1Nɨghnɨzir aghuim, mati amizir mam tughav ikia
2Egha a tuavimɨn boroghɨra itir danganir pɨn tibar tuivav ikia
3Egha a nguibar ekiamɨn danganir uari akuvimɨn tughav ikia,
4“Kɨ gumazamiziba bar ian dei.
5Ia gumazir fofoziba puvatɨziba, ia izi fofozim ini.
6Ia deraghvɨra na baragh, kɨ akar bar aghuim ia mɨkɨmasa.
7Kɨ zurara guizbangɨn akamɨn gun ia mɨgei.
8Nan akaba da guizbangɨra.
9Gumazir nɨghnɨzir aghuim ko fofozim itiba,
10Nan aghuzir akaba ko fofozim, aning bar deragha silva ko golɨn aghuim gafira.
11“Kɨ uabɨ kɨ nɨghnɨzir aghuim, egha kɨ dagɨar igharagha gari bar pɨn koziba ko
12Kɨ dabirabir aghuimɨn arazim gɨfo.
13Ezɨ gumazir Ikiavɨra Itir Godɨn apengan ikia an atiatiba, me arazir kurabar aghua.
14Kɨ nɨghnɨzir aghuim gumazamizibar anɨngɨva, egh men akurvaghtɨ me ingangarir aghuibar amuam.
15Ezɨ gumazamizir manaba gavgavigha na buri, me nan ganam.
16Kɨ ziar ekiam ko dagɨar avɨriba isɨ gumazamizibar anɨngasa.
17Ezɨ bizir kɨ me ganɨdiba,
18Kɨ zurara arazir aghuimɨn gɨntɨsi.
19Kɨ bizir aghuir avɨriba gumazir na gifongezibar dɨpenibagh arɨsi.
20“Bar fomɨra fomɨra, Ikiavɨra Itir God tɨghar bizibar ingaramin dughiam, a faragha nan ingari.
21Bar fomɨra, a tɨghar nguazimɨn ingaram,
22A tɨghar ongarim ko dɨpabar ingaram,
23A tɨghar mɨghsɨar ekiaba ko dozibar ingaram, kɨ faragha oto.
24A nguazir asɨzir zariba ko nguazir mɨnemɨniar tamɨn ingarizir puvatɨzɨ,
25Kɨ Ikiavɨra Itir God ko itima, an overiam gamizɨma, an oto.
26Kɨ itima, a ghuriabagh amizɨma da overiamɨn iti.
27Ezɨ an Akar Gavgavimɨn ongarim mɨgɨa ghaze, Ongarim, nɨ izɨvagh mangɨ mɨtaghniar kɨ atɨzimɨn tugh, egh an ikiavkɨnan markɨ.
28Ikiavɨra Itir God ingangarir kabagh amir dughiamɨn, kɨ a ko itima a na mɨsevezɨ, kɨ mati fofozir gumazim ingangarimɨn gari.
29Dughiaba bar kɨ nguazimɨn itir bizir a ingarizibar gara bar akonge. Egha kɨ gumazamiziba bagha bar akonge.
30Ezɨ nɨghnɨzir aghuim ua kamaghɨn mɨgei, “Nan boriba, ia deraghvɨra nan akam baragh egh nan arazibar gɨn mangɨ.
31Kɨ ian sure damutɨ, ia nɨghnɨzir aghuim ko fofozim iniam.
32Gumazamizir deraghvɨra nan akam baraziba, me bar akongegh.
33Na inizir gumazamiziba, me ikɨrɨmɨrir aghuim isi.
34Ezɨ gumazamizir na inizir puvatɨziba, me uarira uarigh asɨghasɨsi.