रेन जादा मोंगाल्लो सोमज्या, काहाकाय तान कामे खाराब एता।

²⁰काहाकाय जो कुण खाराब काम किरेह, तो उजालाह हेऱ्यो रेन सेटो हे, एने उजालान आहने नाह आवीत, काहाकाय तान खाराब कामे उदाह एय जाती।

²¹पुण जो खेरायीन वाटी पोर चालेह तो उजालान आहने आवीह, काहाकाय तान काम देखाती काय ता बोगवानान उगे रेन केराय जाईल हेते।

²²तान पासाण यीशु एने तान चेला यहुदिया ईलाका माय आवा, एने यीशु ता हिऱ्यो रेन बपतीस्मा केरने बाज गीयो।

²³योहान बी शालेम हेयरान आहने एनोन नेदी एती ती माय बपतीस्मा केरतालो, काहाकाय ताहरी जुलूम पाणी एतो। एने माणहे ता फाय आवताला, एने तो बपतीस्मा केरतालो।

²⁴3:24 मत्ती 14:3; मरकुस 6:17; लुका 3:19,20योहान ती टेम माय जेलीम कोंडायेल नाह ईतो।

²⁵ताहरी योहानान चेलान एक यहुदि माणहा हेऱ्यो चोखो एणेन रितीन बाराम बोलाचाल एनी।

²⁶एने ता योहाना फाय जाईन ताह केया, “एय गुरू, जो माणुह यरदन नेदीन ती पार तार हिऱ्यो ईतो, एने जान बाराम तु कियेल ईतो? देख, तो बपतीस्मा किरेह, एने आखा ता फाय जातेह!”

²⁷योहान ताह जापाप आप्यो, “जाह वोर माणहाह बोगवाना फाय रेन आपाय नाह जात, ताह वोर ताह काईच नाह जुड़ सिकेत।

²⁸3:28 योहान 1:20मी मसी ना सुतो, पुण तान ओंगाण मोकलायेल हे, इहकेरीन मी कियेल हे तान तुमू पुरावो हेते।

²⁹जान वोवड़ी हे, तोस वोवड़ो हे; एने उबरीन तान वातु हुमलेह, तो वोवड़ान हाती हे, एने तो वोवड़ान आवाज होमलीन खुस ईथे। तिहेस केरीन एवी मारी ज्यी खुसी पुरी एनीह।

³⁰जोरवरी हे काय मी गेटु एने तो वोदी।”

³¹जो उपेर रेन आवीह तो आखाम रेन हाजो हे। जो देरती पोर रेन आवीह तो देरतीन हे एने देरतीस ने वातु किथे, पुण जो हेरगाम रेन आवीह तो आखाह रेन उचो हे।

³²पुण जो काय तो दिखेल एने हुमलेल हे, तास ने बाराम तो गोवाय दिथे एने तान गोवायीह कुण मानेत नाह।

³³जो यीशुन गोवायीह मान लियेल हे तो ज्यी वाती पोर पाको केर दियेल हे काय बोगवान खीरलो हे।

³⁴काहाकाय जाह बोगवान मुकलेल हे तो बोगवानान वातु किथे, काहाकाय तो जीव माप मापीन नाह आपेत।

³⁵3:35 मत्ती 11:27; लुका 10:22आबोख बेटाख मोंग किरेह एने तो आखो काय तान आथाम आप दियेल हे।

³⁶जो बेटाख पोर बुरहो किरेह, जेलेमक्यो जीवाय तास ने हे; पुण जो बेटाख ने उकुम नाह मानेत तो जीवायीह नाय देखी, पुण बोगवानान राग ता पोर रिथे।