2 थिस्सलुनिक्यो 2

¹एय बाय बोणहा, एवी आपु आपणा मालीक यीशु मसीन आवणेन, एने ता हेऱ्यो आपणो एकठो एणेन बाराम तुमूह विन्ता केरथु,

²एने बोगवाना फाय रेन आवणार खुबेर, पारचार, नाहते पत्रान द्‍वारे जो आमरी उगे रेन एनोह, ज्यो सोमजीन काय मालीकान दिह आहने आव पोचनोह, ते तुमू उचकाहुच नाराज एने दुखी मा ईहो।

³काल्ली बी बातीन कुणी फाय रेन ठेगाहु मा; जाह वोर बोगवानान विरोद सेवल्यो देंगो नाय एय, ताह वोर खाराब माणुह नाय आवी। जो नेरगान आक्‍ठा माय टाकाएन खेतेम एय जाय।

⁴तो खाराब माणुह विरोद किरेह, एने आखाह जा देव, मुखी केवाथे, सोताह ताह रेन मुठलो ठेरावी, एने न्या वोर काय तो बोगवानान मोंदिर माय बोहीन सोताह देव ठेरावीह।

⁵जेवी मी तुमू हिऱ्यो ईतो तेवी ज्यी वातु तुमूह कियेल ईतो, तुमूह इर नाह सोती काय?

⁶तुमू ती वातुह जाणतेह, ज्यी ताह आवणे माय एवी रोक रेनीह। पुण ठिख टेम माय तो खाराब माणुह आवी।

⁷काहाकाय एदेरमान लिकायेल ताकेत एवी बी काम किरेह, पुण एवी एक रोकणार हे, एने जाह वोर तो सिटो नाय एय जाय ताह वोर रोक रेय।

⁸तेवी तो कायदान विरोद केरनार खाराब माणुह आवी, एने जेवी यीशु आवी तेवी तान मुया केरीन फुकीन मार टाकी, एने तान आवणेन विजाला केरीन खेतेम केरी।

⁹2:9 मत्ती 24:24ता खाराब माणहान आवणो सैतानान ताकेत हेऱ्यो आखी बातीन खोटी ताकेत, एने चोमेत्कार, एने बोंगलाय ओहला कामा हेऱ्यो आवी।

¹⁰एने खेतेम एणारा माणहान केरीन आखी बातीन दोकाम फासाड़नेन केरता अन्याय ने कामान वापेर केरी; काहाकाय ता खेरायीह मोंग नाह केऱ्या काय ता माणहान सुटकारो एतो। केरीन ता खेतेम एय जाती।

¹¹एने ता जुठा पोर बुरहो केरती केरीन बोगवान तान विचीम बोटकावणार ताकेत मोकली।

¹²काहाकाय जा माणहे खेराय पोर बुरहो नाह केरती, पुण खाराब काम केरनेन केरता खुस एतेह, ता आखाह डेंड जुड़ी।

¹³एय बाय बोणहा, एने बोगवानान मोंगाल्ला माणहे, आमुह तुमरा बाराम कायेम बोगवानान दन्यवाद केरती रेतेह; काहाकाय बोगवान तुमूह सुरवाती रेन निवाड़ लियेल हे काय चोखाला जीवान द्‍वारे चोखाला बोणीन, एने खेराय पोर बुरहो केरीन सुटकारो लिवो।

¹⁴एने ज्यी हाजाली खुबेर आमु तुमूह होमलायेल तान द्‍वारे तुमूह हादिल हे, काय तुमू आमरा बोड़ाय ने यीशु मसी माय जोड़ाय सेकी।

¹⁵तान केरता एय बाय बोणहा, मोजबुत रिवो; एने जी जी वातु तुमू आमु फाय रेन पत्री एने वचनान द्‍वारे हिकेल हेते, ताह देरीन रिवो।

¹⁶आपणो मालीक यीशु मसी खुद, एने आपणो आबोख बोगवान, जो आमुह मोंग किऱ्यो एने गीण माय जेलेमक्यो दिलासो एने हाजी आसा आपेल हे,

¹⁷बोगवान तुमरा मोना माय दिलासो आपी एने आखा हाजा काम केरनेन केरता एने वचन माय मोजबुत केरी।