तीतुस 1

¹पौलुसान उगे रेन जो बोगवानान पावोर एने यीशु मसीन प्रेरित हे, बोगवानान निवाड़ेल माणहाह तान बोरहा माय मोदेक केरनेन केरता एने आमरा देरमान खेरली एकलीन इही वोदाड़नेन केरता मोकलायेल हे।

²तो जेलेमक्यो जीवणान आसा जान वायदो बोगवान कायेम किरेल हे, तो केदी बी जुठ नाह बोलने।

³पुण ठिख टेम माय तान वचनान पारचारान द्‍वारे देखाड़ेल हे, जो आपणा सुटकारो आपणारा बोगवानान उकुमान गेत माहु होपाय गीयो, एने मी पारचार बी किरेल ईतो।

⁴तीतुसान नावाम, जो बोरहान मेल मिलाप ने विचारा माय मारो खीरलो बिटोख हे:

⁵मी तुवाह क्रेते माय ज्यानकेरता मेलीन आयेल काय ज्‍यु वातु बाकी हेत्यु त्युह हुदारी, एने मार उकुमान गेत एक एक गावा माय डायडाया माणहाह निवाड़ेन मेली,

⁶1:6 1 तीमुथीयुस 3:2-7जाह तु निवाड़ हे तो निर्दोस एय, एने तान एकुच बायकु रेणे जुवे, एने तान सोरा बुरहो केरनारे रेणे जुवे, एने ता माय सिनालो केरनार एने कानुनाह तोड़नारे नाय जुवे।1:6 फोक्‍तो एकुस बायकु रेय; नाहते फोक्‍तो एकुस वार वाराड़ एय।

⁷काहाकाय पुडारीह बोगवानान कारबारी एणेन कारेण निर्दोस रेणे जुवे, एने नाह एकइट्यो, नाह राग केरनार, नाह दारूड्यो, नाह राड़ कुट्यो, एने नाह लुटीन कामायेल कामाईन लोबी,

⁸पुण पावणाय केरनार, एने जो हाजो हे ताह मोंग केरनार, संयमी, नियाव केरनार, चोखालो एने सोमेजदार एय।

⁹एने तो विश्वासयोग्य वचना पोर जो देरमान पारचारान गेत हे, मोजबुत रेय काय उत्साहित एन खेरलो हिकवोण माय पारचार केर सिके, एने जा विरोद केरतेह तान मुय बोंद केर सिके।

¹⁰काहाकाय कानुन तोड़नारे, फालतुक वातु बोलनारे एने ठेगणारे जुलूम माणहे हेते, खास केरीन खेतना ईयेल माय रेन।

¹¹तान मुय बोंद केरने जुवे, एने ज्या माणहे ठेगीन कामावणेन केरता जी वातु हिकाड़ने नाय जुवे, ओहल्यु वातु हिकाड़ीन गेराणान आखा माणहाह बिगाड़ देतेह।

¹²क्रेतीन माणहाम रेन एक जाणाव केरनार तान माणहान बाराम खुद कियेल हे जो तास ने हे, कियेल हे, “क्रेतीन माणहे कायेम जुठ बोलतेह, खाराब जेनवार, एने आलह्या खादाड़ हेते।”

¹³ज्यी गोवाय खेरली हे, तानकेरता ताह दोपकावीन चेतावणी आप्या केर काय ता बोरहाम मोजबुत एय जाती।

¹⁴एने यहुदिन वार्ता पोर एने ता माणहान उकुमा पोर द्यान नाय देय, जा खेरायीह नाकार केर देतेह।

¹⁵चोखाला माणहान केरता आखी वोस्तु चोखी हे, पुण एठा एने अविश्वासी माणहान केरीन कायच बी चोखो नाह सोतो, काहाकाय तान इकेल एने मोन दुयू एठा हेते।

¹⁶आमु बोगवानाह ओलेखतेह केरीन ता केयीन देखाड़तेह, पुण कामा माय ताह नाकारतेह, काहाकाय ता खाराब एने उकुम नाह माणनारे हेते, एने काल्ला बी हाजा कामान लायकीन नाय मीले।