1एय मोंगाल्ला, जेवी ज्यो वायदो आमुह जुड़नो ते आवो, आपु आपणा आपाह सेरीरान एने जीवान आखा खाराब कामाह चोखो केरता। एने बोगवानाह बितेन चोखाला माय वोड़ता।
2आमुह तुमरा मोना माय जागु आपो। आमु कुणी हेऱ्या बी अन्याय नाह केऱ्या, नाह कुणीह बिगाड्या एने नाह कुणीन नुकसान केऱ्या।
3मी तुमूह दोसी ठेरावणेन केरता ज्य नाह कित। काहाकाय मी पेलुस केय दियेल हे, काय तुमू आमरा मोना माय ओहला बोह गीयाह काय आमु तुमरी हेऱ्या मोरने जीवणेन केरता तियार हेते।
4मी तुमूह जुलूम ईमोत हिऱ्यो बोलने बाजरिनोह, एने माहु तुमू पोर मोठाय हे; मी दिलासा माय बोराय गीयोह। मार आखा दुखा माय मी खुसी माय बोर पोर रेथु।
5काहाकाय जेवी आमु मकादुनिया माय आयेल तीबी आमरा सेरीराह आराम नाह जुड़नो, पुण आमुह चार उगे रेन दुख जुड़तालो: बाहेर जुलूम तेकलीत एती, एने आमरा मोना माय जुलूम बिय एती।
6तीबी गेरब्याह दिलासो आपणार बोगवान तीतुस आवो, तेवी आमुह दिलासो आप्यो।
7एने तान आवणे से ओलोस नाह पुण तान ती सान्ती बी, जी ताह तुमरी उगे रेन जुड़ेल एती। तो तुमरी लालुस तुमरा दुख, एने मार केरता तुमरा ईमोत ने खुबेर आमुह होमलाव्यो, एने ता केरीन माहु उंजु बी उत्साह जुड़नो।
8काहाकाय मी तुमूह मारी पत्री से दुख पोचाड़ेल हे, तीबी मी ज्याकेरीन पासतात नाह, जो मी पेल पासतातालो। काहाकाय मी देखथु काय ती पत्री से तुमूह दुख ते एनोह, पुण तो थोड़ीक वार ने केरता एतो।
9एवी मी खुस हे, ज्यानकेरता नाह काय तुमूह दुख पोचनो, पुण ज्यानकेरता काय तुमू ता दुखान कारेण मोन फिराया, काहाकाय तुमरा दुख बोगवानान मोरजीन गेत एता, काय आमरी उगे रेन तुमूह काल्ली बी वातु माय नुकसान नाय पोची।
10काहाकाय बोगवानान उगे रेन आवणार दुख ओहलो पासतावो पायदा किरेह जान परिणाम सुटकारो हे, एने पोशो ताह पासताणे नाह पुड़ेत। पुण दुनियान दुख मोत पायदा किरेह।
11एने दिखो, जो दुख बोगवानान उगे रेन एनो, तुमरे माय कोलोक उत्साह, एने सोताह वोचाड़नेन आसा, एने राग, बिय, लालुस, खुसी, एने नियाव आपणेन विचार पायदा एनो? तुमू आखी बातीन ज्यो साबीत केरीन देखाड्यो काय तुमू ज्यी वातु से निर्दोस हेते।
12पुशो मी तुमू फाय ज्य लिखेल ईतो, तो नाहते ज्यानकेरता लिखेल जो नुकसान केऱ्यु, एने नाह तानकेरता जा पोर अन्याय केराय जायेल, पुण ज्यानकेरता काय तुमरी उत्साह जी आमरी केरता हे, ती बोगवान देख सेकी।
13तानकेरता आमुह दिलासो जुड़नो।
14काहाकाय केदी मी तान ओंगाण तुमरे बाराम थोड़ोक मोठाय देखाड़ेल, तीबी लाजवानो नाह, पुण जिहकेरीन आमु तुमूह आखी वातु खेर खेरीच केय दियेल एता। तिहेकेरीन आमरो मोठाय केरने तीतुसान ओंगाण खेरलो निकेलनो।
15जेवी तुमू तान स्वागत बिय बिन एने कापते कापतेन किरहो, एने तान उकुमान पालेन केरनेन केरता तियार रिहो ताहार तुमरी केरता तान मोंग वोदते जाय।
16मी जुलूम खुस हे, काहाकाय मी आखी वातु माय तुमू पोर पुरो बुरहो केर सेकथु।