2 कुरिंथीयो 5

¹काहाकाय आमु जाणतेह काय देरतीन आवाल्या थोड़ीक वार ने केरता हेत्यु, जो आमरो सेरीर हे पाड़ाय जाय, एने आमुह बोगवाना उगे रेन हेरगा माय एक ओहलो सेरीर जुड़ी जो आथा केरीन बाणायेल गेर नाह, पुण जेलेमक्योस हे।

²ज्या गेरा माय ते आमु आयेड़तेह एने मोटली लालुच मेलतेह काय आपणा हेरगान गेराह पिर लेय।

³काय ज्याह पेरने से आमु नांगेरला नाय रेय।

⁴एने आमु ज्या गेरा माय रितेन वोजा माय दाबाईन आयेड़ते रेतेह, काहाकाय आमु ताह उतारने नाह, पुण उंजु पेरने होद्तेह काय तो जो मोरनार हे, जीवणाम बुड़ जाय।

⁵जो आमुह आवणारा टेम माय जुड़न्यो हे, ज्यो तान पुरावो हे, एने बोगवान आमुह बियाना माय जीव बी आपेल हे।

⁶आमु कायेम ईमोत केरीन रेतेह, एने ज्य जाणतेह काय जाह वोर आमु देरतीन सेरीरान गेरा माय रेतेह, ताह वोर आमु बोगवानाह रेन आंगे हेते।

⁷काहाकाय आमरा जीवणा माय जो काय आमु देखतेह तो नाह, पुण बोगवाना पोर बुरहो केरतेह।

⁸तानकेरता आमु ईमोत बांदिन रेतेह, एने सेरीराह रेन आंगे एन बोगवाना हेऱ्यो हेरगावाला गेराम रेणे जुलूम हाजो सोमेजतेह।

⁹ज्यानकेरता आमरा मोनान मोरजी ज्यी हे, काय आमु देरतीन गेराम रेय नाहते हेरगावाला गेराम रेय पुण आमु ताह मोंगाल्ला लागती रिज्यो।

¹⁰5:10 रोमीयो 14:10काहाकाय जोरवरी हे काय आपणो आखान हाल मसीन नियाव केरनेन जागे तान ओंगाण उगड़ी जाय। काय एकेक माणहान जान तान हाजा बाकता कामान बुदलो जा तान सेरीरान द्‍वारे किरेल हेते, ताह जुड़ी।

¹¹तानकेरता आमु बोगवानान बिय मानेन आमु माणहाह सोमजाड़तेह, पुण बोगवान आमरो पुरो हाल जाणेह, एने मारी आसा ज्यी हे काय आमरी ज्यी देसा तुमरा मोना माय बी उगड़ी।

¹²तीबी आमु तुमरी ओंगाण आमरी बोड़ाय नाह केरती, पुण तुमूह टेम आपतेह काय तुमू आमु पोर मोठाय केरी। एने ताह जापाप आप सिकहो जा मोना पोर नाह, पुण दिखावट पोर मोठाय केरतेह।

¹³केदी आमुह माणहे गांडा सोमेजतेह, ते बोगवानान केरता; एने केदी होस माय हेते ते तुमरी केरता।

¹⁴काहाकाय यीशु मसीन मोंग आमुह मोजबुर किर दिथे; तानकेरता आमु ज्य सोमेजतेह काय जेवी एक आखान केरता मुरनो, ते आखा मोर गीया।

¹⁵एने तो आखान केरता ज्यानकेरीन मुरेल काय जा जीवताला हेते, ता ओंगाण सोतान केरता नाय जिवी, पुण तानकेरता जिवी जो तानकेरता मुरेल एने पुशो जीव उठनो।

¹⁶तानकेरता एवी रेन आमु कुणी बी माणहाह होमेलने गेत नाय सुमेजहो, एने आमु मसीह बी सेरीरान गेत जाणेल एता, तीबी एवी रेन ताह इहकेरीन नाय जाणहु।

¹⁷तानकेरता केदी एगदो मसी माय हे तो नोवाली बाणावोट हे; जुनाली वातु वित गीयुह दिखो, एवी आखी वातु नोवाली एय गीयुह।

¹⁸ज्‍यु आखी वातु बोगवाना उगे रेन हेत्यु; जो मसीन द्‍वारे आपणी हिऱ्यो आमरो मेल मिलाप किर लियेल, एने मेल मीलापान सेवा आमुह हुप दियेल हे।

¹⁹5:19 आखा माणहान जातीह मसीन द्‍वारे बोगवान आपुह दोस्ती बोणावीह; नाहते मसी माय बोगवान आखा माणहान जातीह आपुह दोस्ती बोणावीह।बोगवान मसी माय एन ता हिऱ्यो दुनियान मेल मिलाप किर लिदो, एने तान गुनान दोस ता पोर नाह लागाड्यो, एने तो मेल मीलापान वचन आमुह हुप दियेल हे।

²⁰तानकेरता आमु मसीन राजदुत हेते; सुमजो बोगवान आमरी द्‍वारे विन्ता केरने बाजरिनोह। एने आमु मसीन उगे रेन बोलतेह काय बोगवाना हेऱ्या मेल मिलाप किर लिवो।

²¹जा पापाह रेन एंजाणल्या एता, ताहाच तो आमरे केरता पाप ठेरायेल काय आमु ता माय एन बोगवानान ओंगाण देरमी बोण जाती।