1एवी मोठाय केरने मार केरता ठिक नाह तीबी केरने पुड़ेह, ज्यानकेरता मी मालीक आपेल दर्शनान एने उजालान चेरचा केरूह।
2मी मसी यीशु माय एक जाणाह जाणथु; जाह चोवदा वोरह्या पेल तीसरा हेरगा माय विसाय जायेल ईतो। ओहला सेरीरा बेल ईयेल एतो एने विण सेरीरा हेऱ्यो ज्य माहु नाह मालुम। बोगवानाह जी वातुन जाणकारी हे,
3मी ओहला माणहाह सेरीरा हिऱ्यो नाहते सेरीरान बिगेर नाह मालुम, ज्यो ते बोगवानुस जाणेह।
4एने हेरगा माय विसाय गीयो, एने केवाय नाय ओहल्यु वातु होमलेल; जी माणहाह बोलनेन पारवांगी नाह।
5ओहला माणहा पोर मोठाय केरूह, पुण मारी कोमजोरीह सोड़ीन आपणा आपा पोर मोठाय नाय केरू।
6केदी मी मोठाय केरने होदु तीबी फुगो नाय एव, काहाकाय मी खेरीच केथु; तीबी रोकाय जाथु; ओहलो नाय जिहकेरीन माहु दिखेह नाहते माहु फाय रेन होमलेह, जो काय मी हे ताह रेन वोदार कुण नाय सोमजी।
7ज्यानकेरता काय मी उजालान मोकतास ने कारेण फुहलाय नाय जाव, एने मार सेरीराम एक काटो टोचलेल हे मतलब सैतानान एक दुत ने माहु दुमा दियेल ताकाय फुहलाय नाय जाव।
8ज्यान बाराम मी मालीकाह तीन वारीन विन्ता किरेल काय ज्यो मार हेऱ्यो रेन सेटो एय जाय।
9पुण मालीक माहु केयो, “मार गीण तार केरता जुलूम हे, काहाकाय मार सेक्ती कोमजोरी माय पाकी ईथे।” तानकेरता मी खुसी से मारी कमजोरी पोर गोमेंड केरूह काय मसीन सेक्ती मार पोर सावलो केरती रेय।
10मी मसीन केरता कोमजोरी माय एने चिहटाम, एने गेरीबीम, दुखाम, सेतावाम, केठणायीम खुस हे, काहाकाय मी कोमजोर एथु; तेवी ताकेतवान रेथु।
11मी फुगो ते बुणेल; पुण तुमूच माहु ज्य केरनेन मोजबुर किरेल। तुमू ते मारी बोड़ाय केरने जोवताला, काहाकाय एवी मी कायच बी नाह, तीबी ता मोटला प्रेरिताह रेन काल्ली बी वातुम कोम नाह।
12प्रेरितान निसाणी बी तुमरी विचीम जुलूम दिरी हेऱ्यो चोमेत्कार, एने बोंगलाय ओहला कामे, एने ताकेत ने काम देखाड़ाय गीया।
13तुमू काल्ली वातु बी माय दिहरी मोंडलीह रेन कोम एता, ओलोस काय मी तुमू पोर मारो वोजो नाह टाकेल। मारो ज्यो अन्याय माफ किरो।
14मी तिसरी वार तुमू फाय आवणेन केरता तियार हे, एने मी तुमू पोर कायच वोजो नाय मेलु, काहाकाय मी तुमरो मालदेन नाह, पुण मी तुमूच मोंग केरथु। काहाकाय सोराह तान आईख आबाख ने केरता देन टुलो नाय केरने जुवे, पुण आईख आबाख सोरान केरता देन टुलो केरने जुवे।
15मी तुमरी केरता जो काय हे खुसी से खीरलो केरूह, एने मी बी खेरचाय जाह पुण तुमूह होवटो मोंग केरथु, ते काय मारो मोंग तुमूह रेन कोम एय? काहाकाय मी तुमूह जादा मोंग केरथु।
16दिहरा माणहे केय सेकते, पुण एगदो इहकेरीन केय सिकेह काय मी तुमूह उशारी माय फासाड़ लियेल हे।
17जाह मी तुमू फाय मुकलेल, काय ताम रेन एगदान द्वारे मी तुमरो काह फायदो विसेल?
18मी तीतुसाह सोमजाड़ीन ता हिऱ्यो ता बायाख मुकलेल, ते काय तीतुस तुमरो गेलेत फायदो विसेल? एने आमु एकुच उद्देश पोर नाह चालना काय?
19तुमू एवी वोर सोमेजणे बाजरेनाह काय आमु सोतान वोचाव केरतेह, पुण जिहकेरीन मसी हुदिह, तिहेस आमु बोगवानाह आहने जाणीन बोलतेह, एने एय मोंगाल्ला, आख्यु वातु तुमरी वोड़तीन केरता केतेह।
20माहु बिय हे, ओहलो नाय एय काय मी आवीन जोहलो होदथु, तोहलोस तुमूह नाय देखु; एने माहु बी जोहलो तुमू नाह होदते, तोहलोस दिखहो; एने तुमू माय लेड़ाय, कुयराय, राग, विरोद, ईर्ष्या, चुगली, मोठाय एने लेड़ाय एय।
21एने ओहलो नाय एय काय मार बोगवान माहु पुशो तुमरी न्या आवणेन केरता माहु पोर दाबाव टाकी, एने माहु पोशो दुख मोणावणे पोड़ी जा पेल पाप किरेल एता, एने खाराब कामे, सिनालो एने हावुस जो ता केरतेह, मोन नाह फिराया।